ရန်ကုန်မြို့ရှိ နိုင်ငံကူးလက်မှတ် ထုတ်ပေးရေးအဖွဲ့ရုံးတွင် ပတ်စ်ပို့စာအုပ် လာရောက်ပြုလုပ်သူများကို တွေ့ရစဉ် (ဓာတ်ပုံ-နေဝန်းထက်)

မြန်မာနိုင်ငံရှိ လူဦးရေနှစ်သန်းအထက်မှာ ပြည်ပနိုင်ငံများသို့ အကြောင်းအမျိုးမျိုးကြောင့် ရောက်ရှိနေပြီး အသက် ၁၅ နှစ်မှ ၃၉ နှစ်ဝန်းကျင် အလုပ်လုပ်နိုင်သည့်အရွယ် လူငယ်များမှာ အများဆုံးဖြစ်နေကြောင်း ကုလသမဂ္ဂ လူဦးရေ ရန်ပုံငွေအဖွဲ့က သိရသည်။

လက်ရှိ အိမ်ထောင်စုဝင် နှစ်သန်းခန့်မှာ နိုင်ငံခြားတွင်ရောက်ရှိ နေထိုင်လျက်ရှိပြီး အဆိုပါ လူဦးရေတွင် အမျိုးသား ၁ ဒသမ ၂ သန်း ( ၆၁ရာခိုင်နှုန်း) ပါဝင်နေပြီး နိုင်ငံခြားတွင် ရောက်ရှိနေသူများအနက် ထိုင်းနိုင်ငံတွင် ရာခိုင်နှုန်း ၇၀ ခန့်၊ မလေးရှားနိုင်ငံတွင် ၁၅ ရာခိုင်နှုန်းခန့်နှင့် ကျန် ၁၅ ရာခိုင်နှုန်းမှာ အခြားပြည်ပ နိုင်ငံများတွင် ရောက်ရှိနေထိုင်လျက်ရှိကြောင်းနှင့် လူဦးရေ နှစ်သန်းအနက် ၁ ဒသမ ၇ သန်းခန့်မှာ အလုပ်လုပ်နိုင်သည့် အသက် ၁၅ နှစ်မှ ၃၉ နှစ် (၈၃ ရာခိုင်နှုန်းခန့်) အတွင်း ရှိသူများဖြစ်ပြီး ယင်းလူဦးရေတွင် ၁ ဒသမ ၁ သန်းခန့်သည် အမျိုးသားများ ဖြစ်ကြောင်း သိရသည်။

မြန်မာနိုင်ငံသည် ရွှေ့ပြောင်းလုပ်သားများသည့် နိုင်ငံများတွင်ပါဝင်ပြီး အလုပ်အကိုင် အခွင့်အလမ်း၊ ပဋိပက္ခစစ်ပွဲများနှင့် သဘာဝဘေး အန္တရာယ်များကြောင့် အဓိက ရွှေ့ပြောင်းနေထိုင် နေရခြင်းဖြစ်ကြောင်း သိရသည်။

ခန့်မှန်းခြေအားဖြင့် မြန်မာနိုင်ငံတွင် ရွှေ့ပြောင်းလုပ်သားဦးရေ သိန်းချီရှိသည်ဟု ဆိုသော်လည်း စာရင်းအတိအကျ ကောက်ယူထားခြင်း မရှိသည့်အတွက် ယခုထက်ပိုမိုရှိကြောင်း၊ ရွှေ့ပြောင်းလုပ်သားများတွင် နိုင်ငံသားများ အပါအဝင် နိုင်ငံသား မဟုတ်သူများလည်း ပါဝင်ကြောင်းနှင့် ရွှေ့ပြောင်းသူများသည် ပြည်တွင်း၌ ရွှေ့ပြောင်းနေထိုင်ခြင်းများသာမက အလုပ်အကိုင်နှင့် ပညာရေး အခွင့်အလမ်းပေါ် မူတည်၍ ပြည်ပနိုင်ငံများသို့ ရွှေ့ပြောင်းနေထိုင်မှုများလည်း ရှိနေကြောင်း ကမ္ဘာ့ဘဏ်၏ ထုတ်ပြန်ချက်အရ သိရသည်။

ထို့ပြင် ၂၀၁၄ ခုနှစ် မြန်မာနိုင်ငံ လူဦးရေနှင့် အိမ်အကြောင်းအရာ သန်းခေါင်စာရင်းတွင် ထုတ်ပြန်ထားချက်အရ ယခင်နေထိုင်ခဲ့သည့် အရပ်မှ လက်ရှိနေမြဲအရပ်သို့ ရွှေ့ပြောင်းလာသည့် ၅၃ ရာခိုင်နှုန်းသည် အမျိုးသမီးများ ဖြစ်ကြောင်း၊ ကျားမအုပ်စု နှစ်ခုစလုံးတွင် ရွှေ့ပြောင်းရသည့် အဓိကအကြောင်းရင်းများမှာ ‘မိသားစုနောက်လိုက်၍’ နှင့် ‘အလုပ်ကြောင့်/အလုပ်ရှာရန်’ တို့ကြောင့်ဖြစ်ပြီး မိသားစုနောက်လိုက်၍ ပြောင်းရွှေ့ရခြင်းတွင် အမျိုးသား ၃၂ ရာခိုင်နှုန်းထက် အမျိုးသမီးများ ၄၉ ရာခိုင်နှုန်း ပိုမိုများပြားနေပြီး အလုပ်ကြောင့် အလုပ်ရှာရန်အတွက် ရွှေ့ပြောင်းမှုတွင် အမျိုးသားများ ၄၇ ရာခိုင်နှုန်းက အမျိုးသမီး ၂၃ ရာခိုင်နှုန်းထက် ပိုမိုများပြားနေကြောင်း သိရသည်။

ကမ္ဘာတစ်ဝန်းတွင် ရွှေ့ပြောင်းနေထိုင်သူဦးရေ တစ်ဘီလျံခန့်ရှိပြီး တစ်နိုင်ငံမှ တစ်နိုင်ငံသို့ ရွှေ့ပြောင်းနေထိုင်သူမှာ၂၁၄ သန်း နှင့် နိုင်ငံတွင်း ရွှေ့ပြောင်းနေထိုင်ကြသူမှာ သန်း ၇၄၀ ခန့်ရှိကြောင်း နိုင်ငံတကာ ရွှေ့ပြောင်းလုပ်သားများဆိုင်ရာ အဖွဲ့အစည်းမှ သိရသည်။

မြန်မာနိုင်ငံတွင် အသက် ၁၅ နှစ်မှ ၆၄ နှစ်အတွင်း အလုပ်လုပ်နိုင်သည့်အရွယ် ၃၂ သန်းခန့် ရှိကြောင်းနှင့် ယင်းအုပ်စုသည် လူဦးရေ စုစုပေါင်း၏ ၆၅ ဒသမ ၆ ရာခိုင်နှုန်းခန့်ရှိကြောင်း သိရသည်။