ယခုနှစ်အတွင်း ရန်ကုန်မြို့ရှိ လူစည်ကားရာနေရာများဖြစ်သည့် မြို့တော်ခန်းမရှေ့၊ တာမွေလမ်းဆုံ၊ မြေနီကုန်းလမ်းဆုံ၊ ဘုရင့်နောင်လမ်းဆုံနှင့် လှည်းတန်းလမ်းဆုံတို့တွင် လေထုညစ်ညမ်းမှုကိုတိုင်းတာရာ ယခင်နှစ်ထက် လေထုညစ်ညမ်းမူနှုန်းမြင့်တက်နေကြောင်း စိမ်းလန်းအမိမြေ ဖွံ့ဖြိုးတိုးတက်ရေးအသင်း၏ သုတေသနပြုချက်အရ သိရသည်။
ရန်ကုန်မြို့တော်ခန်းမရှေ့ တွင်၂၀၁၆-၂၀၁၇ လေထုတိုင်းတာချက်များအရ နိုင်ထရိုဂျင်ဒိုင်အောက်ဆိုဒ် ပါဝင်မူမှာ ပုံမှန်သာရှိပြီး ယခုနှစ်တွင် နိုက်ထရိုဂျင်ဒိုင်အောက်ဆိုဒ် ပါဝင်မှုသည် ၁၀ ဆမြင့်တက်လျက်ရှိကာ သတ် မှတ်စံနှုန်း ကျော်လွန်နေကြောင်း၊ အမှုန်အမွှားပါဝင်မှုသည်လည်း ယခင်နှစ်ထက်မြင့်တက်နေကြောင်း သုတေသနပြုချက်နှင့်ပတ်သက်ပြီး သတင်းထုတ်ပြန်ချက်တွင် ဖော်ပြထားသည်။
“ဒီဒေတာတွေက ပြည်သူတွေ သဘာဝပတ်ဝန်းကျင်ဆိုင်ရာ အသိတွေရအောင် လုပ်တာပါ။ နိုက်ထရိုဂျင်ဒိုင်အောက်ဆိုက်တွေက အမှိုက်သရိုက်တွေကနေရတယ်။ အငွေ့တွေ၊ အနံ့တွေကနေ နိုက်ထရိုဂျင်တွေဖြစ်လာတာတွေ ဖြစ်တယ်။ အမှိုက်မပစ်ရင် နည်းသွားမှာပဲ။ သဘာဝပတ်ဝန်းကျင် ထိန်းသိမ်းကြရ အောင်ဆိုတဲ့အသိကို ပေးချင်တာပါ။ တစ်စုံတစ်ယောက် ကစောင့်ကြည့်ဖို့လိုတယ်။ စောင့်ကြည့်တဲ့အခါမှာ မျက်စိနဲ့မြင်ရ နားနဲ့ကြားရ၊ နှာခေါင်းနဲ့ရှူရလောက်ရုံနဲ့ မလုံလောက်ဘူး။ သိပ္ပံနည်းကျစစ်ဆေးပြီးတော့ အဖြေထုတ်ပေးတာပါ။ ကျွန်တော်တို့ အားနည်းချက်က၂၄ နာရီ ခုနစ်ရက်လုံး တစ်နှစ်လုံး အလုပ်နိုင်ခဲ့ဘူး။ နေရာ ငါးနေရာမှာ ရှစ်နာရီလောက်ပဲ တိုင်းတာနိုင်ခဲ့တယ်။ ရှစ်နာရီမှာ ဒီလောက်အတိုင်းအတာပေါ်နေရင် တောက်လျှောက်လုပ်ရင်လည်းပေါ်နိုင်မှာပဲလို့ ကောက်ချက်စွဲနိုင်ပါတယ်” ဟု စိမ်းလန်းအမိမြေ ဖွံ့ဖြိုးတိုးတက်ရေးအသင်း၏ အကြံပေးအရာရှိ ဒေါက်တာကျော်ငြိမ်းအေးက ပြောကြားသည်။
ထို့ပြင် တာမွေလမ်းဆုံတွင် လေထုတိုင်းတာချက်များအရ နိုက်ထရိုဂျင်ဒိုင်အောက်ဆိုက်၊ ဆာလ်ဖာဒိုင်အောက်ဆိုက်နှင့် အမှုန်အမွှားပါဝင်မှုစသည့် လေအရည်အသွေး သတ်မှတ်ချက်လေးမျိုးစလုံးတွင် ယခင်နှစ်ထက်များပြားကာ သတ်မှတ်စံနှုန်းကျော်လွန်နေကြောင်း၊ မြေနီကုန်းလမ်းဆုံတွင် နိုက်ထရိုဂျင် ဒိုင်အောက်ဆိုက်နှင့် ဆာလ်ဖာဒိုင်အောက်ဆိုက် ပါဝင်မှုသည် ၂၀၁၆ ခုနှစ်တွင်သာ သတ်မှတ်ချက်ထက် ကျော်လွန်နေသော်လည်း ယခုနှစ်တွင် သတ်မှတ်စံနှုန်းသာရှိကြောင်း၊ လှည်းတန်းလမ်းဆုံတွင် အမှုန်အမွှားနှင့် နိုက်ထရိုဂျင်ဒိုင်အောက်ဆိုက်ပါဝင်မှုသည် ယခင်နှစ်များထက်များပြားကာ သတ်မှတ်စံနှုန်း မြင့်တက်လျက်ရှိကြောင်း ထုတ်ပြန်ချက်တွင် ဖော်ပြထားသည်။
လေထုတိုင်းတာချက်ပြုလုပ်လျက်ရှိသည့် ရန်ကုန်မြို့တွင်းရှိ နေရာငါးခုတွင် ဘုရင့်နောင်လမ်းဆုံသည် ယခုနှစ်တွင် နိုက်ထရိုဂျင်ဒိုင်အောက်ဆိုက်၊ ဆာလ်ဖာဒိုင်အောက်ဆိုက်ပါဝင်မှုသည် ယခင်နှစ်က တိုင်းတာခဲ့သည့် အမှုန်အမွှားနှင့် ဆာလ်ဖာဒိုင်အောက်ဆိုက်ပါဝင်မှုမှလွဲပြီး ကျန်လေအရည်အသွေး သတ်မှတ်ချက်သည် သတ်မှတ်စံနှုန်းထက် ကျော်လွန်နေပြီး လေ့လာမှုပြုလုပ်ခဲ့သည့် နေရာများအနက် လေထုညစ်ညမ်းမှုအများဆုံးနေရာဖြစ်ကြောင်း ထုတ်ပြန်ချက်တွင်ဖော်ပြထားသည်။
အဆိုပါလေထုတိုင်းတာမှုအား EPA သတ်မှတ်စံနှုန်းဖြင့်နှိုင်းယှဉ်၍ ထုတ်လုပ်ထားသည့် ပတ်ဝန်းကျင် လေအရည်အသွေးတိုင်း တာစက်ဖြင့် မြေပြင်အထက်လူ၏ အသက်ရှူဇုန်ဖြစ်သည့် အမြင့်သုံးမီတာရှိပတ်ဝန်း ကျင်လေအရည်အသွေးအား အဆက်မပြတ် ၈ နာရီကြာ တိုင်းတာမှုပြုလုပ်ခဲ့သည်ဟု သိရသည်။
