ပြည်သူ့ဘဏ္ဍာများ အလေအလွင့်ဖြစ်မှု ဒုတိယအကြိမ် ကချင်ပြည်နယ် လွှတ်တော် (၁၁) ကြိမ်မြောက်အစည်းအဝေးတွင် ကိုယ်စားလှယ်များက ထောက်ပြဝေဖန်ခဲ့သည်။
ကချင်ပြည်နယ်အစိုးရအဖွဲ့က တင်သွင်းသည့် ၂၀၁၈ ခုနှစ် ကချင်ပြည်နယ်၏ ဘဏ္ဍာငွေ အရအသုံးဆိုင်ရာဥပဒေကြမ်းနှင့် ပတ်သက်၍ လွှတ်တော်ကိုယ်စားလှယ်များက ဆွေးနွေးရာတွင် ထည့်သွင်းဆွေးနွေးခဲ့ခြင်း ဖြစ်သည်။
အင်ဂျန်းယန်မြို့နယ် မဲဆန္ဒနယ် အမှတ် (၂) မှ ပြည်နယ်လွှတ်တော်ကိုယ်စားလှယ် ဒေါ်မရမ်ဂျာဆိုင်းခွန်က “ဘဏ္ဍာငွေအရ အသုံးဆိုင်ရာဥပဒေကြမ်းနဲ့ပတ်သက်ပြီး နောင်မဖြစ်သင့်တာမဖြစ်အောင် တွေ့တာတွေကို ဆွေးနွေးမှာပါ။ လွန်ခဲ့တဲ့နှစ်တွေကလည်း ဘဏ္ဍာငွေတွေ နစ်နာတာတွေ၊ လုပ်ငန်းတွေ အဆင့်မမီတာနဲ့ပတ်သက်ပြီး ကျော်လွန်ခဲ့ကြပြီ။ ကျွန်တော်တို့ မဆွေးနွေးနိုင်တာတွေ ရှိနေပါတယ်။ ဘဏ္ဍာငွေတွေ မသုံးသင့်တာသုံးတာ၊ ထပ်နေတာ၊ ချပေးသလောက် မလုပ်တာတွေ တွေ့နေရပါတယ်။ ကျွန်တော့် မဲဆန္ဒနယ်မှာတွေ့တာကို လွှတ်တော်မှာ တင်ပြခဲ့ပြီးပြီ။ လမ်းတွေမှာ မြောင်းထည့်တာ အရည်အသွေးမီတာတွေ ရေမြောင်းလုပ်တာတွေ အဆင့်မမီတာတွေ တွေ့တယ်။ အခုထိ မပြင်ဘူး။ ငွေထုတ်ဖို့ လက်မှတ်လာထိုးခိုင်းတော့ ကျွန်မတော့ မထိုးနိုင်ဘူး ငြင်းလိုက်ပါတယ်။ ဒါပေမဲ့ ငွေဘယ်လို ထုတ်သွားတယ်ဆိုတာတော့ ကျွန်မ မသိပါဘူး။ အခု မြစ်ကြီးနားက လမ်းမကြီးတွေဟာ ပုံမှာပြထားတဲ့အတိုင်း လမ်းဘောင်တွေ ခုနစ်လက်မပဲလုပ်တာတွေ၊ ဘယ်လောက်ပဲခံမလဲ။ သေချာတယ် ကားသွားရင်ပျက်မှာပဲ။ ကျောက်တွေ စံမမီဘူး။ ဘေးဘောင်တွေ စလုပ်ကတည်းက ပျက်နေတာတွေ တွေ့နေတယ်” ဟု ပြောကြားသည်။
ဖားကန့်မြို့နယ် မဲဆန္ဒနယ်အမှတ် (၁) မှ ဦးဒါရှီလဆိုင်းက “လွန်ခဲ့တဲ့နှစ်တွေနဲ့ မတူဘဲ ဘဏ္ဍာငွေ အရအသုံးဆိုင်ရာဥပဒေကြမ်းကို လွှတ်တော်ကိုယ်စားလှယ်များ ပထမဆုံးဆွေးနွေးခွင့်ရတာကို ကျေးဇူးတင်ပါတယ်။ လုပ်ထုံးလုပ်နည်းနဲ့မတူတာတွေကို တွေ့ရတဲ့အခါမှာ ပြည်သူ့ဘဏ္ဍာငွေ ဆုံးရှုံးနေတာစိုးရိမ်လို့ ဆွေးနွေးတာပါ။ အစိုးရဌာနအဖွဲ့အစည်းများရဲ့ တင်ဒါများနဲ့ဆောင်ရွက်ရာတွင် ဘဏ္ဍာငွေ များဆုံးရှုံးမှုမရှိစေရန်၊ အဂတိလိုက်စားမှု မရှိစေရန်၊ တင်ဒါကို လက်ဝါးကြီးအုပ်မဖြစ်စေဘဲ ပွင့်လင်းမြင်သာမှုရှိရန် ပါရှိပါတယ်။ တချို့လုပ်ငန်းရှင်တွေက လုပ်ထုံးလုပ်နည်းနဲ့ လွဲနေတယ်ဆိုတာကို ကြားနေရပါတယ်။ ဒေသခံလုပ်ငန်းရှင်များ ပေါ်ပေါက်လာဖို့ ပွင့်လင်းမြင်သာစွာ လုပ်ဆောင်ပေးကြဖို့ တိုက်တွန်းလိုပါတယ်” ဟု ပြောကြားသည်။
ပူတာအိုမြို့နယ် မဲဆန္ဒနယ် အမှတ် (၂) မှ ပြည်နယ်လွှတ်တော်ကိုယ်စားလှယ် ဦးဒိန်ခန်ဖုန် (ခ) ဦးခန်လင်ကဘတ်ဂျက်ချထားမှုကို ကြည့်ပါက ဝေးလံခေါင်းဖျားတွင် ဘဏ္ဍာငွေ အလွန်နည်းပါးသည်ကို တွေ့ရကြောင်း၊ မြစ်ချောင်းဖွံ့ဖြိုးတိုးတက်ရေး ၁၅၄၄ ဒသမ ၃၂ သန်းချထားသည်ကို တွေ့ရကြောင်း၊ ပူတာအိုဒေသတွင် ချောင်းထိန်းနံရံကို ယင်းချောင်းမှကျောက်များဖြင့် လုပ်ဆောင်သော်လည်း ကျောက်သယ်ဆောင်ခကို တိုးမြင့်ထားသည်ကိုလည်း တွေ့ရကြောင်း၊ ခရိုင်လေးခုအတွင်း ပူတာအိုခရိုင်မှာ ပြည်နယ်ဘတ်ဂျက်အနည်းငယ်သာရရှိကြောင်း၊ ယခုနှစ်ဘတ်ဂျက်အတွက် ကတ္တရာလမ်းသုံးမိုင်၊ စမ်းရေသွယ်လုပ်ငန်းတစ်ခု၊ ရေတွင်းသုံးတွင်းသာရှိကြောင်း၊ ဘတ်ဂျက် ခြောက်လစာမှာ ကချင်ပြည်နယ် တစ်ခုလုံးအတွက် ကျပ်သန်းပေါင်း ၇၆၄၁၆ ဒသမ ၃၂၃ သန်းဖြစ်သော်လည်း ပူတာအိုခရိုင် ငါးမြို့နယ်အတွင်း ၇၇၁၉ သန်းသာရှိကြောင်း၊ ယင်းဘဏ္ဍာအတွင်းမှ ၄၉၈၆ သန်းမှာ မြစ်ကြီးနား-ဆွမ်ပရာဘွမ်လမ်းအတွက်သာ ဖြစ်ပါကြောင်း၊ ဝေးလံခေါင်ဖျားဒေသများကိုလည်း ရန်ပုံငွေတိုးမြှင့်ချထားနိုင်ရေးဆွေးနွေးလိုပါကြောင်း တင်ပြခဲ့သည်။
လွှတ်တော်ကိုယ်စားလှယ်များ ဆွေးနွေးချက်များနှင့်ပတ်သက်၍ သက်ဆိုင်ရာဝန်ကြီးမှ ရှင်းလင်းရာတွင် ၂၀၁၈ ခုနှစ် ဧပြီ ၁ရက်မှ စက်တင်ဘာ ၃၁ ရက်ထိ ဘဏ္ဍာငွေ အရအသုံးဆိုင်ရာ ဥပဒေကြမ်းကိုသာ ဆွေးနွေးခြင်းသာ ဖြစ်သဖြင့် လွှတ်တော်ကိုယ်စားလှယ်များ၏ ဆွေးနွေးသုံးသပ်ချက်များ မည်သည့်မှတ်ချက်မှ ပေးလိုခြင်းမရှိကြောင်း လွှတ်တော်ဥက္ကဋ္ဌထံ တင်ပြခဲ့သည်။
