အဓိကအားဖြင့် ဗုဒ္ဓဘာသာဖြစ်သည့် ဒါဇင်နှင့်ချီသော ဘင်္ဂလားဒေ့ရှ်လူမျိုးစု၏ မိသားစုများအား နယ်စပ်ကိုဖြတ်ကျော်ကာ ထွက်ပြေးသွားသည့် ဘင်္ဂါလီမွတ်စလင်များ စွန့်ခွာသွားသော နယ်မြေများ၌ ပြန်လည်အခြေချရန် ဖြားယောင်းနေသည်ဟု ဘင်္ဂလားဒေ့ရှ် အာဏာပိုင်များက ဧပြီ ၂ ရက်တွင် ပြောကြားခဲ့သည်။

ဘင်္ဂလားဒေ့ရှ်နိုင်ငံဘက်ရှိ ဝေးလံသီခေါင်သော တောင်ကုန်းနှင့် တောအုပ်ဒေသများမှ မိသားစု ၅၀ ခန့်ကို နယ်မြေနှင့် စားနပ်ရိက္ခာ အခမဲ့ပေးမည်ဟု ဖြားယောင်းခဲ့သောကြောင့် ၎င်းတို့သည် ရခိုင်ပြည်နယ်သို့ ရွှေ့ပြောင်းသွားခဲ့သည်ဟု ဆိုသည်။

ဘင်္ဂလားဒေ့ရှ်မှ တိုင်းရင်းသားလူမျိုးစုများဖြစ်သော မာမားနှင့် မြိုမိသားစုများသည် ဘန်ဒါဘန်းတောင်ကုန်းဒေသရှိ ၎င်းတို့၏ နေအိမ်များကို စွန့်ခွာသွားခဲ့ကြောင်း ဒေသခံကောင်စီဝင် မူအင်းဆွီသဝီးက ပြောကြားခဲ့သည်။

သူက လွန်ခဲ့သည့်လတွင် ဆန်ဂူးတော အုပ်အတွင်းရှိ ရွာများမှ မိသားစု ၂၂ စုသည်လည်း ထွက်ခွာသွားခဲ့သည်ဟု ဆိုသည်။

“အဲဒီမိသားစုတွေဟာ အဓိကအားဖြင့်တော့ ဗုဒ္ဓဘာသာဝင်တွေဖြစ်ပြီး တချို့ကတော့ ခရစ်ယာန်တွေပါ။ မြန်မာနိုင်ငံက သူတို့ကို ရခိုင်ပြည်နယ်ကိုလာဖို့ ဖြားယောင်းပါတယ်။ အဲဒီမှာ သူတို့ကို နယ်မြေ၊ နိုင်ငံသား ဖြစ်ခွင့်နဲ့ စားနပ်ရိက္ခာ ငါးနှစ်စာ အခမဲ့ပေးမယ်လို့ ဆိုပါတယ်” ဟု မူအင်းဆွီသဝီးက ပြောကြားခဲ့သည်။

“သူတို့ဟာ မြန်မာနိုင်ငံကို စွန့်ခွာလာတဲ့ ရိုဟင်ဂျာတွေထားခဲ့တဲ့ နေရာတွေကို ဖြည့်ဖို့သွားကြမှာပါ။ သူတို့က အရမ်းကို ဆင်းရဲပါတယ်” ဟုလည်း ၎င်းက ပြောကြားခဲ့သည်။

သက်ဆိုင်ရာဒေသရှိ နှစ်နိုင်ငံအစိုးရ အရာရှိများက လူမျိုးစု မိသားစုပေါင်း ၅၅ ခုသည် မြန်မာနိုင်ငံသို့ ထွက်ခွာခဲ့ပြီးဖြစ်ကြောင်း အတည်ပြုခဲ့သည်။

ယင်းကဲ့သို့ ထွက်ခွာသွားသော အချို့အုပ်စုများသည် ရခိုင်ပြည်နယ်တွင် မိသားစုများရှိပြီး ယင်းဆွေမျိုးများကို ဘင်္ဂလားဒေ့ရှ်ရှိ လူမျိုးစုများအား ဆွဲဆောင်ရန်အတွက် အသုံးပြုသည်ဟု ဘင်္ဂလားဒေ့ရှ်အစိုးရ ခရိုင်အုပ်ချုပ်ရေးမှူး ဂျာဟန်ဂါအလမ်က ပြောကြားခဲ့သည်။

Ref ; AFP