<

ပြည်ထောင်စု ရွေးကောက်ပွဲကော်မရှင်တွင် ‘ရှစ်လေးလုံးပါတီ’ အမည်ဖြင့်မှတ်ပုံတင်ထားခြင်းကို ‘ရှစ်လေးလုံးပြည်သူ့ပါတီ’ အမည်ဖြင့် ပြောင်းလဲမှတ်ပုံတင်မည်

ပြည်ထောင်စုရွေးကောက်ပွဲကော်မရှင်ထံ ရှစ်လေးလုံးပါတီအမည်ဖြင့် မှတ်ပုံတင်ထားခြင်းကို ရှစ်လေးလုံးပြည်သူ့ပါတီအမည်ဖြင့် နာမည်ပြောင်းလဲမှတ်ပုံတင်မည်ဖြစ်ကြောင်း သိရသည်။

နိုင်ငံရေးပါတီ ဖြစ်မြောက်ရေးကော်မတီ၏  အရေးပေါ်စုံညီအစည်းအဝေးကို ဧပြီ ၁ ရက်က ရန်ကုန်မြို့ မြကျွန်းသာဥယျာဉ်ရှိ ခိုင်လီစားသောက်ဆိုင်တွင် ပြုလုပ်ခဲ့ပြီး အဆိုပါအစည်းအဝေးမှ ပါတီအမည်ကို ပြောင်းလဲမှတ်ပုံတင်ရန် သဘောတူဆုံးဖြတ်ခဲ့ကြခြင်းဖြစ်ကြောင်း သိရသည်။

အဆိုပါအစည်းအဝေးသို့ တိုင်းဒေသကြီးနှင့် ပြည်နယ်အချို့မှ ကိုယ်စားလှယ်များ၊ ဗဟိုဦးဆောင်ကော်မတီအဖွဲ့ဝင်များ၊ ဗဟိုကော်မတီအဖွဲ့ဝင်များနှင့် ပါတီတည်ထောင်လိုသူများ တက်ရောက်ခဲ့ကြရာ အစည်းအဝေးအပြီး သတင်းစာရှင်းလင်းပွဲတွင် ပါတီ၏ အမည်ကို ‘ရှစ်လေးလုံးပါတီ’ မှ  ‘ရှစ်လေးလုံး ပြည်သူ့ပါတီ’ အမည်အဖြစ် ပြောင်းလဲမှတ်ပုံတင်မည်ဖြစ်ကြောင်း နိုင်ငံရေးပါတီ ဖြစ်မြောက်ရေးကော်မတီ ဦးဆောင်အဖွဲ့တာဝန်ခံ ဦးကိုကိုကြီးက ပြောကြားသည်။

ဦးကိုကိုကြီးက “ကျွန်တော်တို့ နာမည်နဲ့ ပတ်သက်ပြီးတော့ ဆုံးဖြတ်တုန်းကလည်း အားလုံးစုံညီဆုံးဖြတ်ခဲ့ခြင်း ဖြစ်တယ်။ ဒါကြောင့်မို့လို့ လက်ရှိ ကော်မရှင်နဲ့ဆွေးနွေးချက်တွေကို ကျွန်တော်တို့ရဲဘော်တွေကို ချပြဆွေးနွေးပြီးတော့ အကြောင်းပြန်ပါ့မယ်။  ၆ ရက်နေ့မှာ ကျွန်တော်တို့ ပြန်ပြီးအကြောင်း ပြန်မယ်လို့ ကတိပေးခဲ့တာ ဖြစ်ပါတယ်။ ဒါကြောင့် ဒီနေ့အားလုံး စုံညီစည်းဝေးတဲ့အခါမှာ အသိပေးတဲ့အချက်က ကော်မရှင်က ကန့်ကွက်တယ်လို့ မပြောဘူး။ ကော်မရှင်က ကန့်ကွက်တယ်မဟုတ်ဘူးဆိုတာကို အသိပေး ကျွန်တော်တို့ကို ပြောပါတယ်။ အကြောင်းခြင်းရာအရ အကြံဥာဏ်ပေးတဲ့ ဝေဖန်ထောက်ပြတဲ့ တစ်ဦးချင်းကို လေးစားတဲ့ အနေနဲ့ ကျွန်တော်တို့အားလုံးစုံညီဆွေးနွေးပြီးတော့ အဆိုပြုတဲ့ နာမည်အသီးသီးအနက် ကနေပြီးတော့ အများဆန္ဒနဲ့ ကျွန်တော်တို့ ဆွေးနွေးဆုံးဖြတ်ခဲ့ပါတယ်။ အဲဒီဆွေးနွေးဆုံးဖြတ်ခဲ့တဲ့ အမည်ကတော့ ရှစ်လေးလုံး ပြည်သူ့ပါတီ ဖြစ်ပါတယ်။ အဲဒီတော့ ဒီနာမည်ကို ကျွန်တော်တို့ ၆ ရက်နေ့မှာ ကော်မရှင်မှာ ဒီနာမည်နဲ့ ကျွန်တော်တို့  ပြုပြင်ပြောင်း လဲလိုက်တဲ့အကြောင်း ဒါဟာ ကော်မရှင်က ပြောလို့ဆိုတာထက် ကော်မရှင်က ပြောတာကလည်း ဥပဒေကြောင်းအရဆိုတာထက် ကျွန်တော်တို့ကို မိသားစုပုံစံမျိုး ဆွေးနွေးတဲ့ဟာကို လေးစားတဲ့အနေနဲ့ရော နောက်ကျွန်တော်တို့ ဆွေးနွေးအကြံပြုကြတဲ့ တစ်ဦးတစ်ယောက်ချင်းရဲ့သဘောထားတွေကိုပါ လေးစားတဲ့အနေနဲ့ ဒီမိုကရေစီ ကျင့်ထုံးကျင့်စဉ်များနဲ့အညီ အများနဲ့ညှိနှိုင်းဆွေးနွေးပြီးတော့ ဒီနာမည်ကို ကျွန်တော်တို့ ဆုံးဖြတ်ခဲ့ပါတယ်။ ဒါကြောင့် လာမယ့် ၆ ရက်နေ့မှာ ရွေးကောက်ပွဲကော်မရှင်နဲ့ တွေ့ဆုံပြီးတော့ ရှစ်လေးလုံး ပြည်သူ့ပါတီအဖြစ်နဲ့ မှတ်ပုံတင်ရရှိဖို့အတွက် ကျွန်တော်တို့ ကြိုးစားသွားမှာ ဖြစ်ပါတယ်” ဟု ပြောကြားသည်။

ဆက်လက်၍ ပြည်ထောင်စုရွေးကောက်ပွဲကော်မရှင်သည် နိုင်ငံရေးပါတီများ မှတ်ပုံတင်ခြင်းဥပဒေပုဒ်မ (၃)အရ မှတ်ပုံတင်ခွင့်ပြုပါက ပုံစံ(ခ)ဖြင့် အကြောင်းပြန်ရမည်ဖြစ်ပြီး အကယ်၍ ဥပဒေနှင့်ညီညွတ်မှုမရှိပါက မှတ်ပုံတင်ခွင့်မပြုကြောင်းကို ပုံစံ (ဂ) ဖြင့် အကြောင်းပြန်ရမည်ဖြစ်ကြောင်း ဦးကိုကိုကြီးက ပြောကြားသည်။

၈၈ မျိုးဆက်ကျောင်းသားခေါင်းဆောင်အချို့နှင့် နိုင်ငံရေးမျိုးဆက်အသီးသီးမှ ပါတီတည်ထောင်လိုသူများ ပူးပေါင်းလုပ်ဆောင်နေသည့် နိုင်ငံရေးပါတီဖြစ်မြောက်ရေးကော်မတီသည် ၂၀၁၇ ဒီဇင်ဘာ ၁၉ ရက်က ‘ရှစ်လေးလုံးပါတီ’ အမည်ဖြင့် ပြည်ထောင်စုရွေး ကောက်ပွဲကော်မရှင်တွင် မှတ်ပုံတင်ထားခဲ့သည်။

ထိုကဲ့သို့ ‘ရှစ်လေးလုံးပါတီ’ အမည်ဖြင့် နိုင်ငံရေးမှတ်ပုံတင်ထားခြင်းအပေါ် ဝေဖန်မှုများရှိနေသည့်အတွက် ပြီးခဲ့သည့်မတ် ၂၆ ရက်က နိုင်ငံရေးပါတီဖြစ်မြောက်ရေး ဦးဆောင်ကော်မတီဝင်များနှင့် ပြည်ထောင်စု ရွေးကောက်ပွဲကော်မရှင်တို့ တွေ့ဆုံ၍ ပါတီအမည်နာမအပေါ် ပြည်ထောင်စုရွေးကောက်ပွဲကော်မရှင်က ကန့်ကွက်ခြင်းမဟုတ်ဘဲ ပြန်လည်စဉ်းစားစေလိုသော သဘောဖြင့် နှစ်ဖက်တွေ့ဆုံဆွေးနွေးခဲ့ကြသည်။

ထို့နောက် နိုင်ငံရေးပါတီဖြစ်မြောက်ရေး ကော်မတီ၏ ဗဟိုကော်မတီဝင်များနှင့် ပါတီဖြစ်မြောက်ရေး တိုင်းဒေသကြီး ပြည်နယ်တာဝန်ခံများ တွေ့ဆုံ၍ အမည်နာမအပေါ် သဘောထားရယူခဲ့ကြပြီး ‘ရှစ်လေးလုံး ပြည်သူ့ပါတီ’ ဟု ပြောင်းလဲမှတ်ပုံတင်မည်ဖြစ်ကြောင်း သိရသည်။

ယခုကဲ့သို့ ရှစ်လေးလုံးပါတီမှ ရှစ်လေးလုံး ပြည်သူ့ပါတီအမည်အဖြစ်သို့  ပြောင်းလဲမှတ်ပုံတင်မည့် ကိစ္စနှင့်ပတ်သက်၍လည်း နိုင်ငံရေးပါတီဖြစ်မြောက်ရေး ဦးဆောင်ကော် မတီဝင်များ လာမည့်ဧပြီ ၆ ရက်တွင် ပြည်ထောင်စုရွေးကောက်ပွဲကော်မရှင်နှင့်  ထပ်မံတွေ့ဆုံကာ တင်ပြမည်ဖြစ်ကြောင် သိရသည်။

April 1, 2018














Copy Protected by Chetan's WP-Copyprotect.