သဘာဝသယံဇာတနှင့် စွမ်းအင်ထုတ်ယူသုံးစွဲခြင်းကို အလေးထား လုပ်ကိုင်ဆောင်ရွက်ခြင်းကြောင့် ပမာဏ ဆက်လက်ကျယ်ပြန့်လာပြီဖြစ်၍ ရင်းနှီးမြှုပ်နှံမှုအသစ်များ ထပ်မံဝင်ရောက် လုပ်ကိုင်ရန် ဒုတိယသမ္မတ တိုက်တွန်း

သဘာဝသယံဇာတနှင့် စွမ်းအင်ထုတ်ယူသုံးစွဲခြင်းကို အလေးထား လုပ်ကိုင်ဆောင်ရွက်ခြင်းကြောင့် ပမာဏ ဆက်လက်ကျယ်ပြန့်လာပြီဖြစ်၍ ရင်းနှီးမြှုပ်နှံမှုအသစ်များ ထပ်မံဝင်ရောက် လုပ်ကိုင်ရန် ဒုတိယသမ္မတ တိုက်တွန်း
Published 1 April 2018

နိုင်ငံတကာမှ လုပ်ငန်းရှင်များ စိတ်ဝင်စားမှု မြင့်တက်နေသည့် သီလဝါအထူးစီးပွားရေးဇုန်ကို တွေ့ရစဉ်

နိုင်ငံခြားတိုက်ရိုက် ရင်းနှီးမြှုပ်နှံမှုများမှ သဘာဝသယံဇာတနှင့် စွမ်းအင်ထုတ်ယူသုံးစွဲခြင်းကို အလေးထား လုပ်ကိုင်ဆောင်ရွက်ခြင်းကြောင့် ပမာဏအရပါ ဆက်လက်ကျယ်ပြန့်လာပြီဖြစ်၍ ရင်းနှီးမြှုပ်နှံမှုအသစ်များ ထပ်မံလာရောက်လုပ်ရန် တိုက်တွန်းပြောကြားခဲ့ကြောင်း မတ် ၂၉ ရက်မှ ၃၁ ရက်အထိ ဗီယက်နမ်နိုင်ငံ ဟနွိုင်းမြို့၌ ကျင်းပသည့် ဆဋ္ဌမအကြိမ်မြောက် Greater Mekong Subregion (GMS) ထိပ်သီးအစည်းအဝေးတွင် ဒုတိယသမ္မတ ဦးဟင်နရီဗန်ထီးယူက ပြောကြားခဲ့ကြောင်း ပြန်ကြားရေးဝန်ကြီးဌာနမှ သိရသည်။

နိုင်ငံခြား တိုက်ရိုက်ရင်းနှီးမြှုပ်နှံမှုအရ သဘာဝသယံဇာတနှင့် စွမ်းအင်ထုတ်ယူသုံးစွဲခြင်းကို အလေးထား လုပ်ဆောင်ခြင်းမှ လုပ်ငန်းကဏ္ဍအရ၊ ပမာဏအရပါ ဆက်လက်ကျယ်ပြန့်လာပြီဖြစ်၍ ရင်းနှီးမြှုပ်နှံမှုအသစ်များကို ကြိုဆိုလျက်ရှိကြောင်း ဒုတိယသမ္မတက ပြောကြားသည်။

ထို့ပြင် ယင်းပြောင်းလဲမှုများကို ဆက်လက်ပံ့ပိုးနိုင်ရန်အတွက် မက်ခရို စီးပွားရေးတည်ငြိမ်စေရေးနှင့် စီးပွားရေးလုပ်ငန်းများအတွက် လုပ်သာကိုင်သာရှိသည့် ဝန်းကျင်ဖြစ်ထွန်းလာရေးကို ဆောင်ရွက်သွားမည်ဖြစ်ကြောင်း ဆက်လက် ပြောကြားသည်။

၁၉၈၈-၁၉၈၉ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ် ဖေဖော်ဝါရီလကုန်အထိ မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၁၁၆၁ ခု ဝင်ရောက်ထားပြီး စုစုပေါင်းရင်းနှီးမြှုပ်နှံမှုပမာဏ အမေရိကန်ဒေါ်လာ ၆၂ ဘီလျံနီးပါးခန့်ရှိကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ၏ ထုတ်ပြန်ချက်စာရင်းများအရ သိရသည်။

အဆိုပါ နိုင်ငံခြားရင်းနှီးမြှုပ်နှံမှု ဝင်ရောက်မှုများအနက် ရေနံနှင့် သဘာဝဓာတ်ငွေ့လုပ်ငန်းတွင် လုပ်ငန်းပေါင်း ၉၅ ခု ဝင်ရောက်ထားပြီး ရင်းနှီးမြှုပ်နှံမှုပမာဏ ၁၈ ဒသမ ၈၈၄ ဘီလျံကျော်ရှိကာ စုစုပေါင်း နိုင်ငံခြားရင်းနှီးမြှုပ်နှံမှုပမာဏ၏ ၃၀ ဒသမ ၅၀ ရာခိုင်နှုန်းဖြင့် အများဆုံး ဝင်ရောက်ထားခြင်းဖြစ်သည်။

ထို့အတူ စွမ်းအင်ကဏ္ဍတွင် လုပ်ငန်းပေါင်း ၁၇ ခု ဝင်ရောက်ထားပြီး ရင်းနှီးမြှုပ်နှံမှုပမာဏ ၁၅ ဘီလျံ အထိရှိကာ စုစုပေါင်း ရင်းနှီးမြှုပ်နှံမှု ပမာဏ၏ ၂၄ ရာခိုင်နှုန်းကျော်ဖြင့် ဒုတိယအများဆုံး ဝင်ရောက်ထားခြင်းဖြစ်ကြောင်း သိရသည်။

၂၀၁၇-၂၀၁၈ ဘဏ္ဍာနှစ်အကုန်အထိ မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု စုစုပေါင်း အမေရိကန်ဒေါ်လာ ၆ ဒသမ ၁၁၅ ဘီလျံကျော် ဝင်ရောက်ထားကြောင်း မတ် ၂၂ ရက်က ရန်ကုန်မြို့ရှိ မြန်မာနိုင်ငံ ရင်းနှီးမြှုပ်နှံမှုကော်မရှင်တွင် ပြုလုပ်သည့် သတင်းစာ ရှင်းလင်းပွဲမှ သိရသည်။

၂၀၃၀ ပြည့်နှစ်အထိ မြန်မာနိုင်ငံတွင်းသို့ နိုင်ငံခြားတိုက်ရိုက် ရင်းနှီးမြှုပ်နှံမှုတန်ဖိုး ဒေါ်လာသန်းထောင်ပေါင်း ၁၄၀ အထိရရှိရန် ရည်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။

“နိုင်ငံခြားရင်းနှီးမြှုပ်နှံမှုများ တိုးမြင့်လာဖို့အတွက် ရည်ရွယ်ပြီး ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနအနေနဲ့ ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) ရဲ့ အကူအညီနဲ့ ကာလရှည်နိုင်ငံခြားတိုက်ရိုက် ရင်းနှီးမြှုပ်နှံမှု တိုးမြှင့်ရေးဆိုင်ရာ စီမံကိန်းရေးဆွဲရာမှာ ၂၀၁၄ ခုနှစ်ကနေ ၂၀၃၀ ပြည့်နှစ်အထိ နိုင်ငံခြားရင်းနှီးမြှုပ်နှံမှုတန်ဖိုး အမေရိကန်ဒေါ်လာ သန်းထောင်ပေါင်း ၁၄၀ ရရှိရန် ရည်မှန်းထားတယ်ဆိုတာ သုံးသပ်တွေ့ရှိရပါတယ်” ဟု ဦးကျော်ဝင်းက ပြောကြားသည်။

လက်ရှိအချိန်တွင်မူ ကာလရှည်နိုင်ငံခြား တိုက်ရိုက်ရင်းနှီးမြှုပ်နှံမှု တိုးမြှင့်ရေးဆိုင်ရာ စီမံကိန်းကို ပြင်ဆင်ပြီး ပြန်လည်သုံးသပ်လျက်ရှိကြောင်း ဦးကျော်ဝင်းက ဆက်လက် ပြောကြားသည်။

ပြည်နယ်နှင့် တိုင်းဒေသကြီးများရှိ ရင်းနှီးမြှုပ်နှံမှုကော်မတီများက ရင်းနှီးမြှုပ်နှံမှုပမာဏ ဒေါ်လာ ငါးသန်း သို့မဟုတ် ကျပ်သန်း ၆၀၀၀ အထိရှိသည့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးလျက်ရှိကြောင်း၊ လက်ရှိအချိန်၌ ပြည်နယ်နှင့်တိုင်းဒေသကြီးများတွင်လည်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) တစ်နည်းအားဖြင့် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ရုံးများကို ဖွင့်လှစ်ထားပြီဖြစ်သည်။

Most Read

Most Recent