ထင်ရှားသည့် လူ့အခွင့်အရေးဆိုင်ရာရှေ့နေ အေမယ်ကလူးနေးက ရိုက်တာသတင်းထောက်နှစ်ဦး၏ ရှေ့နေအဖွဲ့သို့ ပူးပေါင်းပါဝင်

ထင်ရှားသည့် လူ့အခွင့်အရေးဆိုင်ရာရှေ့နေ အေမယ်ကလူးနေးက ရိုက်တာသတင်းထောက်နှစ်ဦး၏ ရှေ့နေအဖွဲ့သို့ ပူးပေါင်းပါဝင်
Published 1 April 2018

ထင်ရှားသည့် လူ့အခွင့်အရေးဆိုင်ရာ အမျိုးသမီးရှေ့နေ အေမယ်ကလူးနေးသည် မြန်မာနိုင်ငံ၌ ဖမ်းဆီးထိန်းသိမ်းခံထားရသော ရိုက်တာသတင်းထောက်နှစ်ဦးကို ကိုယ်စားပြုသည့် ရှေ့နေအဖွဲ့၌ ပူးပေါင်းပါဝင်လိုက်ကြောင်း သိရသည်။

ရိုက်တာသတင်းထောက်နှစ်ဦးဖြစ်သော ဝလုံး (၃၁ နှစ်) နှင့် ကျော်စိုးဦး (၂၈ နှစ်) တို့အား ကိုလိုနီခေတ်ကဥပဒေဖြစ်သော အစိုးရလျှို့ဝှက်ချက်အက်ဥပဒေဖြင့် တရားစွဲဆိုသင့် မသင့် ဆုံးဖြတ်ရန် ရန်ကုန်မြို့ရှိ တရားရုံးတစ်ခုက ဇန်နဝါရီလကတည်းက အကြိုကြားနာစစ်ဆေးမှုများကို ပြုလုပ်ခဲ့သည်။ အဆိုပါဥပဒေအရ ပြစ်မှုထင်ရှားပါက အမြင့်ဆုံးပြစ်ဒဏ်အဖြစ် ထောင်ဒဏ် ၁၄ နှစ်အထိ အပြစ်ပေးနိုင်သည်။

အစိုးရ၏ လျှို့ဝှက်စာရွက်စာတမ်းများကို လက်ဝယ်ရှိကြောင်း စွပ်စွဲခံရသည့် သတင်းထောက်များကို ချက်ချင်းလွှတ်ပေးသင့်သည်ဟု ကလူးနေးက ပြောကြားခဲ့သည်။

သြဂုတ်လတွင် စတင်သည့် တပ်မတော်စစ်ဆင်ရေးတစ်ရပ်အတွင်း ရခိုင်ပြည်နယ်တွင် မွတ်စလင် ၁၀ ဦးကို သတ်ဖြတ်ခဲ့မှုအား ရိုက်တာသတင်းဌာန၏ စုံစမ်းမှု၌ ၎င်းတို့နှစ်ဦးက ပါဝင်လုပ်ဆောင်ခဲ့ခြင်းဖြစ်သည်။

သတင်းထောက်နှစ်ဦး၏ ရှေ့နေများက ၎င်းတို့နှစ်ဦးအား တရားစွဲဆိုရန် လုံလောက်သော အထောက်အထားများမရှိဟု ပြောကြားလျက် အမှုကိုပယ်ချရန် တရားရုံးသို့ မတ် ၂၈ ရက်တွင် တောင်းဆိုခဲ့သည်။

နာမည်ကြီး ဟောလိဝုဒ်ရုပ်ရှင်မင်းသား ဂျော့ကလူးနေး၏ ဇနီးဖြစ်သူ အေမယ်ကလူးနေးက “ဝလုံးနဲ့ ကျော်စိုးဦးတို့နှစ်ဦးဟာ သတင်းအစီရင်ခံမှုကြောင့် တရားစွဲဆိုခံရတာပါပဲ။ ကျွန်မအမှုတွဲကို သုံးသပ်ပြီးပါပြီ။ ဂျာနယ်လစ်နှစ်ဦးမှာ အပြစ်မရှိဘဲ ချက်ချင်းလွှတ်ပေးသင့်တယ်ဆိုတာ သံသယအဆင့်ကို ကျော်လွန်လောက်အောင် ရှင်းနေတာပါပဲ။ ဒီအမှုရဲ့ ရလဒ်က မြန်မာနိုင်ငံရဲ့ တရားဥပဒေစိုးမိုးရေးကို ကျင့်သုံးမှုအကြောင်းနဲ့ လွတ်လပ်စွာ ပြောဆိုခွင့်အကြောင်း ကျွန်မတို့ကို အများကြီးပြောပြပါလိမ့်မယ်” ဟု သူ၏ ရုံးမှထုတ်ပြန်ချက်တစ်ရပ်တွင် ပြောကြားထားသည်။