EU မှ သင်ကြားပေးသည့် ဆိုက်ဘာသင်တန်းကို တက်ရောက်နေသည့် မြန်မာနိုင်ငံ ရဲတပ်ဖွဲ့ဝင်များကို တွေ့ရစဉ် (Photo: EU)
အွန်လိုင်းပေါ်၌ ကျူးလွန်သည့် ဆိုက်ဘာပြစ်မှုများကို တိုက်ဖျက်ရန် မြန်မာနိုင်ငံရဲတပ်ဖွဲ့အား အီးယူကျွမ်းကျင်ပညာရှင်များမှ သင်ကြားမှုများ ပြုလုပ်ပေးနေကြောင်း မြန်မာနိုင်ငံဆိုင်ရာ အီးယူသံရုံး၏ သတင်းထုတ်ပြန်ချက်အရ သိရသည်။
ထုတ်ပြန်ချက်တွင် ကွန်ပျူတာအချက်အလက်များအား နှောင့်ယှက်တိုက်ခိုက်ခြင်း၊ အချက်အလက်များပေါက်ကြားခြင်း၊ အွန်လိုင်းလိမ်လည်မှု၊ အမျိုးအမည်ခိုးယူမှု၊ လူမျိုးရေးမုန်းတီးစေရန် လှုံ့ဆော်ခြင်း (သို့) အကြမ်းဖက်တိုက်ခိုက်မှု စသည့်အွန်လိုင်းပေါ်တွင် ကျူးလွန်သည့် ဆိုက်ဘာပြစ်မှုများမှာ ကမ္ဘာတစ်ဝန်း မြင့်တက်လျက်ရှိကြောင်း၊ ၎င်းဆိုက်ဘာပြစ်မှုများမှာ အသုံးပြုသူသာမက၊ ပုဂ္ဂလိကလုပ်ငန်းများနှင့် အစိုးရများကိုပါ ပြင်းပြင်းထန်ထန် ထိခိုက်နစ်နာစေကြောင်း၊ ကွန်ရက်ပေါ်ရှိ ရာဇဝတ်လုပ်ငန်းများမှာ နိုင်ငံနယ်ခြားမရှိ ကျူးလွန်သည့်အတွက် တရားဥပဒေစိုးမိုးရေးအဖွဲ့အစည်းများအနေဖြင့် ၎င်းဆိုက်ဘာပြစ်မှုများကို ထိထိရောက်ရောက်တိုက်ဖျက်ရာ၌ နယ်ခြားဖြတ်ကျော်၍ ကမ္ဘာတစ်ဝန်း ပူးပေါင်းဆောင်ရွက်မှုမှာ အဓိကကျလျက်ရှိကြောင်း ဖော်ပြထားသည်။
ထို့ကြောင့် မြန်မာနိုင်ငံရဲတပ်ဖွဲ့ ပြုပြင်ပြောင်းလဲရေးနှင့် ရဲတပ်ဖွဲ့ဝင်များအား စွမ်းဆောင်ရည်မြှင့်တင်ပေးခြင်းကို ပံ့ပိုးပေးလျက်ရှိသည့် MYPOL စီမံကိန်းသည့် ရဲတပ်ဖွဲ့ဝင်များအနေဖြင့် ဆိုက်ဘာကွန်ရက်လုံခြုံရေးဆိုင်ရာ နောက်ဆုံးပေါ် ခြိမ်းခြောက်မှုများအကြောင်း စတင်သိရှိနိုင်စေရန်၊ လက်ရှိအချိန်တွင် ဆိုက်ဘာလုံခြုံရေးသင်တန်းဖြင့် လေ့ကျင့်သင်ကြားပေးလျက်ရှိကြောင်း၊ ၎င်း MYPOL သင်တန်းသည် ပါဝင်တက်ရောက်သူများအနေဖြင့် အခြေခံခြိမ်းခြောက်မှုများ ဖော်ထုတ်ကာ အခြေခံဆိုက်ဘာ ခြိမ်းခြောက်မှုနှင့်စပ်လျဉ်း၍ စီမံခန့်ခွဲမှုအပေါ်လေ့လာခြင်းဖြင့် အမှောင်ကွန်ရက်အကြောင်း ပိုမိုနားလည်သဘောပေါက်လာစေမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
ယင်းအပြင် ဒီမိုကရေစီလူ့ဘောင်အဖွဲ့ အစည်းသို့ မြန်မာနိုင်ငံအနေဖြင့် အသွင်ကူးပြောင်းရာတွင် ရဲတပ်ဖွဲ့ပြုပြင်ပြောင်းလဲရေးမှာ လွန်စွာအရေးပါသည့် ခြေလှမ်းတစ်ရပ်ဖြစ်ကြောင်း၊ MYPOL စီမံကိန်းသည် ဥရောပသမဂ္ဂမှ ရန်ပုံငွေပံ့ပိုးကာ၊ နိုင်ငံတကာ အကောင်းဆုံးအလေ့အထများနှင့် လူ့အခွင့်အရေး လေးစားလိုက်နာမှုပေါ် အခြေခံ၍ ပြည်သူလူထုအပေါ် ကာကွယ်စောင့်ရှောက်ခြင်းရှိသည့် မြန်ဆန်ထိရောက်မှုကာ တာဝန်ခံမှုရှိသည့် ရဲတပ်ဖွဲ့ဝန်ဆောင်မှုမျိုး ဖြစ်ပေါ်လာစေရန် ပံ့ပိုးပေးထားသည့် ငါးနှစ်တာစီမံကိန်းတစ်ခုဖြစ်ကြောင်း၊ ရပ်ရွာအခြေပြု ရဲလုပ်ငန်းနှင့် ရာဇဝတ်မှုစုံစမ်းစစ်ဆေးခြင်းတို့တွင် ရဲတပ်ဖွဲ့ဝင်များအား သင်တန်းများပိုမိုပေးခြင်းဖြင့် မတူညီသော လူ့အသိုင်းအဝိုင်းများအကြား ယုံကြည်မှုတည်ဆောက်ပေးခြင်းများ စီမံကိန်းတွင်ပါဝင်ကြောင်း သိရသည်။
MYPOL စီမံကိန်းအား ယူရိုငွေ သန်း ၃၀ (မြန်မာကျပ်ငွေ ၄၉.၆ဘီလီယံ) ဖြင့် ၂၀၁၆ ခုနှစ် ဒီဇင်ဘာလတွင် စတင်အကောင်အထည်ဖော်ခဲ့ခြင်းဖြစ်ကြောင်း၊ ၎င်းစီမံကိန်းမှာ မြန်မာ့ရဲတပ်ဖွဲ့၊ ပြည်ထဲရေးဝန်ကြီးဌာန၊ လွှတ်တော်၊ ရှေ့နေချုပ်ရုံး၊ အရပ်ဘက်လူမှုအဖွဲ့အစည်းများ၊ မီဒီယာစသည်တို့နှင့် နီးကပ်စွာပူးပေါင်းကာ အကောင်အထည်ဖော်လျက်ရှိကြောင်း၊ MYPOL စီမံကိန်းမှအဆုံးတွင် အကျိုးခံစားရမည့်သူများမှာ တုံ့ပြန်မှုပိုမိုပေး၍ လေးစားဖွယ်ကောင်းကာ လုပ်ငန်းပိုမိုကျွမ်းကျင်မှုရှိသည့် ရဲဝန်ဆောင်မှုမှ အကျိုးခံစားရမည့် မြန်မာ့ပြည်သူလူထုပင်ဖြစ်ကြောင်း၊ ရဲတပ်ဖွဲ့ပြုပြင်ပြောင်းလဲရေးအောင်မြင်ရန် အချိန်ယူရမည်ဖြစ်ပြီး နေ့ချင်းညချင်း အောင်မြင်မှုမရနိုင်ကြောင်း၊ မြန်မာနိုင်ငံအတွက် အင်အားအသုံးပြုသည့် ရဲအင်အားဆိုသည်ထက် ပြည်သူလူထုအတွက် ဝန်ဆောင်မှုပေးသည့် ရဲပုံစံမျိုး တည်ဆောက်ပေးနိုင်ရန် MYPOL စီမံကိန်းမှ မြန်မာအစိုးရအား တစ်ဆင့်ချင်း ပံ့ပိုးကူညီပေးသွားရန် ရည်ရွယ်ထားကြောင်း ထုတ်ပြန်ချက်တွင် ဖော်ပြထားသည်။
