<

လက်ရှိတွင် တစ်နိုင်ငံလုံးအတိုင်းအတာဖြင့် အသက် ၉၀ နှင့်အထက် ဘိုးဘွားများကို လူမှုရေးပင်စင် ထောက်ပံ့ပေးလျက်ရှိပြီး နောင်နှစ်များတွင် အသက် ၈၅ နှစ်နှင့်အထက် ဘိုးဘွားများကိုပါ ထောက်ပံ့ပေးရန် စီစဉ်

လက်ရှိအချိန်တွင် တစ်နိုင်ငံလုံးအတိုင်းအတာဖြင့် အသက် ၉၀ နှစ်နှင့်အထက် ဘိုးဘွားများကို လူမှုရေးပင်စင်ထောက်ပံ့ပေးလျက်ရှိပြီး နောင်နှစ်များတွင် အသက် ၈၅ နှစ်နှင့်အထက် ဘိုးဘွားများကို ထောက်ပံ့ပေးရန် စီစဉ်ထားကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဝင်းမြတ်အေးက ပြောကြားသည်။

သက်ကြီးရွယ်အိုများဆိုင်ရာ နည်းဥပဒေ (မူကြမ်း) ရေးဆွဲနိုင်ရေးအတွက် လုပ်ငန်းအဖွဲ့ဝင်များဖြင့် အစည်းအဝေးနှစ်ကြိမ် ကျင်းပခဲ့ပြီး အကြံပြုချက်များရယူခဲ့ကြောင်း၊ ထို့ပြင် သက်ကြီးရွယ်အို သက်သေခံကတ်ပြားရရှိနိုင်ရေး၊ ရန်ပုံငွေထူထောင်ရေးတို့အတွက် တာဝန်ရှိသူများအားလုံးက ပူးပေါင်းပါဝင်ဆောင်ရွက်ရန် လိုအပ်ကြောင်း၊ နည်းဥပဒေ ထွက်ရှိခြင်းမရှိသေးသော်လည်း လက်ရှိတွင် တစ်နိုင်ငံလုံးအတိုင်းအတာဖြင့် အသက် ၉၀ နှစ်နှင့်အထက် ဘိုးဘွားများကို လူမှုရေးပင်စင် ထောက်ပံ့ပေးလျက်ရှိကြောင်း၊ ဆက်လက်ပြီး နိုင်ငံတော်၏ ဘတ်ဂျက်ရန်ပုံငွေပေါ်မူတည်ပြီး နောင်နှစ်များတွင် အသက် ၈၅ နှစ်နှင့်အထက် ဘိုးဘွားများကို ထောက်ပံ့ရန် စီစဉ်ထားကြောင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဝင်းမြတ်အေးက ပြောကြားခဲ့သည်။

မြန်မာနိုင်ငံ သက်ကြီးရွယ်အိုများဆိုင်ရာကော်မတီ၏ ဒုတိယအကြိမ်အစည်းအဝေးကို မတ်၂၉ ရက်က ကျင်းပခဲ့ပြီး သက်ကြီးရွယ်အိုများဆိုင်ရာ နည်းဥပဒေမူကြမ်းနှင့် ရှေ့လုပ်ငန်းစဉ်များ ဆွေးနွေးခဲ့ကြောင်း သိရသည်။

အဆိုပါအစည်းအဝေးတွင် မြန်မာနိုင်ငံ သက်ကြီးရွယ်အိုများဆိုင်ရာကော်မတီ အတွင်းရေးမှူး၊ လူမှုဝန်ထမ်းဦးစီးဌာန ညွှန်ကြားရေးမှူးချုပ် ဒေါက်တာစန်းစန်းအေးက သက်ကြီးရွယ်အိုများဆိုင်ရာ နည်းဥပဒေမူကြမ်းနှင့် ရှေ့လုပ်ငန်းစဉ်များအား ဆွေးနွေးခဲ့ပြီး ဥပဒေအကြံပေးဦးကျော်စိန်က နည်းဥပဒေမူကြမ်းတွင်ပါရှိသည့် ဥပဒေရေးရာကိစ္စရပ်များကို ဆွေးနွေးခဲ့သည်။

ထို့နောက် မြန်မာနိုင်ငံ သက်ကြီးရွယ်အိုများဆိုင်ရာ ကော်မတီဝင်များက နည်းဥပဒေတွင်ပါဝင်သည့် သက်ကြီးရွယ်အိုများ ရသင့်ရထိုက်သော အခွင့်အရေးများနှင့် ၀န်ကြီးဌာနများက ဆောင်ရွက်နိုင်မည့်အခြေအနေများကို ဆွေးနွေးခဲ့ကြပြီး နည်းဥပဒေတွင် ထည့်သွင်းရေးဆွဲမည့် ကျန်းမာရေးနှင့် လူမှုရေးအထောက်အပံ့ပေးနိုင်မည့် အချက်များကို အတည်ပြုဆုံးဖြတ်ခဲ့ကြောင်း သိရသည်။

မြန်မာနိုင်ငံတွင် အခြားနိုင်ငံများကဲ့သို့ သက်ကြီးရွယ်အို အလွန်အမင်းများပြားသည့်ပြဿနာကို ရင်မဆိုင်ရသေးသော်လည်း နောင်လာမည့် ဆယ်စုနှစ်များတွင် ယင်းပြဿနာကို ရင်ဆိုင်ရမည်ဖြစ်ကြောင်း၊ တိုးပွားလာမည့် သက်ကြီးရွယ်အိုများအားလုံး ဂုဏ်သိက္ခာရှိရှိနှင့်ကျန်းမာပြီး လုံခြုံစိတ်ချရသည့်ဘ၀မျိုးဖြင့် လျှောက်လှမ်းနိုင်မည့်အစီအစဉ်ကို လူမှုဝန်ထမ်းဦးစီးဌာနမှ သက်ကြီးရွယ်အိုများအတွက် အဓိကလုပ်ငန်းစဉ်တစ်ရပ်အဖြစ် ဆောင်ရွက်လျက်ရှိသည်။

အနာဂတ်တွင် သက်ကြီးရွယ်အို စောင့်ရှောက်ရေးလုပ်ငန်းသည် သမားရိုးကျဘိုးဘွားရိပ်သာများ ထူထောင်စောင့်ရှောက်သည့် လုပ်ငန်းစနစ်တစ်ခုတည်းနှင့် လုံလောက်မှုမရှိသည့်အတွက် အခြားနည်းစနစ်များကိုလည်း ရှာဖွေဆောင်ရွက်လျက်ရှိကြောင်း သိရသည်။

March 31, 2018














Copy Protected by Chetan's WP-Copyprotect.