မြေလွတ်၊ မြေလပ်နှင့်မြေရိုင်းများ လုပ်ပိုင်ခွင့်နှင့်အသုံးပြုခွင့်ကို ရင်းနှီးမြှုပ်နှံသူလုပ်ငန်းရှင်ကြီးများသာမက တောင်သူများအပါအဝင် စိုက်ပျိုးလုပ်ကိုင်လိုသူများအား လုပ်ကိုင်ခွင့်ပြုမည်ဖြစ်ကြောင်း စိုက်ပျိုးရေး၊မွေး မြူရေးနှင့်ဆည်မြောင်းဝန်ကြီးဌာန ပြည် ထောင်စုဝန်ကြီးဒေါက်တာအောင်သူက ပြောကြားသည်။
မြေလွတ်၊ မြေလပ်နှင့် မြေရိုင်းများ လုပ်ပိုင်ခွင့်နှင့်အသုံးပြုခွင့်ကို ရင်းနှီးမြှုပ်နှံသူ လုပ်ငန်းရှင်ကြီးများသာမက တောင်သူများ အပါအဝင် စိုက်ပျိုးလုပ်ကိုင်လိုသူ ပြည်သူတိုင်း လျောက်ထားနိုင်ကြောင်း၊ တိုင်းဒေသကြီး၊ ပြည်နယ်အဆင့်တွင် တစ်ကြိမ်လျှင် အများဆုံး ၁၀ ဧကအထိ စတင်လျှောက်ထားလုပ်ကိုင်နိုင်ပြီး မိမိတို့၏ အကျိုးစီးပွားဖြစ်ထွန်းမှုနှင့် လုပ်ကိုင်နိုင်မှုစွမ်းအားပေါ်အခြေခံ၍ တိုးမြှင့်လျောက်ထားလုပ်ကိုင်နိုင်ကြောင်း ပြည်ထောင်စုဝန်ကြီး ဒေါက်တာအောင်သူက ပြောကြားသည်။
မတ် ၂၉ ရက်က ပြည်ထောင်စုဝန်ကြီး ရုံးအစည်းအဝေးခန်းမ၌ ကျင်းပသည့် မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးဗဟိုကော်မတီ၏ (၁၁) ကြိမ်မြောက် လုပ်ငန်း ညှိနှိုင်းအစည်းအဝေးတွင် ဗဟိုကော်မတီ ဥက္ကဋ္ဌ၊ ပြည်ထောင်စုဝန်ကြီးက အထက်ပါအတိုင်း ပြောကြားခဲ့ခြင်းဖြစ်သည်။
အဆိုပါအစည်းအဝေးသို့ မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးဗဟိုကော်မတီ ဗဟိုဥက္ကဋ္ဌ၊ ပြည်ထောင်စုဝန်ကြီးဒေါက်တာအောင်သူ၊ ဒုတိယဥက္ကဋ္ဌ ဦးလှကျော်နှင့် ကော်မတီဝင်များ တက်ရောက်ကြပြီး တိုင်းဒေသကြီး / ပြည်နယ်အသီးသီးမှ တင်ပြလာသည့် မြေလွတ်၊ မြေလပ်၊ မြေရိုင်းများ အသုံး ပြုခွင့်၊ လုပ်ပိုင်ခွင့်၊ ပြန်လည်စိစစ်ရန်ကိစ္စရပ်များကို ဆွေးနွေးခဲ့ကြောင်း သိရသည်။
ထို့ပြင် ပြန်လည်စိစစ်ရန် အကြောင်းကြားထားခြင်းအပေါ်တင်ပြလာသည့် ကိစ္စရပ်များ၊ မြေလွတ်၊ မြေလပ်နှင့် မြေရိုင်းများတွင် လုပ်ပိုင်ခွင့်၊ အသုံးပြုခွင့်လျှောက်ထားခြင်းနှင့်ကန့်ကွက်လွှာ တင်သွင်းခြင်းကိစ္စ ရပ်များ ၊ မြေလွတ်၊ မြေလပ်နှင့် မြေရိုင်းများပြန်လည်အပ်နှံခွင့်ပြုရေးနှင့် လုပ်ပိုင်ခွင့်၊ အသုံးပြုခွင့် ချထားခဲ့သည့် ဧရိယာများတွင် သီးနှံပြောင်းလဲစိုက်ပျိုးခွင့် လျှောက်ထားခြင်း ကိစ္စရပ်များ၊ ခွင့်ပြုမိန့်ရ မြေလွတ်၊ မြေရိုင်းများကို လယ်ယာမြေအဖြစ် ပြောင်းလဲအသုံးပြုရေးနှင့် ခွင့်ပြုမိန့်မိတ္တူ ပြန်လည်ထုတ်ခွင့်ပြု ရန် ကိစ္စရပ်များအား ဆွေးနွေးခဲ့ကြောင်း သိရသည်။
မြန်မာနိုင်ငံသည် စိုက်ပျိုးရေးနိုင်ငံဖြစ်ပြီး တစ်နိုင်ငံလုံးတွင် စိုက်ပျိုးနိုင်သည့်လယ် ယာမြေများစွာ ရှိသော်လည်း အချို့အချို့သော အကြောင်းတရားများကြောင့် လယ်ယာမြေများမှာ နည်းမျိုးစုံဖြင့် အခြားနည်းလမ်းဖြင့် အသုံးပြုခွင့် ပြုလိုက်ရသည့်လယ်မြေများစွာ ရှိကြောင်း၊ ကျန်ရှိနေသည့် လယ်မြေများမှာမူ အနီးအဝေးနှင့်အနေအထား တည်ရှိမှုအပေါ် မူတည်ပြီး တောင်သူများ၏ လက်ဝယ်တွင် ကျန်ရှိနေခြင်းဖြစ်ကြောင်း စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးဦးကျော်ဝင်းက ပြောကြားထားသည်။
