မတ် ၂၉ ရက်က ရွှေပြည့်စုံဈေးရှိ ဆေးဆိုင်များအား အစားအသောက်နှင့် ဆေးဝါးကွပ်ကဲရေးဌာနက ရှောင်တခင် စစ်ဆေးနေစဉ်
ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်၊ ရွှေပြည့်စုံဈေးရှိ ဆေးဝါးသိုလှောင်ရုံနှစ်ရုံမှ တရားမဝင် တင်သွင်းလာပြီး မြန်မာနိုင်ငံတွင် ဆေးဝါးမှတ်ပုံတင်ထားခြင်း မရှိသော အရည်အသွေး အာမခံချက်မရှိသည့် ဆေးဝါးများ (လိုင်းဆေး) များ၊ အထူးထိန်းချုပ်ဆေးဝါးများကို သိမ်းဆည်းရမိ၍ ဆေးဆိုင်ပိုင်ရှင်အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေ၊ အမျိုးသားဆေးဝါး ဥပဒေများဖြင့် တရားစွဲဆို အရေးယူသွားမည်ဖြစ်ကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ သိရသည်။
“ရွှေပြည့်စုံဈေးက ဆေးဆိုင်တွေကို ရှောင်တခင် အကြိမ်ကြိမ် စစ်ဆေးပါတယ်။ အခု ၂၉ ရက်နေ့မှာ မိတာကတော့ ဆေးဆိုင် တစ်ဆိုင်ရဲ့ ဆေးဝါးသိုလှောင်ရုံမှာ မိတာပါ။ သူကဆေးဆိုင်မှာ ဒီဆေးတွေ မထားဘူး။ ဆေးဂိုထောင်ရုံထဲမှာ ဆေးတွေကို သိမ်းထားတာ။ ကျွန်တော်တို့က သူတို့သိမ်းထားတဲ့ ဆေးဂိုထောင်ကို ဖွင့်ခိုင်းပြီး စစ်တော့မှ တွေ့တာပါ။ အထူးထိန်းချုပ်ဆေးဝါး ရောင်းချခွင့်လိုင်စင်ရှိမှ ရောင်းချခွင့်ရမယ့် ဆေးဝါးတွေကို လိုင်စင်မရှိဘဲရောင်းတယ်။ သိုလှောင်တယ်။ မှတ်ပုံမတင်ဘဲ ရောင်းတယ်။ ပမာဏအားဖြင့် တော်တော်များပါတယ်။ အခုဆေးဆိုင်ပိုင်ရှင်ကို ဆေးဝါးဥပဒေ၊ မူးယစ်ဥပဒေတွေနဲ့ တရားစွဲဆို အရေးယူမယ်။ ကျွန်တော်တို့ အစားအသောက် ဆေးဝါးကော်မတီကရော မြန်မာနိုင်ငံ ရဲတပ်ဖွဲ့ကရော နှစ်ခုလုံးက အရေးယူမှာပါ။ ရဲတပ်ဖွဲ့ကတော့ အထူးထိန်းချုပ်ဆေးဝါး ရောင်းချတဲ့အတွက် အရေးယူမှာ ဖြစ်ပါတယ်” ဟု မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာန၊ ရန်ကုန်ရုံးမှ တာဝန်ခံ ဒေါက်တာမင်းဝံက ပြောကြားသည်။
သတင်းပေးချက်အရ မတ် ၂၉ ရက်က အစားအသောက်နှင့် ဆေးဝါးကွပ်ကဲရေး ဦးစီးဌာန၊ ရန်ကုန်ရုံးခွဲ၊ ရန်ကုန်အရှေ့ပိုင်းခရိုင် မူးယစ်အထူးတပ်ဖွဲ့မှ တပ်ဖွဲ့ဝင်များ၊ မြို့နယ်အစားအသောက်နှင့် ဆေးဝါးကြီး ကြပ်ကွပ်ကဲရေး ကော်မတီဝင်များဖြစ်သည့် အထွေထွေအုပ်ချုပ်ရေး၊ ပြည်သူ့ကျန်းမာရေး ဦးစီးဌာန၊ မြန်မာနိုင်ငံရဲတပ်ဖွဲ့၊ ရန်ကုန်မြို့တော် စည်ပင်သာယာရေး ကော်မတီအဖွဲ့များနှင့်အတူ ဆေးဝါးလက်ကား ရောင်းချလျက်ရှိသော ရွှေပြည့်စုံဈေးရှိ ဆေးဆိုင်များနှင့် ဆေးသိုလှောင်ရုံများအား ရှောင်တခင် ဝင်ရောက် စစ်ဆေးခဲ့ကြောင်းနှင့် ဆေးဆိုင်အချို့ရှိ ဆေးသိုလှောင်ရုံများတွင် တရားမဝင် တင်သွင်းလာပြီး မြန်မာနိုင်ငံတွင် ဆေးဝါးမှတ်ပုံတင်ထားခြင်း မရှိသော အရည်အသွေး အာမခံချက်မရှိသည့် ဆေးဝါးများ၊ အထူးထိန်းချုပ်ဆေးဝါးများကို သိမ်းဆည်းရမိခဲ့ကြောင်း သိရသည်။
ရန်ကုန်တိုင်းဒေသကြီးအတွင်း ခရိုင်လေးခရိုင်ရှိ လက်လီ၊ လက်ကား ဆေးအရောင်းဆိုင်များရှိ ဆေးဝါးများ၏ အရည်အသွေး အာနိသင်နှင့် ပတ်သက်၍ ဓာတ်ခွဲစမ်းသပ် စစ်ဆေးရန် အစားအသောက်နှင့် ဆေးဝါးကွပ်ကဲရေး ဦးစီးဌာနက ဈေးကွက်နမူနာ ကောက်ယူနေပြီး သတ်မှတ်ချက်နှင့် ကိုက်ညီမှုမရှိသည့် ဆေးဆိုင်များကို အမျိုးသား ဆေးဝါးဥပဒေအရ အရေးယူသွားမည် ဖြစ်ကြောင်းနှင့် ဖေဖော်ဝါရီလ ပထမပတ် အတွင်းက မင်္ဂလာတောင်ညွန့်မြို့နယ်၊ ရွှေမင်္ဂလာဈေး၊ ရွှေပြည့်စုံဈေး၊ မင်္ဂလာမွန်ဈေးရှိ ဆေးဝါး လက်လီလက်ကား အရောင်းဆိုင်များတွင် လိုင်းဆေး၊ သက်တမ်းလွန်ဆေးဝါးများ သိုလှောင်ရောင်းချမှု မရှိစေရေးနှင့် ဆေးလက်ကား ရောင်းချခွင့် လိုင်စင်လျှောက်ထားရန် အသိပေးထားကြောင်း မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနမှ သိရသည်။
အမျိုးသား ဆေးဝါးဥပဒေအရ မှတ်ပုံတင်ထားခြင်းမရှိသော ဆေးဝါး၊ မှတ်ပုံတင် ခေတ္တရုပ်သိမ်းခြင်း၊ ပယ်ဖျက်ခြင်း ပြုလုပ်ထားသော ဆေးဝါး၊ ဆေးဝါးအတု၊ စံမညီ ဆေးဝါး၊ ပျက်စီးဆေးဝါး၊ ရောနှောဆေးဝါးများ၊ ဘေးဥပါဒ် ဖြစ်စေနိုင်သည့် ပစ္စည်းများဖြင့် ဖော်စပ်ထုတ်လုပ်ထားသော ဆေးဝါး၊ ကျန်းမာရေး ဝန်ကြီးဌာနက သုံးစွဲရန်မသင့်ဟု အမိန့်ကြေညာစာ ထုတ်ပြန်၍ သတ်မှတ်ထားသော ဘေးအန္တရာယ်ရှိသည့် ဆေးဝါးများကို ထုတ်လုပ်ခြင်း၊ ပြည်တွင်းသို့ တင်သွင်းခြင်း၊ ပြည်ပသို့ တင်ပို့ခြင်း၊ သိုလှောင်ဖြန့်ဖြူး ရောင်းချခြင်းများ ပြုလုပ်ခဲ့ပါက ယင်းဥပဒေဖြင့် အရေးယူနိုင်ကြောင်း သိရသည်။
ဥပဒေပါ ပြဌာန်းချက် တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှား စီရင်ခံရပါက ငွေဒဏ် အနည်းဆုံး ကျပ် ၅၀၀၀၀ မှ အများဆုံးကျပ် ၅၀၀၀၀၀ အထိဖြစ်စေ၊ ထောင်ဒဏ်ခုနစ်နှစ် အထိဖြစ်စေ၊ ဒဏ်နှစ်ရပ်လုံးဖြစ်စေ ကျခံနိုင်ကြောင်း ဖော်ပြထားသည်။
