<

ရန်ကုန်မြို့အတွင်း ဘတ်စ်ကား ၅၀၀၀ ခန့်ပြေးဆွဲနေပြီး ယာဉ်လိုင်းအသစ်များ ထပ်မံတိုးမြှင့်ရန် ဆောင်ရွက်နေကြောင်း တိုင်းဒေသကြီးဝန်ကြီးချုပ် ပြောကြား

ရန်ကုန်မြို့တွင်း ပြေးဆွဲနေသည့် ယာဉ်လိုင်းတစ်လိုင်းအား တွေ့ရစဉ် (ဓာတ်ပုံ- ကျော်ဇင်ဖြိုး)

ရန်ကုန်မြို့အတွင်း ဘတ်စ်ကား ၅၀၀၀ ခန့်ပြေးဆွဲနေပြီး ယာဉ်လိုင်းအသစ်များ ထပ်မံတိုးမြှင့်ရန် ဆောင်ရွက်နေကြောင်း ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းက ပြောကြားသည်။

“ဘတ်စ်ကားတွေမှာ ကတ်စနစ်နဲ့စီးနင်းနိုင်ဖို့ ဆောင်ရွက်နေပါတယ်။ ကတ်တွေက ဘတ်စ်ကားစီးရုံမျှ မဟုတ်ဘဲ အခြားနယ်ပယ် အသီးသီးမှာလည်း သုံးစွဲနိုင်ဖို့ဖြစ်ပါတယ်။ ဈေးဝယ်ခြင်း၊ အခြားအခြားသော ဘတ်စ်ကားကဲ့သို့ ရထား၊ ရေလမ်းများနဲ့ သယ်ယူပို့ဆောင်ရေး ကဏ္ဍများ၌ပါ သုံးစွဲနိုင်တဲ့ ကတ်မျိုးဖြစ်ဖို့ အတွက် အစိုးရအနေနဲ့ ကြိုးစားနေပါတယ်။  ကတ်ကိုသာ သုံးစွဲနိုင်ပါက ဘတ်စ်ကာလိုင်းတွေမှာ ငွေရေတွက်ရတဲ့ လုပ်ငန်းကဏ္ဍများ လျော့ပါးသွားမှာဖြစ်ပြီး ၀န်ထမ်းတွေကိုလည်း အခြားကဏ္ဍနယ်ပယ်တွေမှာ ပြောင်းလဲအသုံးပြုခွင့်ရလာမှာ ဖြစ်ပါတယ်။ အခုအချိန်မှာ ရန်ကုန်မြို့ဘတ်စ်ကား ၅၀၀၀ ခန့် လှည့်ပတ်ပြီး ပြေးဆွဲနေပါတယ်။ ယာဉ်လိုင်းအသစ်တွေ များစွာကိုလည်း တိုးမြှင့်ရန် ကြိုးစားနေပါတယ်” ဟု ၀န်ကြီးချုပ် ဦးဖြိုးမင်းသိန်းက ပြောကြားသည်။

ထို့ပြင် ကတ်စနစ်အတွက် တင်ဒါခေါ်ယူထားပြီး ဖြစ်ကြောင်း၊ ကတ်စနစ်ဖြင့်သာ ဆောင်ရွက်နိုင်မည်ဆိုပါက ထိန်းချုပ်ဆောင်ရွက်နိုင်မှု အားကောင်းလာမည်ဖြစ်ကြောင်း၊ ငွေကိုင်သုံးစွဲရသည့်ဘ၀မှ ကတ်စနစ်ဖြင့် ချိတ်ဆက်ပြီးဆောင်ရွက်သော ပြည်သူလူထုဘ၀ကို ရောက်ရှိလာမည် ဖြစ်ကြောင်း၊ နည်းပညာအရကြည့်မည် ဆိုပါကလည်း နောက်ဆုံးနည်းပညာရပ်ကို အသုံးပြုနိုင်ရန်အတွက် ပြင်ဆင်နေကြောင်း ၎င်းက ဆက်လက်ပြောကြားသည်။

“ကျွန်တော်တို့ အစိုးရဘက်ကနေ အတွေးအခေါ် ပေါ်ပေါက်လာတာ သက်သက်နဲ့ ဆောင်ရွက်နေတာ မဟုတ်ပါဘူး။ ဘာကြောင့်လဲဆို ကျွမ်းကျင်ပညာရှင်တွေရဲ့ လေ့လာဆန်းစစ်ချက်မှုကို ရယူပါတယ်။ နိုင်ငံတကာက ကူညီပေးနေတဲ့သူတွေ များစွာရှိပါတယ်။ JICA ကနေလာပြီး လေ့လာဆန်းစစ်ပေးနေတယ်။ ဆွီဒင်ဘက်ကနေ ကူညီဆောင်ရွက်ပေးနေတဲ့ အခြေအနေတွေရှိပါတယ်။ ဒီ့အပြင် နိုင်ငံတကာ အ၀န်းအ၀ိုင်းကနေ ကျွန်တော်တို့ရဲ့ ပြုပြင်ပြောင်းလဲမှုကို ၀ိုင်းဝန်းကူညီနေတဲ့ ADB ဘဏ်မျိုးတွေလည်း ရှိပါတယ်” ဟု ၀န်ကြီးချုပ် ဦးဖြိုးမင်းသိန်းက ပြောကြားသည်။

ယင်းအပြင် တစ်ဦးပိုင် တစ်ယောက်ပိုင်ယာဉ်များမှာ ရှုံးလျှင်မဖြစ်သည့်အတွက် ပြည်သူ့ဝန်ဆောင်မှု လုပ်နေခြင်း မဟုတ်ဘဲ မရှုံးရေးကိုသာ ရှေးရှုနေခြင်းဖြစ်ကြောင်း၊ ယင်းကြောင့် တစ်ဦးပိုင် တစ်ယောက်ပိုင် ယာဉ်များကို ကုမ္ပဏီပုံစံမျိုး ပြောင်းလဲရန် တွန်းအားပေးပြီး လက်ရှိတွင်လည်း ပြောင်းလဲနေကြောင်း၊ သို့ရာတွင် တစ်ဦးပိုင် တစ်ယောက်ပိုင်ယာဉ်များကိုပင် ကုမ္ပဏီဟန်ဆောင်နေမည် ဆိုပါက ရေရှည်တွင် အနာဂတ် ပျောက်သွားနိုင်ကြောင်း၊ ထို့ကြောင့် ပြောင်းလဲမှုများအား YRTA၊ YBS တို့ဖြင့် ပူးပေါင်းပြီး စနစ်တကျ ဆောင်ရွက်ရန် တိုက်တွန်းလိုကြောင်း ၀န်ကြီးချုပ် ဦးဖြိုးမင်းသိန်းက ဆက်လက်ပြောကြားသည်။

 

March 27, 2018














Copy Protected by Chetan's WP-Copyprotect.