အကယ်ဒမီပေးပွဲတွင် အကယ်ဒမီ စန္ဒရားတင်ဝင်းလှိုင်၏ ပြောကြားချက်များနှင့် ပတ်သက်ပြီး ပြန်ကြားရေးဝန်ကြီးဌာန၏ လူမှုကွန်ရက်စာမျက်နှာဖြစ်သော MOI မှတစ်ဆင့် မတ် ၂၆ ရက်က ထုတ်ပြန်ချက်တစ်စောင် ထုတ်ပြန်ခဲ့ကြောင်း သိရသည်။
ထုတ်ပြန်ချက်တွင် ၂၀၁၇ ခုနှစ် မြန်မာ့ ရုပ်ရှင်ထူးချွန်ဆုချီးမြှင့်ပွဲ အခမ်းအနားတွင် အကောင်းဆုံး တေးဂီတဆုရရှိခဲ့သည့် စန္ဒရား (ဦး) တင်ဝင်းလှိုင်အနေဖြင့် ကျေးဇူးတင်စကား ပြောကြားခဲ့ရာတွင်လည်းကောင်း၊ အကယ်ဒမီပွဲပြီးနောက်ပိုင်း မီဒီယာအချို့နှင့် ပြောကြားသော စကားများတွင်လည်းကောင်း မမှန်မကန် စွပ်စွဲပုတ်ခတ်ပြောဆိုမှုများအပြင် ပုဂ္ဂိုလ်ရေး ပုတ်ခတ် တိုက်ခိုက်ပြောဆိုမှုများ ပါဝင်နေပြီး ယင်းတို့ကို အွန်လိုင်းအပါအဝင် မီဒီယာများ၌ ရေးသားဖော်ပြလျက်ရှိရာ ယင်းအချက်များသည် မမှန်ကန်ကြောင်း ဖော်ပြထားသည်။
၎င်း၏ “ခြေခြေမြစ်မြစ် နှစ်နှစ်ကာကာ အစီအစဉ် မလွှင့်နိုင်သည်မှာ တစ်နှစ်ရှိပြီ” ဟု ပြောကြားချက်မှာ လုံးဝမှန်ကန်ခြင်း မရှိကြောင်း၊ ယင်းအစီအစဉ်ကို အပတ်စဉ် အင်္ဂါနေ့ညနေတိုင်း၌ မြန်မာ့အသံနှင့် ရုပ်မြင်သံကြားတွင် ထုတ်လွှင့်လျက်ရှိရာ အပိုင်း (၁၅၂) ကို ၂၀၁၈ ခုနှစ် မတ် ၂၀ ရက်တွင် နောက်ဆုံးထုတ်လွှင့်ခဲ့ကြောင်း၊ အသစ်ထပ်မံ ရိုက်ကူးနိုင်ရေးအတွက်လည်း ကာယကံရှင်၏မိသားစုနှင့် ၂၀၁၇ ခုနှစ် ဇွန်မှစ၍ ၂၀၁၈ ခုနှစ် မတ် ၂၂ ရက် အထိ အကြိမ်ကြိမ်ဆက်သွယ်ခဲ့ရာ ၎င်း၏သမီးဖြစ်သူက (ဦး) တင်ဝင်းလှိုင် မျက်စိခွဲစိတ်ရန်ရှိခြင်း၊ ရုပ်ရှင်ကားကြီးများတွင် တေးဂီတ တီးခတ်နေရခြင်း စသည်တို့ကြောင့်ဟုဆိုကာ အကြိမ်ကြိမ်ရွှေ့ဆိုင်းခဲ့ပြီး အကယ်ဒမီပွဲကြီးပြီးမှသာ ရိုက်ကူးနိုင်ရေး ဆက်သွယ်မည်ဟု ပြန်ကြားခဲ့ကြောင်း ထုတ်ပြန်ချက်တွင် ဖော်ပြထားသည်။
ထို့ပြင် “ RCA စက်၊ အသုံးပြုသည့်အပ် တစ်ခုမှ မရှိတော့” ဟူသော ပြောကြားချက်မှာ လုံးဝမှန်ကန်ခြင်း မရှိကြောင်း၊ မြန်မာ့အသံ၌ နှစ်ပေါင်း ၇၀ ကျော်က စတင်သုံးစွဲခဲ့သော စက်ဖြစ်ပြီး မူရင်းကုမ္ပဏီကလည်း စက်အပိုပစ္စည်း ထုတ်လုပ်ခြင်းမရှိတော့ကြောင်း၊ သို့သော် ပြန်လည်ပြင်ဆင်ထားမှုအရ ၂၀၁၇ ခုနှစ်တွင် စက်တစ်လုံး ပြန်လည်ကောင်းမွန်လာပြီး အသုံးပြုသည့်အပ်ကိုလည်း ရှာဖွေပြုပြင်ပြီး သုံးစွဲနိုင်ခဲ့ပြီးဖြစ်ကြောင်း ထုတ်ပြန်ချက်တွင် ဖော်ပြထားသည်။
ယင်းအပြင် သီချင်းခွေကူးရာတွင် “ပိုက်ဆံအရမ်းပေးရတယ်၊ ရေအရမ်းလျှံရတယ်၊ ပိုက်ဆံမပေးရင် လူအဟောင်းတွေနဲ့ ဘယ်ဝန်ကြီးဌာနမှာမှ မရဘူး၊ ပိုက်ဆံပေးရတာချည်းပဲ” ဟူသောပြောကြားချက်မှာ အဖွဲ့အ စည်းတစ်ခုကိုသာမက နိုင်ငံတော်အစိုးရတစ်ရပ်လုံး၏ ဝန်ကြီးဌာနများကို သိမ်းကျုံးပုတ်ခတ် စွပ်စွဲပြောကြားချက်ဖြစ်နေကြောင်း၊ ပိုက်ဆံပေးရသည်ဆိုပါက သက်ဆိုင်ရာဝန်ကြီး ဌာန (သို့မဟုတ်) အဂတိလိုက်စားမှုတိုက်ဖျက်ရေး ကော်မရှင်အပါအဝင် အထက်အဖွဲ့အစည်းအဆင့်ဆင့်ကို တိုင်ကြားနိုင်ကြောင်း၊ တိုင်ကြားမှုများကိုလည်း စိစစ်ပြီး လိုအပ်သလို အရေးယူလျက်ရှိကြောင်း ထုတ်ပြန်ချက်တွင် ဖော်ပြထားသည်။
ထို့ပြင် ၎င်း၏ပြောကြားချက်များတွင် လူပုဂ္ဂိုလ်ဆိုင်ရာ စော်ကားမှုအပြင် တပ်မတော်မှ နယ်ဘက်သို့ လွဲှပြောင်းအမှုထမ်းဆောင်နေသော ပုဂ္ဂိုလ်များနှင့်ပတ်သက်ပြီး မတရား စွပ်စွဲ ပြောဆိုမှုများ ပြုလုပ်ခဲ့သည်မှာ လုံးဝသင့်လျော်မှုမရှိကြောင်း၊ ၎င်းဝန်ထမ်းများသည် နိုင်ငံဝန်ထမ်းဥပဒေ၊ နည်းဥပဒေများနှင့်အညီ တာဝန်ထမ်းဆောင်ခြင်းမရှိပါက မထမ်းဆောင်သည့်သူများကို အမည်နှင့်တကွ တိကျစွာဖော်ထုတ်ပြီး တိုင်ကြားနိုင်ကြောင်း ထုတ်ပြန်ချက်တွင် ဖော်ပြထားသည်။
ထိုသို့ စန္ဒရား (ဦး) တင်ဝင်းလှိုင်၏ မမှန်မကန်ပြောကြားခဲ့မှုများ၊ ယင်း ပြောကြားခဲ့မှုများအပေါ်အခြေခံပြီး မမှန်မကန် ထပ်ဆင့် စွပ်စွဲချက်များကို လုပ်ဆောင်နေကြသည့် သက်ဆိုင်ရာပုဂ္ဂိုလ်များအား တည်ဆဲဥပဒေ များနှင့်အညီ ဆက်လက်ဆောင်ရွက်မည်ဖြစ်ကြောင်း အသိပေးကြေညာအပ်သည်ဟု ပြန်ကြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
အကယ်ဒမီ စန္ဒရား (ဦး) တင်ဝင်းလှိုင်၏ ပြောကြားချက်များအား ပြန်ကြားရေးဝန်ကြီးဌာနမှ ထုတ်ပြန်ချက်ဖြင့်လည်းကောင်း၊ ပေးစာအနေဖြင့်လည်းကောင်း ပြန်လည်တုံ့ပြန်မှုများအပေါ် Facebook တွင် သုံးစွဲသူများက ဝေဖန်မှုများ ပြုလုပ်လျက်ရှိသည်ကို တွေ့ရ သည်။
