မဟာမဲခေါင်ဒေသအတွင်းရှိ လမ်းမကြီးများ ဖွံ့ဖြိုးတိုးတက်ရေး စီမံကိန်းအတွက် ဒေါ်လာ သန်း ၃၆၀ ချေးယူရန် ပြည်ထောင်စုလွှတ်တော် အတည်ပြု

မဟာမဲခေါင်ဒေသအတွင်းရှိ လမ်းမကြီးများ ဖွံ့ဖြိုးတိုးတက်ရေး စီမံကိန်းအတွက် ဒေါ်လာ သန်း ၃၆၀ ချေးယူရန် ပြည်ထောင်စုလွှတ်တော် အတည်ပြု
Published 27 March 2018

မဟာမဲခေါင်ဒေသအတွင်းရှိ လမ်းမကြီးများ ဖွံ့ဖြိုးတိုးတက်ရေးစီမံကိန်းအတွက်  ဒေါ်လာ သန်း ၃၆၀ ချေးယူရန် မတ် ၂၆ ရက် ကပြုလုပ်သည့် ပြည်ထောင်စုလွှတ်တော် အစည်းအဝေးတွင် အတည်ပြုခဲ့သည်။

မဟာမဲခေါင်ဒေသအတွင်းရှိ လမ်းမကြီးများဖွံ့ဖြိုးတိုးတက်ရေး စီမံကိန်းအတွက် အာရှဖွံ့ဖြိုးရေးဘဏ်နှင့် အာဆီယံအခြေခံ အဆောက်အအုံရန်ပုံငွေတို့ထံမှ ဒေါ်လာ သန်း ၃၆၀ ချေးယူရန်ကိစ္စနှင့်စပ်လျဉ်းပြီး သက်ဆိုင်ရာ ပြည်ထောင်စုအဆင့် အဖွဲ့အစည်းဝင်များက ရှင်းလင်းတင်ပြခြင်းများ ပြုလုပ်ခဲ့သည်။

မဟာမဲခေါင်ဒေသတွင်း နိုင်ငံများဖြစ်သည့် ကမ္ဘောဒီးယား၊ လာအို၊ မြန်မာ၊ ထိုင်း၊ ဗီယက်နမ်၊ တရုတ်စသည့် နိုင်ငံခြောက်နိုင်ငံအနက် ကျန်သည့်ငါးနိုင်ငံသည် တစ်နိုင်ငံနှင့် တစ်နိုင်ငံ ကုန်စည် ကူးသန်းရောင်းဝယ်မှုများကို ဆောင်ရွက်လျက်ရှိနေပြီး မြန်မာနိုင်ငံအနေဖြင့် စတင်ဆောင်ရွက်နိုင်ခြင်း မရှိသေးကြောင်း၊ သို့ရာတွင် စာချုပ်ပါ သဘောတူညီချက်များအရ ၂၀၁၉ ခုနှစ်တွင် မြန်မာနိုင်ငံအနေဖြင့် ပထမဦးစွာ ထိုင်းနိုင်ငံနှင့် ဆောင်ရွက်ရတော့မည်ဖြစ်ကြောင်း၊ ယင်းသို့ဆောင်ရွက်ခြင်းဖြင့် မြန်မာနိုင်ငံမှ ကားများ၊ ခရီးသွားပြည်သူများ၊ ကုန်စည်များ ထိုင်းနိုင်ငံအတွင်း ဝင်ရောက်နိုင်မည်ဖြစ်သကဲ့သို့ ထိုင်းနိုင်ငံမှလည်း မြန်မာနိုင်ငံအတွင်းသို့ ဝင်ရောက်လာနိုင်မည်ဖြစ်ကြောင်း၊ ခရီးသွား ပြည်သူများ၊ ကားများ၊ ကုန်စည်များကို မြန်မာနိုင်ငံအတွင်း မြဝတီအထိ ပထမအဆင့် ဝင်ခွင့်ပေးရမည်ဖြစ်ကြောင်း၊ ထို့နောက် ဘားအံ၊ ရန်ကုန်၊ ပုသိမ်အထိ ဝင်ခွင့်ပေးရမည်ဖြစ်ကြောင်း၊ မြန်မာနိုင်ငံအနေဖြင့်လည်း ထိုင်းနိုင်ငံမှတစ်ဆင့် မဟာမဲခေါင်ဒေသတွင်းနိုင်ငံများကို လွတ်လပ်စွာသွားလာနိုင်မည်ဖြစ်ကြောင်း ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက ပြောကြားသည်။

Cross Border Transport Agreement အရ တစ်နိုင်ငံနှင့်တစ်နိုင်ငံ ဖြတ်သန်းသွားလာခွင့်ပြုသည့်အခါတွင် ကိုယ့်နိုင်ငံတွင် ရှိသည့်လမ်းများသည် နိုင်ငံတကာအဆင့်မီ လမ်းများဖြစ်ရန် လိုအပ်မည်ဖြစ်ကြောင်း၊ မဟာမဲခေါင်ဒေသတွင်း အရှေ့အနောက်စီး ပွားရေးစြင်္ကံလမ်းမကြီးများသည် ပစိဖိတ်သမုဒ္ဒရာ ကမ်းခြေရှိ ဒါနန်းမြို့မှ အိန္ဒိယသမုဒ္ဒရာအထိ ဆက်သွယ်ထားပြီး ၎င်းလမ်းကြောင်းတစ်လျှောက်ရှိ ဒေသဖွံ့ဖြိုးတိုးတက်ရေးအတွက် သက်ဆိုင်ရာနိုင်ငံများမှ ကဏ္ဍအလိုက် ဖွံ့ဖြိုးရေးစီမံကိန်းများကိုလည်း ကြိုတင်ဆောင်ရွက်ထားရှိပြီး လိုအပ်သည့်အစီအမံများကိုလည်း ချမှတ်ထားကြကြောင်း ဒုတိယဝန်ကြီး ဦးကျော်လင်းက ပြောကြားသည်။

မဟာမဲခေါင်ဒေသခွဲအတွင်းရှိ လမ်းမကြီးများဖွံ့ဖြိုးတိုးတက်ရေးအတွက် ရန်ကုန်  - ပုသိမ်လမ်း၊ ပဲခူး -သန်လျင်လမ်းနှင့် ရန်ကုန် - မန္တလေးလမ်းတို့အား လမ်းအဆင့်မြှင့်တင်ခြင်း ဆောင်ရွက်နိုင်ရန်အတွက် အာရှဖွံ့ဖြိုးရေးဘဏ် (ADB) မှ ဒေါ်လာ သန်း ၃၄၀၊ အာဆီယံ အခြေခံအဆောက်အအုံ ရန်ပုံငွေ (AIF) မှ ဒေါ်လာ သန်း ၂၀ ချေးယူခွင့်ပြုရန် ဖေဖော်ဝါရီ ၂၂ ရက်ကပြုလုပ်သည့် ပြည်ထောင်စုလွှတ်တော် အစည်းအဝေးတွင် ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက တင်ပြခဲ့သည်။

ပထမ စီမံကိန်းဖြစ်သည့် ရန်ကုန်-ပုသိမ်လမ်းသည် BOT စနစ်ဖြင့် ဆောင်ရွက်နေသောလမ်းဖြစ်ပြီး လက်ရှိ BOT ကုမ္ပဏီနှင့် ADB မှ ပညာရှင်များမှ Operation & Maintainance အတွက် အသစ်ပြန်လည် ပြင်ဆင် စာချုပ် ချုပ်ဆို ဆောင်ရွက်မည်ဖြစ်ကြောင်း၊ ADB ၏ အစီအစဉ်ဖြင့် လမ်းအဆင့်မြှင့်တင် ဆောင်ရွက်ခြင်းဖြင့် ရန်ကုန်-ပုသိမ်လမ်းကို အခြေခံ၍ ပုသိမ်မှ ငွေဆောင်၊ ပုသိမ်မှ ငရုတ်ကောင်း၊ ပုသိမ်မှ မော်တင်စွန်း၊ ပုသိမ်မှ ချောင်း သာ၊ ပုသိမ်မှ ဂွ-ငါးသိုင်းချောင်း၊ သံတွဲ-ငပလီ နှင့် ဂွ-ကမ်းသာယာ လမ်းကြောင်းတစ်လျှောက် လုံးကို အချိန်တိုအတွင်း သွားလာနိုင်ပြီး ဒေသ ဖွံ့ဖြိုးရေးအား များစွာအထောက်အကူပြုမည်ဖြစ်ကြောင်း၊ ဒုတိယစီမံကိန်းဖြစ်သည့် သီလဝါမှ ပဲခူး၊ ကမာစဲမှ ကျိုက်ထိုသို့ ADB နှင့် JICA တို့မှ အကူအညီဖြင့် ဖြတ်လမ်းဖောက်လုပ်ခြင်းဖြင့် ဘုရားကြီးနှင့် ဝေါမြို့တို့ကို ပတ်၍သွားနေရသည့်ခရီးထက် အချိန်ကုန်သက်သာစေမည်ဖြစ်ကြောင်း ဒုတိယဝန်ကြီးက ဖေဖော်ဝါရီ ၂၂ ရက်တွင် လွှတ်တော်သို့ တင်ပြခဲ့သည်။

ထို့ပြင် တတိယစီမံကိန်းသည် ရန်ကုန်-မန္တလေး အမြန်လမ်း ရန်ကုန်မှ ဘောနတ်ကြီး အထိ မိုင် ၄၀ အပိုင်းကို ADB အကူအညီဖြင့် Pilot Project အနေဖြင့် နိုင်ငံတကာအဆင့်မီ  Expressway အဖြစ် အကောင်အထည်ဖော် ဆောင်ရွက်ရန်ဖြစ်ကြောင်း ဒုတိယဝန်ကြီး ဦးကျော်လင်းက လွှတ်တော်သို့ တင်ပြခဲ့သည်။

Most Read

Most Recent