ဒဂုံမြောက်မြို့နယ် ပြည်ထောင်စုလမ်းမပေါ်တွင် လမ်းလျှောက်နေသူတစ်ဦး ယာဉ်တိုက်ခံရသဖြင့် သေဆုံးမှု မတ် ၂၄ ရက် ညပိုင်းက ဖြစ်ပွားခဲ့ကြောင်း မေတ္တာသင်္ဂဟ သာရေး/ နာရေးကူညီမှုအသင်းမှ စုံစမ်းသိရသည်။
မတ် ၂၃ ရက် ည ၁၂ နာရီခွဲခန့်တွင် ဒဂုံမြောက်မြို့နယ် ပြည်ထောင်စုလမ်းမ အားကစားကွင်းရှေ့တွင် ယာဉ်တိုက်မှုဖြစ်ပွားသဖြင့် မေတ္တာသင်္ဂဟသာရေး/ နာရေးကူညီမှုအသင်းမှ သွားရောက်ကူညီမှုများ ပြုလုပ်ခဲ့ကြောင်း သိရသည်။
ယင်းသို့ သွားရောက်ကူညီရာ အခင်းဖြစ်နေရာ၌ အမျိုးသားတစ်ဦးမှာ ယာဉ်တိုက်ခံရသဖြင့် သေဆုံးနေသည်ကို တွေ့ရှိခဲ့ရကြောင်း အမျိုးသမီးတစ်ဦးမှာလည်း ယာဉ်တိုက်ခံရသဖြင့် ဒဏ်ရာများရရှိနေသည်ကို တွေ့ရှိခဲ့ရကြောင်း အဆိုပါအသင်းမှ တာဝန်ရှိသူတစ်ဦးက ပြောကြားသည်။
“အခင်းဖြစ်နေရာမှာတော့ အမျိုးသားတစ်ဦးကို ဗိုက်ပွင့်ပေါင်ကျိုးဒဏ်ရာတွေနဲ့ သေဆုံးနေတာကို တွေ့ရှိခဲ့ရတယ်။ အမျိုးသမီးတစ်ဦးကတော့ ယာဉ်တိုက်မှုကြောင့် ထိခိုက်ဒဏ်ရာတွေ ရရှိထားပါတယ်” ဟု မေတ္တာသင်္ဂဟသာရေး/ နာရေးကူညီမှု အသင်းမှ တာဝန်ရှိသူတစ်ဦးက ဆိုသည်။
၎င်းက ဆက်လက်၍ “ယာဉ်တိုက်ခံရတဲ့ အမျိုးသားနဲ့အမျိုးသမီးက ကားလမ်းကြောင်းကို ကျောခိုင်းပြီးလျှောက်လာတာ။ အဲဒီအချိန်မှာ ယာဉ်တစ်စီးက ဝင်တိုက်မိတာ။ သေဆုံးခဲ့တဲ့ အမျိုးသားက ကားအောက်မှာ ငြိပါသွားတာ။ တိုက်သွားတဲ့ကားက လိုက်ထရပ်လို့ အနီးပတ်ဝန်းကျင်က ပြောကြတယ်။ တိုက်မိပြီးထွက်ပြေးသွားတယ်” ဟု ပြောကြားသည်။
အဆိုပါဖြစ်စဉ်အား သက်ဆိုင်ရာ ရဲစခန်းမှ အမှုဖွင့်အရေးယူရန် ဆောင်ရွက်လျက်ရှိကြောင်း သိရသည်။
