ရန်ကုန်အရှေ့ပိုင်းဆေးရုံကြီး အရေးပေါ်ကုသဌာန အဆင့်မြှင့်တင်ရေး အပါအဝင် ကျန်းမာရေး ဝန်ထမ်းများ၏ ကျွမ်းကျင်မှု မြှင့်တင်ရေး အစီအစဉ်များတွင် ကျန်းမာရေး ဝန်ကြီးဌာနနှင့် စင်ကာပူ ကျန်းမာရေး ဝန်ဆောင်မှု လုပ်ငန်းတို့ ပူးပေါင်းလုပ်ဆောင်မည်

ရန်ကုန်အရှေ့ပိုင်းဆေးရုံကြီး အရေးပေါ်ကုသဌာန အဆင့်မြှင့်တင်ရေး အပါအဝင် ကျန်းမာရေး ဝန်ထမ်းများ၏ ကျွမ်းကျင်မှု မြှင့်တင်ရေး အစီအစဉ်များတွင် ကျန်းမာရေး ဝန်ကြီးဌာနနှင့် စင်ကာပူ ကျန်းမာရေး ဝန်ဆောင်မှု လုပ်ငန်းတို့ ပူးပေါင်းလုပ်ဆောင်မည်
Published 24 March 2018

ဗဟိုအဆင့် ပြည်သူ့ဆေးရုံကြီးတစ်ခုရှိ အရေးပေါ်ဆေးကုသမှုဌာနကို တွေ့ရစဉ် (ဓာတ်ပုံ-ကြည်နိုင်)

ရန်ကုန်အရှေ့ပိုင်းဆေးရုံကြီး အရေးပေါ်ကုသဌာန အဆင့်မြှင့်တင်ရေး အပါအဝင် ကျန်းမာရေး ဝန်ထမ်းများ၏ ကျွမ်းကျင်မှု မြှင့်တင်ရေး အစီအစဉ်များတွင် ကျန်းမာရေးနှင့် အားကစား ဝန်ကြီးဌာနနှင့် စင်ကာပူ ကျန်းမာရေးဝန်ဆောင်မှု လုပ်ငန်းတို့ ပူးပေါင်းလုပ်ဆောင် သွားမည်ဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။

ယင်းလုပ်ငန်းများ လုပ်ဆောင်ရန် မတ် ၂၂ ရက်က ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးအား စင်ကာပူနိုင်ငံအခြေစိုက် စင်ကာပူကျန်းမာရေး ဝန်ဆောင်မှုလုပ်ငန်း (SingHealth)၊ နိုင်ငံတကာ ပူးပေါင်းဆောင်ရွက်ရေးဌာနမှ အကြံပေးပုဂ္ဂိုလ်နှင့် စင်ကာပူ အထွေထွေရောဂါကု ဆေးရုံကြီးမှ ဂုဏ်ထူးဆောင် အရိုးရောဂါ ဆိုင်ရာ အတိုင်ပင်ခံ ဆရာဝန်ကြီး ပါမောက္ခ Dr.Tay Boon Keng ဦးဆောင်သောအဖွဲ့ လာရောက်တွေ့ဆုံ ဆွေးနွေးခဲ့သည်။

SingHealth အနေဖြင့် ပြည်သူများ၏ ကျန်းမာရေးစောင့်ရှောက်မှု လုပ်ငန်းများတွင် ဘက်ပေါင်းစုံမှ ဦးဆောင်မှုပေးနိုင်မည့် ခေါင်းဆောင်များနှင့် ဘာသာရပ်အထူးပြု ပညာရှင်များ ထွက်ပေါ်လာစေရေး၊ ဆေးရုံတွင်း ကူးစက်တတ်သောရောဂါများ ဖြစ်ပွားမှုလျှော့ချရေး၊ ဆရာဖြစ် သင်တန်းများမှတစ်ဆင့် ပညာရပ်များ အဆင့်ဆင့် ဖြန့်ဝေပေးနိုင်ရေး၊ ရန်ကုန်မြို့တွင် ပြီးပြည့်စုံသော ထိခိုက်ဒဏ်ရာ ကုသမှုဌာနနှင့် ပြန်လည်ထူထောင်ရေး ဌာနအတွက် ကျန်းမာရေးဝန်ထမ်းများ၏ ကျွမ်းကျင်မှုအား မြှင့်တင်ပေးခြင်း၊ ရန်ကုန်အရှေ့ပိုင်း ဆေးရုံကြီးတွင် အရေးပေါ်ဌာနနှင့် အရေးပေါ်ကုသမှုများ အဆင့်မြှင့်တင်ရေးအတွက် အခြေခံ အဆောက်အအုံနှင့် ဆေးပစ္စည်းကိရိယာများ အဆင့်မြှင့်တင်ရေး ကိစ္စများ ဆွေးနွေးခဲ့ကြောင်း သိရသည်။

ကျန်းမာရေးနှင့် အားကစားဝန်ကြီးဌာန အနေဖြင့် နိုင်ငံပိုင် ပြည်သူ့ဆေးရုံကြီးများတွင် တစ်နှစ်လျှင် လူနာဦးရေ သန်းနှင့်ချီ တက်ရောက်ကု သနေသည့်အတွက် ဆေးရုံကြီးများတွင် အရေးပေါ်လူနာ ကယ်ဆယ်ရေးလုပ်ငန်း အပါအဝင် ဆေးရုံအလိုက် လိုအပ်သော အဆင့်မြှင့်တင်ခြင်း လုပ်ငန်းများ လုပ်ဆောင်လျက်ရှိကြောင်း သိရသည်။

ဝန်ကြီးဌာနမှ တရားဝင်ရရှိသည့် အချက်အလက်များအရ ပြီးခဲ့သည့် ၂၀၁၆ ခုနှစ် တစ်နှစ်တာ ကာလအတွင်း တစ်နိုင်ငံလုံးရှိ ပြည်သူ့ ဆေးရုံကြီးများတွင် တက်ရောက် ဆေးကုသခဲ့သည့် ပြင်ပလူနာပေါင်း ကိုးသန်းကျော်၊ အတွင်းလူနာပေါင်း ၂ ဒသမ ၅ သန်းကျော်ကို ကျန်းမာရေး စောင့်ရှောက်မှုများ ပေးခဲ့ကြောင်းနှင့် ဆေးကုသမှုခံယူသူ လူနာဦးရေ နှစ်စဉ်မြင့်တက်လျက် ရှိသည့်အတွက် ပြည်သူ့ဆေးရုံကြီးများကို အဆင့်မြှင့်တင် လျက်ရှိကြောင်း သိရသည်။

ရန်ကုန်တိုင်းဒေသကြီး အတွင်းရှိ သန်လျင်၊ လှိုင်သာယာ၊ အင်းစိန်၊ မြောက်ဥက္ကလာနှင့် သင်္ဃန်းကျွန်းဆေးရုံကြီး အပါအဝင် အခြားဆေးရုံကြီးများကို ယခင်ကထက် အဆင့်မြှင့်တင်နေပြီး အရေးပေါ်လူနာ ကယ်ဆယ်ရေး လုပ်ငန်းအတွက် လိုအပ်သော လူအင်အား၊ စက်ပစ္စည်းများကိုလည်း တိုးချဲ့လုပ်ဆောင်ပေးလျက် ရှိကြောင်းနှင့် ရန်ကုန်တိုင်းဒေသကြီးတွင် အထူးကုဆေးရုံပေါင်း ၁၄ ရုံ၊ သင်ကြားရေးဆေးရုံ သုံးရုံ၊ ခုတင် ၅၀၀ ဆံ့နှစ်ရုံ၊ ခုတင် ၂၀၀ ဆံ့ လေးရုံ၊ ခုတင် ၁၀၀ ဆံ့ဆေးရုံတစ်ရုံ၊ ခုတင် ၅၀ ဆံ့နှင့် ၂၅ ခုတင်ဆံ့ဆေးရုံ ၁၁ ရုံစီ၊ ၁၆ ခုတင်ဆံ့ဆေးရုံလေးရုံ၊ တိုက်နယ် ဆေးရုံ ၃၃ ရုံရှိပြီး စုစုပေါင်းဆေးရုံ ၈၃ ရုံရှိ ကြောင်းနှင့် ခွင့်ပြုခုတင် စုစုပေါင်း ၁၁၄၃၅ ခုတင်ရှိကြောင်းနှင့် တစ်နိုင်ငံလုံး အတိုင်းအတာဖြင့် ကျေးလက်ကျန်းမာရေး ဌာနပေါင်း ၁၇၇၈ ခုဆောက်လုပ်ထားပြီး ကျေးလက်ကျန်းမာရေး ဌာနခွဲပေါင်း ၉၀၈၃ ခုရှိကြောင်း သိရသည်။

နိုင်ငံများ၏ ဖွံ့ဖြိုးတိုးတက်မှု၊ လူတို့၏ နေထိုင်စားသောက်မှု၊ လူနေမှု ပုံစံပြောင်းလဲမှုတို့ကြောင့် သွေးတိုး၊ ဆီးချိုသွေးချို၊ အဝလွန်၊ နှလုံးသွေးကြောပိတ်၊ လေဖြတ်၊ ကင်ဆာရောဂါနှင့် နာတာရှည် အဆုတ်ရောင်ရောဂါ စသည့် ကူးစက်ခြင်းကြောင့် မဟုတ်သော ရောဂါများ ဖြစ်ပွားမှုမှာ ဖွံ့ဖြိုးပြီးနိုင်ငံများ၊ ဖွံ့ဖြိုးဆဲနိုင်ငံများတွင်ပါ တစ်နေ့တခြား တိုးပွားလျက်ရှိကြောင်းနှင့် ယင်းရောဂါများ၏ ဖြစ်ပွားမှုနှုန်းသာမက ယင်းရောဂါများ၏ နောက်ဆက်တွဲ ပြဿနာများ ဖြစ်ပွားမှု၊ ယင်းရောဂါများကြောင့် သေဆုံးမှုများသည်လည်း လျင်မြန်စွာ တိုးပွားလျက်ရှိကြောင်း သိရသည်။

Most Read

Most Recent