ဘင်္ဂလားဒေ့ရှ်မှ မြန်မာနိုင်ငံဘက်သို့ ပေးပို့ထားသော အစ္စလာမ်ဘာသာဝင် ၈၀၃၂ ဦးအနက် မြန်မာနိုင်ငံတွင် နေထိုင်ခဲ့သည်ဟု စိစစ်ရရှိသူ စုစုပေါင်း မတ် ၁၉ ရက်အထိ ၅၅၆ ဦးရှိလာ

ဘင်္ဂလားဒေ့ရှ်မှ မြန်မာနိုင်ငံဘက်သို့ ပေးပို့ထားသော အစ္စလာမ်ဘာသာဝင် ၈၀၃၂ ဦးအနက် မြန်မာနိုင်ငံတွင် နေထိုင်ခဲ့သည်ဟု စိစစ်ရရှိသူ စုစုပေါင်း မတ် ၁၉ ရက်အထိ ၅၅၆ ဦးရှိလာ
Published 21 March 2018

ဘင်္ဂလားဒေ့ရှ်မှ မြန်မာနိုင်ငံဘက်သို့ ပေးပို့ထားသော အစ္စလာမ်ဘာသာဝင် ၈၀၃၂ ဦးအနက် မြန်မာနိုင်ငံတွင် နေထိုင်ခဲ့သည်ဟု စိစစ်ရရှိသူ စုစုပေါင်း မတ် ၁၉ ရက်အထိ ၅၅၆ ဦးရှိလာပြီး ယင်း ၅၅၆ ဦးအား ဘင်္ဂလားဒေ့ရှ်နိုင်ငံဘက်က လွှဲပြောင်းလာလျှင် ပြန်လည်စိစစ် လွှဲပြောင်းလက်ခံနိုင်ရန် အသင့်ပြင်ဆင်ထားရှိပြီးဖြစ်ကြောင်း သတင်းထုတ်ပြန်ရေးကော်မတီမှ သိရသည်။

အဆိုပါ သတင်းထုတ်ပြန်ချက်အရ ဘင်္ဂလားဒေ့ရှ်နိုင်ငံမှ ပထမအသုတ်အနေဖြင့် ပြန်လည်လွှဲပြောင်းပေးအပ်ခဲ့သည့် အစ္စလာမ်ဘာသာဝင် အိမ်ထောင်စု ၁၆၃၇ စု၊ လူဦးရေ ၈၀၃၂ ဦး၏ ကိုယ်ရေးအချက်အလက်များမှာ မိမိဆန္ဒအလျောက် ပြန်လည်ဝင်ရောက်လိုမှု ဟုတ် မဟုတ် စိစစ်၍မရနိုင်ခြင်း၊ ပြည်ထောင်စုသမ္မတမြန်မာနိုင်ငံတော်၏ တည်ဆဲဥပဒေများကို လေးစားလိုက်နာပါမည်ဖြစ်ကြောင်း ဝန်ခံလက်မှတ်များမရရှိနိုင်ခြင်း၊ ပုံစံပါအချက်အလက်များ မှန်ကန်ကြောင်း ကာယကံရှင်မှ လက်မှတ်ရေးထိုးထားသည့် (သို့မဟုတ်) လက်ဗွေရိုက်နှိပ်ဖော်ပြထားသည့် အချက်အလက်များမပါရှိခြင်း၊ ပုံစံခေါင်းစဉ် ကိုက်ညီမှုမရှိခြင်း၊ ပုံစံနံပါတ်နှင့် ဖြည့်သွင်းရက်စွဲများမပါရှိခြင်း၊ အိမ်ထောင်ဦးစီး၏ ထင်ရှားသော အမှတ်အသားနှင့် လက်ဗွေများမပါရှိခြင်း၊ မြန်မာနိုင်ငံအစိုးရမှ ထုတ်ပေးထားသော ယခင်ကိုင်ဆောင်ခဲ့သည့် လက်မှတ်နှင့်နံပါတ်များ ရှိ၊ မရှိ ဖော်ပြမထားသဖြင့် စိစစ်၍မရနိုင်ခြင်း၊ အိမ်ထောင်ဦးစီး၏ မိဘများ မြန်မာနိုင်ငံ၌ နေထိုင်ခဲ့သည့် နေရပ်လိပ်စာမပါရှိ၍ ဆက်စပ်ရှာဖွေရန်ခက်ခဲခြင်း၊ ဆန္ဒအလျောက် ပြန်လာလိုသူ၏ ဓာတ်ပုံနှင့် ယခင်မြန်မာနိုင်ငံ၌ နေထိုင်ခဲ့စဉ်က ပြုစုထားသော အိမ်ထောင်စုအလိုက်ဓာတ်ပုံတို့ကို ခေတ်မီနည်းပညာဖြင့် စစ်ဆေးရန် ဆောင်ရွက်ထားသော်လည်း ပေးပို့လာသော ဓာတ်ပုံများ၏ အရည်အသွေးမပြည့်မီမှုကြောင့် တိုက်ဆိုင်စစ်ဆေး၍ မရနိုင်ခြင်းတို့ တွေ့ရကြောင်း သိရသည်။

နှစ်နိုင်ငံအကြား သဘောတူညီထားသော သတ်မှတ်ပုံစံမဟုတ်သည့် ၈၀၃၂ ဦးအား အချက်အလက်များ မှန်ကန်မှု ရှိ မရှိ အိမ်ထောင်စုဓာတ်ပုံများနှင့် ရွာအမည်၊ လူတစ်ဦးချင်းအမည်ကို အနီးစပ်ဆုံး တိုက်ဆိုင်စိစစ်စစ်ဆေးခဲ့ရာ ဘင်္ဂလားဒေ့ရှ်နိုင်ငံဘက်မှ ပေးပို့လာသည့် အစ္စလာမ်ဘာသာဝင် ၈၀၃၂ ဦးအနက် ၃၆၃ ဦးသာ မြန်မာနိုင်ငံတွင် နေထိုင်ခဲ့ကြောင်း စိစစ်တွေ့ရှိခဲ့ရသဖြင့် ဘင်္ဂလားဒေ့ရှ်နိုင်ငံဘက်သို့ ပြန်လည်၍ အသိပေးအကြောင်းကြားခဲ့ကြောင်း၊ ယင်းနောက် ကျန်ရှိသူများအား အထောက်အထား အချက်အလက်များ မှန်ကန်ခြင်း ရှိ မရှိ စိစစ်မှုများ ဆက်လက်ဆောင်ရွက်ခဲ့ရာ မတ် ၁၉ ရက်အထိ စိစစ်ချက်အရ မြန်မာနိုင်ငံအတွင်း နေထိုင်ခဲ့သူ ၁၉၃ ဦး ထပ်မံစိစစ်နိုင်ခဲ့ခြင်းဖြစ်ကြောင်း သိရသည်။

Most Read

Most Recent