မဟာမဲခေါင်ဒေသခွဲ စြင်္ကံလမ်းတစ် လျှောက်ရှိမြို့များ ဖွံ့ဖြိုးမှုစီမံကိန်းအတွက် အာရှဖွံ့ဖြိုးရေးဘဏ်မှ အမေရိကန်ဒေါ်လာ သန်း ၈၀ ချေးယူရန် ပြည်ထောင်စုလွှတ်တော်က သဘောတူခဲ့သည်။
အဆိုပါချေးငွေနှင့်ပတ်သက်ပြီး ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက ယင်းစီမံကိန်းသည် မဟာမဲခေါင်ဒေသခွဲ အရှေ့အနောက် စီးပွားရေးစြင်္ကံလမ်းမကြီးတစ်လျှောက်တွင် ကျရောက်နေသည့် မြို့များတွင်ဆောင်ရွက်မည့် စီမံကိန်းဖြစ်ကြောင်း၊ ဆောက်လုပ်ရေးဝန်ကြီးဌာန၏ မြို့အတန်းအစား သတ်မှတ်ချက်တွင် (ခ) အဆင့်ရှိသော Secondary Cities မြို့များဖြစ်ခြင်း၊ စီးပွားရေး၊ လူမှုရေး၊ လမ်းပန်းဆက်သွယ်ရေး၊ ခရီးသွားကဏ္ဍနှင့် ဝန်ဆောင်မှုဆိုင်ရာ ဖွံ့ဖြိုးတိုးတက်မှုရှိခြင်း၊ Development Potential အခွင့်ကောင်းများရှိခြင်း စသည်တို့ကြောင့် ကရင်ပြည်နယ်တွင် ဘားအံနှင့် မြဝတီ၊ မွန်ပြည်နယ်တွင် မော်လမြိုင်မြို့တို့အား စီမံကိန်းဝင်မြို့များအဖြစ် သတ်မှတ်ရွေးချယ်ခြင်းဖြစ် ကြောင်း ပြောကြားသည်။
Cross Border Transport Agreement အရ မဟာမဲခေါင်ဒေသခွဲအတွင်းမှ မြန်မာနိုင်ငံအတွင်းသို့ ဝင်ရောက်လာမည့် သန်းနှင့်ချီသော ခရီးသွားများအတွက် အဆင်ပြေချောမွေ့စေရန် နယ်စပ်မြို့ဖြစ်သည့် မြဝတီ၊ ဘားအံနှင့် မော်လမြိုင်တို့ကို ရွေးချယ်ခြင်းဖြစ်ကြောင်း၊ ထို့ပြင် နယ်မြေဒေသဖွံ့ဖြိုးရေးအတွက် ဘားအံ စက်မှုဇုန်ဖွံ့ဖြိုးရေးဆောင်ရွက်ခြင်း၊ မြဝတီနှင့် မဲဆောက်မြို့တို့တွင် Joint Spatial Development Plan ရေးဆွဲပေးခြင်း၊ မော်လမြိုင်ရှိ ရှေးဟောင်းအဆောက်အအုံဖြစ်သည့် အထွေထွေအုပ်ချုပ်ရေးရုံးအား Heritage Conservation ပြုလုပ်ခြင်းများ ပါဝင်ကြောင်း ၎င်းက ပြောကြားခဲ့သည်။
အဆိုပါချေးငွေရယူရန်နှင့်ပတ်သက်ပြီး စီမံကိန်းနှင့်ဘဏ္ဍာရေးဝန်ကြီးဌာနဒုတိယဝန်ကြီး ဦးမောင်မောင်ဝင်းက ADB ၏ ချေးငွေဖြင့်ဆောင်ရွက်မည့် ဘားအံ၊ မြဝတီ၊ မော်လမြိုင်မြို့များသည် မဟာမဲခေါင်ဒေသခွဲ အရှေ့အနောက်စီးပွားရေးစြင်္ကံလမ်းပေါ်တွင် တည်ရှိပြီး မြန်မာနိုင်ငံ၏နယ်စပ်မြို့နှင့် ထပ်မံဖွံ့ဖြိုးရန်အလားအလာရှိသည့် မြို့များဖြစ်သဖြင့် မဟာမဲခေါင်ဒေသခွဲ စီးပွားရေးစြင်္ကံများ ဖွံ့ဖြိုးတိုးတက်လာစေရေးအတွက် ယင်းမြို့များအား ရွေးချယ်ခြင်းဖြစ်ကြောင်း၊ အဆိုပါ မြို့သုံးမြို့နေ ပြည်သူများအတွက် ရေကောင်းရေသန့်နှင့် ရေလုံလောက်စွာရရှိခြင်း၊ စွန့်ပစ်ပစ္စည်းများနှင့် အမှိုက်စွန့်ပစ်စနစ်များ ပိုမိုကောင်းစေခြင်း၊ ရှေးဟောင်းအဆောက်အအုံများ ပြုပြင်ထိန်းသိမ်းခြင်း၊ စသည့်လုပ်ငန်းများ အကောင်အထည်ဖော်ဆောင်ရွက်ခြင်းဖြင့် မြို့ပြဖွံ့ဖြိုးရေးအတွက် လိုအပ်သော အခြေခံအဆောက်အအုံများ ဖွံ့ဖြိုးတိုးတက်ခြင်း၊ လူမှုစီးပွားဘ၀ ဖွံ့ဖြိုးတက်ခြင်းများအတွက် အထောက်အပံ့ဖြစ်ခြင်းများ ဖြစ်မည်ဖြစ်ကြောင်း ပြည်ထောင်စုလွှတ်တော်သို့ပြောကြားသည်။
ချေးငွေစီမံကိန်းအတွက် ဆောက်လုပ်ရေးဝန်ကြီးဌာနက တာဝန်ခံကာ မွန်ပြည်နယ်နှင့် ကရင်ပြည်နယ်အစိုးရအဖွဲ့တို့မှ အကောင်အထည်ဖော်ဆောင်ရွက်မည်ဖြစ်ကြောင်း၊ ချေးငွေရယူခြင်း၊ သုံးစွဲခြင်း၊ ပြန်လည်ပေးဆပ်ခြင်းများအတွက် ချေးငွေစာချုပ် ချုပ်ဆိုချိန်တွင် စီမံကိန်းနှင့်ဘဏ္ဍာရေးဝန်ကြီးဌာန၊ ဆောက်လုပ်ရေးဝန်ကြီးဌာန၊ သက်ဆိုင်ရာ ပြည်နယ်အစိုးရအဖွဲ့များ၊ အာရှဖွံ့ဖြိုးရေး ဘဏ်တို့နှင့် ညှိနှိုင်းကာ ဆက်လက်ဆောင်ရွက်မည်ဖြစ်ကြောင်း ဒုတိယဝန်ကြီး ဦးမောင် မောင်ဝင်းက ပြောကြားသည်။
