ငါး၊ ပုစွန်မွေးမြူရေးဇုန်များ ပေါ်ပေါက်လာပါက နိုင်ငံခြားရင်းနှီးမြှုပ်နှံသူများကို လုပ်ကိုင်ခွင့်ပေးမည်ဟုဆို

ငါး၊ ပုစွန်မွေးမြူရေးဇုန်များ ပေါ်ပေါက်လာပါက နိုင်ငံခြားရင်းနှီးမြှုပ်နှံသူများကို လုပ်ကိုင်ခွင့်ပေးမည်ဟုဆို
Published 20 March 2018

ပြည်တွင်းရှိ အအေးခန်းစက်ရုံတစ်ရုံ၏ လုပ်ငန်းခွင်ကို တွေ့ရစဉ်

ငါး၊ ပုစွန် မွေးမြူရေးဇုန်များ ပေါ်ပေါက်လာပါက နိုင်ငံခြားရင်းနှီးမြှုပ်နှံသူများကို လုပ်ကိုင်ခွင့်ပေးမည်ဟု မြန်မာနိုင်ငံ ငါးလုပ်ငန်းအဖွဲ့ချုပ် အထွေထွေအတွင်းရေးမှူး ဦးဝင်းကြိုင်က ပြောကြားသည်။

“မွေးမြူရေးဇုန်တွေမှာ လုပ်ငန်းတွေက လုပ်ရမှာ အများကြီးပဲ။ အများကြီးထဲမှာ နိုင်ငံတကာက သူနဲ့ဆိုင်တဲ့ ကျွမ်းဝင်တဲ့ သက်ဆိုင်တဲ့ လုပ်ငန်းတွေမှာ ရင်းနှီးမြှုပ်နှံမှုကပါ ပါဝင်လို့ရတယ်။ အစာစက်ရုံမှာ ပါချင်တယ်။ အအေးခန်းစက်ရုံမှာ ပါချင်တယ်။ မွေးမြူရေး သုံးပစ္စည်းတွေ ထောက်ပံ့တဲ့ နေရာမှာလည်း ပါချင်လည်း ပါလို့ရတယ်။ဒါမှ ရင်းနှီးမြှုပ်နှံမှုမှာ မပါချင်ဘူးဆိုလည်း လိုအပ်တဲ့ ငွေကြေးကို နိုင်ငံခြားချေးငွေအဖြစ်နဲ့ မြန်မာနိုင်ငံကို အစိုးရဆီကနေ တစ်ဆင့်ခံချေးပြီး ချေးငွေ အတိုးပြန်ယူတဲ့နည်းနဲ့လည်း ပါလို့ရတယ်။ ဒီနည်းတွေက ပရောဂျက်ကြီးတွေမှာ နိုင်ငံတကာက မည်သည့်နည်းလမ်းကမဆို ပူးပေါင်း ပါဝင်လို့ရတယ်။ အဆင့်မြင့်နည်းပညာကို သုံးပြီး မွေးမြူမှာဖြစ်တဲ့အတွက်ကြောင့် မြန်မာ နိုင်ငံမှာ ပညာရှင်မလုံလောက်ဘူး။ နိုင်ငံခြား ပညာရှင်ငှားကို ငှားရမယ်။ ဈေးကွက်နဲ့ ပြုပြင် ထုတ်လုပ်ရေး ကျွမ်းကျင်သူတွေ ငှားရမယ်။ ဒါတွေက နိုင်ငံခြားရင်းနှီးမြုပ်နှံမှုအပိုင်းရော နည်းပညာအပိုင်းရော၊ ပူးပေါင်းဆောင်ရွက်လို့ရတဲ့ အပိုင်းတွေပေါ့။ ဒီပရောဂျက်ကြီးတွေ အကောင်အထည်ဖော်လာရင်တော့ အဝန်းအဝိုင်း ပြည့်စုံအောင်လုပ်ရတဲ့ သဘောမှာရှိတယ်” ဟု ဦးဝင်းကြိုင်က ပြောကြားသည်။

ငါး၊ ပုစွန်မွေးမြူရေးဇုန်ကို ကွမ်းခြံကုန်း မြို့နယ်တွင် မြေ ၉၆၄၂ ဧကနှင့် ကုန်ချော ထုတ်လုပ်နိုင်ရန် အအေးခန်းစက်ရုံကို တွံတေးမြို့နယ်တွင် မြေ ၄၀၀ ဧကဖြင့် မြေနေရာရရှိရန် ပြည်ထောင်စုအစိုးရသို့ တင်ပြထားသည်ဟု သိရသည်။

“မြေကို ခွင့်ပြုချက်တောင်းပြီးတော့ မွေးမြူရေးကန်တွေ ဖော်ထုတ်ရမယ်။ ဒါက တစ်ပိုင်း။ သို့သော် မြေနဲ့ ကန်ကြီးပဲ ရရုံနဲ့မရဘူး။နေရာမှာ ထည့်မွေးမယ့် ငါးဖြစ်စေ၊ ပုစွန်ဖြစ်စေ ကျန်းမာသန်စွမ်းပြီး အရည်အသွေးကောင်းတဲ့ သားပေါက်တွေ ထုတ်ဖို့။ ဒါကတော့ နည်းပညာအပိုင်းဖြစ်သွားပြီ။ ကိုယ်တွေ ချည်းပဲ မစွမ်းဆောင်နိုင်ရင် နိုင်ငံတကာလုပ်ငန်းရှင်တွေနဲ့ ပူးပေါင်းပြီးဆောင်ရွက်ရမယ်။ငါးသားပေါက်တွေ ပုစွန်သားပေါက်တွေ ထုတ်ဖို့၊ ထုတ်တဲ့ ငါး၊ ပုစွန်သားပေါက်တွေက လည်း အရည်အသွေးပြည့်မီတဲ့ သားပေါက် တွေဖြစ်ဖို့ လိုတယ်။ မွေးမြူပြီးတဲ့ ငါးတွေ၊ ပုစွန်တွေ ထွက်လာပြီးဆိုရင် အအေးခန်း စက်ရုံတွေ ထောင်ဖို့၊ နိုင်ငံတကာဈေးကွက်တွေတင်ပို့ဖို့က နိုင်ငံခြားရင်းနှီးမြှုပ်နှံမှုတွေ နဲ့တွဲပြီး လုပ်လို့ရတယ်။ နိုင်ငံတကာနဲ့ပူးပေါင်း ဆောင်ရွက်မှုက မဖြစ်မနေလုပ်ရမယ်”ဟု မြန်မာနိုင်ငံ ငါးလုပ်ငန်းအဖွဲ့ချုပ် အထွေထွေအတွင်းရေးမှူး ဦးဝင်းကြိုင်က ပြောကြားသည်။

Most Read

Most Recent