တနင်္သာရီတိုင်းဒေသကြီး အတွင်းရှိ ကာကွယ်ရေး ဝန်ကြီးဌာန လက်အောက်မှ ကျွန်းနှစ်ခုကို နေ့ချင်းပြန် ခရီးစဉ် သွားလာခွင့်ပြုရန် ထပ်မံတင်ပြထား

တနင်္သာရီတိုင်းဒေသကြီး အတွင်းရှိ ကာကွယ်ရေး ဝန်ကြီးဌာန လက်အောက်မှ ကျွန်းနှစ်ခုကို နေ့ချင်းပြန် ခရီးစဉ် သွားလာခွင့်ပြုရန် ထပ်မံတင်ပြထား
Published 17 March 2018

လောင်းလုံးဘုတ်ကျွန်းသို့ လာရောက်လည်ပတ်သူများအား ၂၀၁၆ ခုနှစ်အစောပိုင်းက တွေ့ရစဉ်

တနင်္သာရီတိုင်းဒေသကြီး အတွင်းရှိ မြိတ်ခရိုင်မှ ကျွန်းနှစ်ခုကို နေ့ချင်းပြန်ခရီးစဉ်အဖြစ် ခွင့်ပြုထားခဲ့ပြီး ကာကွယ်ရေးဝန်ကြီးဌာန လက်အောက်ရှိ ကျွန်းနှစ်ခုကို နေ့ချင်းပြန်ခရီးစဉ် သွားလာခွင့်ပြုရန် ထပ်မံတင်ပြထားကြောင်း သိရသည်။

တနင်္သာရီတိုင်းဒေသကြီး အတွင်းရှိ ကာကွယ်ရေး ဝန်ကြီးဌာန ထိန်းချုပ်မှုအောက်တွင်ရှိသည့် ကော့သောင်းခရိုင် ဇာဒက်ကြီး အုပ်စုထဲ၌ပါဝင်သော သူရဲကျွန်း (ခေါ်)သားရေကျွန်းနှင့် ထားဝယ်ခရိုင်ရှိ လောင်းလုံးဘုတ်ကျွန်းမှ လိပ်သောင်ကြီးအော်နှင့် အုန် ပင်အော်၊ သယံဇာတနှင့် ပတ်ဝန်းကျင် ထိန်းသိမ်းရေး လက်အောက်ရှိ မြိတ်ခရိုင် ကျွန်းစုမြို့နယ်မှ သဲနက်တန်းကျွန်းနှင့် ဒုံးကျွန်း စသည့် ကျွန်းများနှင့် ပတ်သက်၍ အများအသုံးပြုနိုင်သည့် အနေအထားမျိုး ဖြစ်စေရန် သက်ဆိုင်ရာ ဝန်ကြီးဌာနသို့ တင်ပြမှုရှိခဲ့ကြောင်း၊ ထိုသို့တင်ပြမှုကြောင့် ကျွန်းစုမြို့နယ်ရှိ သဲနက်တန်းကျွန်းနှင့် ဒုံးကျွန်းကို နေ့ချင်းပြန်ခရီးစဉ်များ ခွင့်ပြုသွားမည်ဟု ပြည်ထောင်စု သယံဇာတနှင့် ပတ်ဝန်းကျင်ထိန်းသိမ်းရေး ဝန်ကြီးက နှုတ်အားဖြင့် ပြောကြားထားခဲ့သော်လည်း ကျန်ရှိသည့် ကျွန်းနှစ်ကျွန်းမှာ ကာကွယ်ရေးဝန်ကြီးဌာန လက်အောက်တွင် ရှိသောကြောင့် ညှိနှိုင်းနေဆဲဖြစ်ပြီး လက်ရှိအချိန်အထိ အကြောင်းပြန်သေးသဖြင့် ပြန်လည်တင်ပြထားကြောင်း တိုင်းဒေသကြီး သယံဇာတနှင့် ပတ်ဝန်းကျင် ထိန်းသိမ်းရေး ဝန်ကြီးထံမှ သိရသည်။

“ကျွန်တော်တို့က သက်ဆိုင်ရာ ဝန်ကြီးဌာနကတစ်ဆင့် တင်ပြတော့ မြိတ်မှာရှိတဲ့ သဲနက်တန်းကျွန်းနဲ့ ဒုံးကျွန်းကတော့ သူတို့မှာပြန်ပြီးတော့ ပုလဲမလုပ်တော့ဘဲနဲ့ ပြန်စွန့်လွှတ်ထားတဲ့ ဧက ၁၆၀၀၀၀ ကျော်ရှိတယ်။ ဒီဧက ၁၆၀၀၀၀ ကျော်နဲ့ပတ်သက်ပြီးတော့လည်း ပြည်ထောင်စုဝန်ကြီး ကနေပြီးတော့ အဲဒီမှာ အခိုင်အမာ အဆောက်အအုံတွေ မဟုတ်ဘဲနဲ့ ညအိပ်တဲ့ အစီအစဉ်မျိုး မဟုတ်တဲ့ နေ့ချင်းပြန်ခရီးစဉ် ခွင့်ပြုမယ်ဆိုပြီးတော့ သယံဇာတနဲ့ ပတ်ဝန်းကျင် ထိန်းသိမ်းရေးဝန်ကြီး (ပြည်ထောင်စု) က နှုတ်အားဖြင့် ပြောပါတယ်။ ကျန်တဲ့ ကာကွယ်ရေး ဝန်ကြီးဌာန အောက်မှာရှိတဲ့ ကျွန်းနှစ်ကျွန်းဖြစ်ပေါ့။ ကော့သောင်းမှာရှိတဲ့ သားရေကျွန်းနဲ့လောင်းလုံးမှာရှိတဲ့ လောင်းလုံးဘုတ်ကျွန်းတို့ကတော့ သက်ဆိုင်ရာ တပ်မတော်ရေနဲ့ ညှိပြီးတော့ ဒီဟာကို အကြောင်းပြန်မယ်လို့ ဆိုပြီးတော့ ကျွန်တော်တို့ကို ပြောထားပါတယ်။ ကျွန်တော်တို့ လောင်းလုံးဘုတ်ကျွန်းကတော့ နောက်ဆုံးအဆင့် လုံခြုံရေးအရ စွန့်လွှတ်ပေးနိုင်ခြင်း မရှိသည့်တိုင်အောင် နေ့ချင်းပြန်ရအောင်တော့ သက်ဆိုင်ရာ နိုင်ငံတော်အဆင့် ဟိုတယ်နဲ့ ခရီးသွားလာရေး ဝန်ကြီးဌာနတို့ကနေတစ်ဆင့် ပြန်ပြီးတော့ နေ့ချင်းပြန်ခွင့်ပြုနိုင်ရေး အတွက်ကို ကျွန်တော်တို့ ဆက်လက်ပြီး ကြိုးစားနေတယ်” ဟု တိုင်းဒေသကြီး သယံဇာတနှင့် ပတ်ဝန်းကျင် ထိန်းသိမ်းရေးဝန်ကြီး ဦးမြင့်မောင်က ပြောကြားသည်။

ကျွန်းစုမြို့နယ်ရှိ သဲနက်တန်းကျွန်းနှင့် ဒုံးကျွန်းများပေါ်မှ ကမ်းခြေနှင့် ရေတံခွန်တို့ကြောင့် ယခုနှစ်ပိုင်းအတွင်း၌ ဒေသတွင်း ခရီးသွားများအကြား နာမည်ရလာခဲ့ပြီး သယံဇာတနှင့် ပတ်ဝန်းကျင်ထိန်းသိမ်းရေး ဝန်ကြီးဌာနက ၎င်းကျွန်းနှစ်ကျွန်းပေါ်တွင် ပုလဲမွေးမြူရေးအတွက် ရယူထားသည့် မြေများအနက်မှ ၁၆၂၁၉၅ ဧကကို သစ်တောကြိုးဝိုင်း/ကြိုးပြင် ကာကွယ်တောအဖြစ် ပြန်လည်သတ်မှတ်ရန် လျာထားခဲ့သဖြင့် ၎င်းတို့က ပြန်လည် တောင်းဆိုခဲ့သောကြောင့် ယင်းမြေပေါ်၌ နေ့ချင်းပြန်ခရီးစဉ်များကို သွားရောက်ခွင့်ပြုခဲ့ခြင်း ဖြစ်ကြောင်း အဖြေရရှိခဲ့ကြောင်း၊ ယင်းသို့ နေ့ချင်းပြန်သွားလာခွင့်ပြုကြောင်း အဖြေကို ပြီးခဲ့သည့် ဖေဖော်ဝါရီ ၂၁ ရက်က နေပြည်တော်၌ ပြုလုပ်ခဲ့သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဥက္ကဋ္ဌအဖြစ်ပါဝင်ပြီး သက်ဆိုင်ရာ ဝန်ကြီးများ ပါဝင်သည့် လုံခြုံရေး၊ တည်ငြိမ်ရေးနှင့် တရားဥပဒေစိုးမိုးရေး ကော်မတီ၏ အစည်းအဝေး အမှတ်စဉ် ၃/၂၀၁၈ ၌ ဆုံးဖြတ်ခဲ့ခြင်းဖြစ်ပြီး ယင်းသို့ခွင့်ပြုခဲ့ခြင်းကို မြိတ်ခရိုင် ခရီးသွား လုပ်ငန်းရှင်များအသင်း ဥက္ကဋ္ဌထံ အကြောင်းကြားထားပြီး ဖြစ်ကြောင်း၊ လက်ရှိအချိန်တွင် ဒုံးကျွန်း၌ မြန်မာအက်တလန်းတစ် ကုမ္ပဏီနှင့် သဲနက်တန်းကျွန်းတွင် အဏ္ဏဝါပုလဲ ကုမ္ပဏီတို့က ပုလဲမွေးမြူရေးစခန်းများ လုပ်ကိုင်နေသည်ဟု ဦးမြင့်မောင်က ပြောကြားသည်။

ထို့ပြင် ကော့သောင်းခရိုင်ရှိ သားရေကျွန်းနှင့် ထားဝယ်ခရိုင်ရှိ လောင်းလုံးဘုတ်ကျွန်းများကိုမူ တပ်မတော်ရေနှင့် ညှိနှိုင်းကာ အကြောင်းပြန်ကြားမည်ဟု ဆိုသော်လည်း လက်ရှိအချိန်အထိ အကြောင်းမပြန်သေးသဖြင့် ကာကွယ်ရေး ဝန်ကြီးဌာနထံ လိပ်မူ၍ မတ် ၁၃ ရက်က စာဖြင့်လက်မှတ်ရေးထိုး၍ ထပ်မံတင်ပြထားကြောင်း ၎င်းကဆက်လက် ပြောကြားသည်။

“လောင်းလုံးဘုတ်ကျွန်းက နေ့ချင်းပြန် ခရီးစဉ် သွားလာခွင့်သာ ပြုလိုက်မယ်ဆိုရင် ထားဝယ်ဒေသ ခရီးသွားလုပ်ငန်းအတွက် လမ်းပွင့်သွားပြီး အဆင်ပြေလိမ့်မယ်။ အခုက သွားခွင့်မပြုသေးတော့ ခရီးသွား ကုမ္ပဏီတွေ အနေနဲ့လည်း ဘာမှအဆင်မပြေဘူး ဖြစ်နေတယ်။ နေ့ချင်းပြန်သွားဖို့ တရားဝင် တောင်းဆိုနေတဲ့ အချိန်မှာ ခိုးပြီးမသွားဖို့လည်းမှာ ထားတယ်။ တရားဝင်သွားခွင့်ပြုဖို့လည်း အကြိမ်ကြိမ် စာတွေတင်ခဲ့တယ်။ ဘုတ်ကျွန်းကို ပို့ဆောင်ပေးတဲ့ ခရီးစဉ်က ဒေသခံတွေပဲ လုပ်နိုင်တာမို့ ဒီခရီးစဉ်ကို ခွင့်ပြုရင် ဒေသခံတွေ အကျိုးခံစားခွင့်ရမှာက သေချာတယ်။ ဒေသရဲ့ ခရီးသွားလုပ်ငန်း တိုးတက်ဖို့ မဖြစ်မနေ ခွင့်ပြုပေးစေချင်တယ်” ဟု ထားဝယ်ခရိုင် ခရီးသွားလုပ်ငန်းရှင်များ အသင်းဥက္ကဋ္ဌ ဒေါ်မိုးမိုးသူက ပြောကြားသည်။

လက်ရှိအနေအထားအရ ထားဝယ်ခရိုင်တွင် ကမ်းခြေအသစ်များ ပေါ်ထွက်လာခြင်းကြောင့် ပြည်တွင်းပြည်ပ ခရီးသွားများအကြား နာမည်ကျော်လာပြီး သွားလာမှု များပြားလာသဖြင့် လောင်းလုံးဘုတ်ကျွန်းကို တရားဝင် သွားလာခွင့်ပြုခဲ့ပါက ဒေသတွင်းခရီးသွား လုပ်ငန်းကို တရှိန်ထိုး မြင့်တက်လာစေလိမ့်မည်ဟု ခရီးသွား လုပ်ငန်းရှင်များ၏ ပြောကြားချက်အရ သိရသည်။

 

Most Read

Most Recent