ပခုက္ကူတက္ကသိုလ် ကျောင်းသားများသမဂ္ဂအဖွဲ့ဝင် မောင်သက်မောင်မောင်နှင့် ပတ်သက်၍ သက်ဆိုင်ရာ တာဝန်ရှိသူများ၏ ဆောင်ရွက်ချက်သည် တပ်မတော်မှ ထုတ်ပြန်ထားသော အမိန့်၊ ညွှန်ကြားချက်၊ စည်းကမ်း၊ လုပ်ထုံးလုပ်နည်းများနှင့်အညီ ဆောင်ရွက်ခဲ့ခြင်းဖြစ်ကြောင်း တပ်မတော်သတင်းမှန် ပြန်ကြားရေးအဖွဲ့က မတ် ၁၃ ရက်ညနေပိုင်းတွင် သတင်းထုတ်ပြန်သည်။
အဆိုပါ သတင်းထုတ်ပြန်ချက်တွင် အချက်လေးချက်ပါရှိပြီး ထုတ်ပြန်ချက် အမှတ်စဉ် ၃ နှင့် ၄ တွင် ဖွဲ့စည်းပုံ အခြေခံဥပဒေ ပုဒ်မ ၃၃၇ အရ တပ်မတော်သည် နိုင်ငံတော် ကာကွယ်ရေးအတွက် အဓိက အကျဆုံးသော လက်နက်ကိုင် အဖွဲ့အစည်း ဖြစ်သဖြင့် အဖွဲ့အစည်းအတွင်း၌ စည်းကမ်းတကျရှိရန် ကျစ်လျစ်ခိုင်မာသော စည်းလုံးမှု၊ ညီညွတ်မှုရှိရန် မရှိမဖြစ် လိုအပ်ကြောင်း၊ ထို့ကြောင့် တပ်မတော်အနေဖြင့် သက်ဆိုင်ရာ တပ်အလိုက် “တပ်တည်မြဲအမိန့်” (Unit Standing Order) များထုတ်ပြန်ပြီး အရာရှိ၊ စစ်သည် အဆင့်အတန်းအားလုံး၊ တပ်တွင်းနေမှီခိုသူ မိသားစုဝင်အားလုံး နေ၊ ထိုင်၊ သွားလာမှု စည်းကမ်းစနစ်တ ကျ ရှိရေး၊ တပ်တွင်း စည်းလုံးညီညွတ်မှုရှိရေး ဆောင်ရွက်ရပါသည်။ တပ်တည်မြဲအမိန့်တွင် စစ်သည်အဆင့် အတန်းအားလုံးအား နိုင်ငံရေးပါတီများနှင့် ဆက်သွယ်ခြင်း၊ နိုင်ငံရေးလှုပ်ရှားမှုများတွင် ပါဝင်ပတ်သက်ခြင်း၊ နိုင်ငံတော်အစိုးရနှင့် တပ်မတော်၏ လုပ်ဆောင်ချက်များကို မလိုလားသော သဘောဖြင့် ဆန့်ကျင်မှုပြုလုပ်ခြင်း၊ လှုံ့ဆော်ဝါဒဖြန့်ခြင်း၊ ဝိုင်းဖွဲ့ဆွေးနွေးခြင်း၊ ဆူပူမှုအတွက် အားပေးအားမြှောက်ပြုခြင်းတို့ကို တားမြစ်ထားပါသည်။ ထို့အပြင် အရာရှိ၊ အရာခံ၊ အကြပ်နှင့် တပ်သားတို့အား လိုက်နာရန် သတ်မှတ်ထားသော စည်းကမ်းဟူသမျှသည် သက်ဆိုင်ရာ အိမ်ထောင်သည်၊ မှီခိုသူများနှင့်လည်း အကျူံးဝင်ကြောင်း သိရှိထားရမည်ဟု စည်းကမ်းသတ်မှတ်ထားကြောင်း၊ အဆိုပါ စည်းကမ်းချက်များမှာ တပ်မတော်တစ်ရပ်လုံး အတွက် ထုတ်ပြန်ထားခြင်းဖြစ်ပြီး ယင်းတို့ကို သိရှိလိုက်နာနိုင်မှသာ တပ်တွင်းလိုက်ပါ နေထိုင်ခွင့်ရရှိမည်ကို တပ်မတော်သား အားလုံးနှင့် မှီခိုသူများအားလုံး သိရှိကြပြီးဖြစ်သဖြင့် အထက်ပါကိစ္စနှင့် ပတ်သတ်ပြီး သက်ဆိုင်ရာ တာဝန်ရှိသူများက လုပ်ထုံးလုပ်နည်းနှင့်အညီ ဆောင်ရွက်ခဲ့ခြင်းဖြစ်ကြောင်း ဖော်ပြပါရှိသည်။
ထို့အပြင် မောင်သက်မောင်မောင် ကိစ္စနှင့်ပတ်သက်၍ ကန့်ကွက်ကြောင်း သဘောထား ထုတ်ပြန်ချက်များ၊ သတင်းများအား ကျောင်းသားသမဂ္ဂအဖွဲ့များ၊ သတင်းမီဒီယာအချို့နှင့် လူမှုကွန်ရက် စာမျက်နှာအချို့၌ ဖော်ပြရေးသား၍ တပ်မတော်အပေါ် အထင်အမြင်လွဲမှားစေရန် ဆောင်ရွက်လျက်ရှိသည်ကို တွေ့ရကြောင်း၊ မောင်သက်မောင်မောင်အပေါ် အရေးယူဆောင်ရွက်မှုနှင့် ပတ်သက်၍ လုံခြုံရေးတာဝန် ထမ်းဆောင်နေသည့် မောင်သက်မောင်မောင်၏ ဖခင်ထံ အကြောင်းကြားခဲ့ရာ မောင်သက်မောင်မောင်၏ ဖခင်ဖြစ်သူကလည်း သဘောတူသည်ဟု အကြောင်းပြန်ကြားခဲ့ကြောင်း ထုတ်ပြန်ချက်တွင် ပါရှိသည်။
မောင်သက်မောင်မောင်သည် အမှတ် (၂၅၆) ခြေလျင်တပ်ရင်းတွင် တာဝန်ထမ်းဆောင်လျက်ရှိသည့် စစ်သည်တစ်ဦး၏ သားဖြစ်ပြီး ပခုက္ကူတက္ကသိုလ်၊ ရူပဗေဒဌာနတွင် ဒုတိယနှစ် ပညာသင်ကြားနေကာ ပခုက္ကူကျောင်းသားများ သမဂ္ဂ၏ အတွင်းရေးမှူး တာဝန်ကို ထမ်းဆောင်လျက်ရှိကြောင်း မောင်သက်မောင်မောင်ကို တပ်တွင်းလုံးဝ ဝင်ခွင့်မပြုရေးနှင့် တပ်မတော်သားများ၏ မှီခိုသူ သား၊ သမီးများ ကျောင်းသားများ သမဂ္ဂတွင် ပါဝင်ဆောင်ရွက်မှု မရှိစေရေး ကြော်ငြာချက်ကို ၂၀၁၈ခုနှစ် ဖေဖော်ဝါရီလ ၂၀ ရက်နေ့ ရက်စွဲဖြင့် အကြောင်းကြားစာ ပေးပို့ခဲ့ကြောင်း ထိုစာသည် နိုင်ငံသားတစ်ဦး (သို့) တက္ကသိုလ် ကျောင်းသားတစ်ဦး၏ ရပိုင်ခွင့်ကို ချိုးဖောက်နေသည့်အပြင် သမဂ္ဂ၏ ရပ်တည်ချက်ကိုပါ ထိပါးနေသောကြောင့် ပြင်းထန်စွာ ရှုတ်ချကန့်ကွက်ကြောင်း မန္တလေးတက္ကသိုလ် ကျောင်းသားများသမဂ္ဂက ကြေညာချက် ထုတ်ပြန်ထားသည့်အပြင် အခြားကျောင်းသားသမဂ္ဂ အသီးသီးကလည်း ကန့်ကွက်ကြောင်း သဘောထားများ ထုတ်ပြန်ကြေညာ ခဲ့ကြသည်။
