ရခိုင်ပြည်နယ်အတွင်းမှ ငါးဖမ်းလှေတစ်စင်းကို တွေ့ရပုံ (ဓာတ်ပုံ-ဦးသန်းထွန်း)

ရခိုင်ပြည်နယ်အတွင်း သယံဇာတရှားပါးလာမှုနှင့် ငါးနေငါးထိုင်တောများ ကာကွယ်နိုင်ရန်အလို့ငှာ တားမြစ်အချိန်ကာလ၊ တားမြစ်ဧရိယာ၊ တားမြစ်ပိုက်ကွက်အမျိုးအစားကို အချိန်နှင့်တစ်ပြေးညီ အမိန့်ကြေညာချက်များ ထုတ်ပြန်ပြီး တားမြစ်သင့်ပါကြောင်း ရခိုင်ပြည်နယ်အစိုးရအား တိုက်တွန်းကြောင်းအဆိုကို ကျောက်ဖြူမြို့နယ် အမှတ် (၁) မဲဆန္ဒနယ်မှ ဦးကျော်လွင်က တင်သွင်းရာ ယင်းအဆိုအား ဆက်လက်ဆွေးနွေးရန်အတွက် ရခိုင်ပြည်နယ်လွှတ်တော်က အတည်ပြုလိုက်ကြောင်း သိရသည်။

ယင်းသို့ အဆိုတင်သွင်းရခြင်းသည် မြစ်ချောင်းများအတွင်း ငါးဖမ်းပိုက်မျိုးစုံ ထောင်ဖမ်းခြင်းနှင့် သားပေါက်ရာသီအတွင်း ငါးမဖမ်းရနယ်မြေများ သတ်မှတ်ထုတ်ပြန်ချက်များကို မတွေ့ရှိရသည့်အတွက် နောင်နှစ်ပေါင်းများစွာကြာလာသည်နှင့်အမျှ မြစ်ချောင်းများတွင် ပေါက်ဖွားလေ့ရှိသော ငါးပုစွန်မျိုးစိတ်များ ပျောက်ကွယ်သွားမည်ကို စိုးရိမ်စရာရှိကြောင်း လွှတ်တော်ကိုယ်စားလှယ်များက ပြောကြားသည်။

ယင်းနှင့်ပတ်သက်ပြီး အဆိုတင်သွင်းသူ ဦးကျော်လွင်က “တကယ်တော့ ရေချိုငါးလုပ်ငန်းဥပဒေဆိုတာ ထုတ်ပြန်ပြီးဖြစ်ပါတယ်။ ဒါပေမဲ့ အခုအချိန်ထိ ရခိုင်ပြည်နယ်အစိုးရက ဘာမှလုပ်တာလည်း မတွေ့ရဘူး။ ငါးသားပေါက်တွေ ထိန်းသိမ်းတဲ့နယ်မြေတွေကိုလည်း သတ်မှတ်တာမတွေ့ရဘူး။ ငါးမဖမ်းရတဲ့ ပိုက်အမျိုးအစားတွေနဲ့ ပတ်သက်ပြီးတော့ ထုတ်ပြန်တားဆီးတာမျိုး မရှိဘူးဆိုတော့ ကျွန်တော်တို့ရခိုင်ပြည်နယ်အတွက် အတော်လေးအရေးကြီးတဲ့ ကိစ္စတစ်ရပ်ဖြစ်နေတာကြောင့် အခုလိုအဆိုတင်သွင်းရတာ ဖြစ်ပါတယ်။ အခုဆိုရင် သားငါးပုစွန်တွေ ပြုန်းတီးနေတဲ့အခြေအနေကို ရောက်နေပြီဖြစ်တယ်။ မြစ်ကြောင်းချောင်းကြောင်းတစ်လျှောက်မှာ အာထောက်ပိုက်လို့ခေါ်တဲ့ ကျားပါးစပ်ပိုက်တွေက အစီအရီထောင်ထားတော့ ဘယ်ငါးက သားပေါက်မျိုးပွားနိုင်တော့မှာလဲ” ဟုဆိုသည်။

ငါးပုစွန် သားပေါက်ရာသီအတွင်း ငါးပုစွန်များနှင့် ဥကပ်ပုစွန်များကို ဖမ်းဆီးခြင်းများဖြင့် ကမ်းနီးတွင်လာရောက် မျိုးပွားသောငါးများအနေဖြင့် မျိုးသုဉ်းလာနိုင်ခြေရှိသည့်အတွက် ရခိုင်ရေလုပ်သားအနေဖြင့်လည်း ငါးပုစွန်ဖမ်းဆီးနိုင်မှု လျော့ကျသွားနိုင်ကာ မိသားစုဝင်ငွေကိုပါ ထိခိုက်လာနိုင်သဖြင့် အရေးတယူလုပ်ဆောင်ရန် လိုအပ်ကြောင်း သိရသည်။

အဆိုနှင့်ပတ်သက်ပြီး ဆွေးနွေးလိုသူများအား အမည်စာရင်းတင်သွင်းရန်နှင့် နောက်ရက်များတွင် ဆက်လက်ဆွေးနွေးရန် ရခိုင်ပြည်နယ်လွှွတ်တော်က အတည်ပြုခဲ့ခြင်းဖြစ်ကြောင်း သိရသည်။