ဆေးလိပ်အပေါ် အခွန်ကောက်ခံမည့် နှုန်းထားသည် ယခင်နှစ်ထက် လျော့နည်းနေသည့်အတွက် အခွန်နှုန်းတိုးမြှင့် ကောက်ခံသင့်ကြောင်း ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေနှင့် ပတ်သက်ပြီး လွှတ်တော်ကိုယ်စားလှယ်များ ဆွေးနွေးခဲ့သည်။
ရခိုင်ပြည်နယ် မဲဆန္ဒနယ်အမှတ် ၁၁ မှ ဒေါ်ထုမေက “ဆေးလိပ်အပေါ် အခွန်နှုန်းထားတွေကို ရာခိုင်နှုန်းဖြင့် သတ်မှတ်ခြင်းမရှိဘဲ ကျပ်ငွေဖြင့် ပုံသေ သတ်မှတ်ထားသည့်အတွက် ရောင်းဈေးတန်ဖိုး တက်လာပေမယ့် အခွန်တိုးရရှိခြင်း မရှိသည်ကို တွေ့ရပါတယ်။ ရာခိုင်နှုန်းအားဖြင့် ကျဆင်းသွားသည်ကို တွေ့ရမှာဖြစ်ပြီးတော့ ကျပ်ငွေနဲ့ ပုံသေ သတ်မှတ်မယ့်အစား ရာခိုင်နှုန်းနဲ့ ပြင်ဆင်သတ်မှတ်မယ်ဆိုပါက ဆေးလိပ်ဘူး များရင်များသလို အခွန်ရရှိမှာ ဖြစ်ပါတယ်။ ဒါ့အပြင် အ ထူးကုန်စည်ခွန် ပုဒ်မ ၁၁ မှာ ဆေးပေါ့လိပ်နဲ့ ပတ်သက်ပြီးတော့ ပြင်ဆင်ပြဋ္ဌာန်းရာမှာ တစ်လိပ်အတွက် အခွန်နှုန်းထား ၂၅ ပြားလိ့ု ပြင်ဆင်ပြဋ္ဌာန်းထားတာ တွေ့ရပါတယ်။ မူလဥပဒေမှာ တစ်လိပ်ကို ၁၀ ကျပ်ဖြစ်ရင် ပြား ၅၀ သတ်မှတ်ပြီးတော့ ဆေးပေါ့လိပ်အတွက် တန်ဖိုးတိုးမြှင့် သတ်မှတ်ထားခြင်း မရှိဘဲ ဆေးပေါ့လိပ်ကို တစ်လိပ်ကို တစ်ကျပ်နှုန်း ကောက်ခံသင့်ကြောင်း ဆွေးနွေးလိုပါတယ်။ ဆေးလိပ်နဲ့ ဆေးရွက်ကြီး သုံးစွဲမှုဟာ နိုင်ငံသူနိုင်ငံသားတွေအတွက် ကောင်းကျိုး မရှိဘဲ ကျန်းမာရေးနဲ့ လူမှုရေးဆိုင်ရာ ဆိုးကျိုးတွေကို ဖြစ်ပေါ်စေပါတယ်။ ကျန်းမာရေးအတွက် ဆေးလိပ်နဲ့ ဆေးရွက်ကြီး သုံးစွဲမှုကို ထိရောက်စွာ ထိန်းချုပ်ဖို့ လိုအပ်ပါတယ်။ ဒီလိုထိန်းချုပ်နိုင်ဖို့အတွက် ဆေးလိပ်အမျိုးမျိုး သောက်သုံးမှုအန္တရာယ်ကို ကျယ်ကျယ် ပြန့်ပြန့် အသိပေးဖို့လိုသလို ဆေးလိပ်အမျိုးမျိုးရဲ့ အခွန်နှုန်းထား အဖိုးချိုသာမှုနဲ့ လွယ်လင့်တကူ ဝယ်ယူသုံးစွဲနိုင်မှုကို အထူးကုန်စည်ခွန်နဲ့ သက်ဆိုင်ပြီးတော့ ထိန်းကျောင်းသင့်ပါတယ်။ အခွန်နှုန်းထားကို ထိရောက်ရောက်တဲ့ ပမာဏဖြစ်သင့်ပါတယ်။ ဒါကြောင့် တစ်လိပ်ကို တစ်ကျပ်နှုန်း သတ်မှတ်သင့်ပါတယ်”ဟု ဆွေးနွေးခဲ့သည်။
ဆေးရွက်ကြီး၊ ဗာဂျီးနီးယား ပေါင်းတင်ပြီးဆေးများအား အခွန်နှုန်း ၆၀ ရာခိုင်နှုန်းအဖြစ် မူလ သတ်မှတ်ထားသည့်အတိုင်း သတ်မှတ်သင့်ကြောင်း ဥပဒေကြမ်း ပူးပေါင်းကော်မတီက အကြံပြုထားပြီး ဆေးပေါ့လိပ် တစ်လိပ်ရောင်းဈေး ၁၀ ကျပ်အထိ ဖြစ်ပါက တစ်လိပ်လျှင် ပြား ၅၀၊ တစ်လိပ်ရောင်းဈေး ၁၁ ကျပ်နှင့်အထက်ဖြစ်လျှင် တစ်လိပ်လျှင် ၁ ကျပ်နှုန်း အခွန်ကျသင့်ရမည်ဟု မူလဥပဒေတွင် ပြဋ္ဌာန်းထားသော်လည်း ဥပဒေကြမ်း ပူးပေါင်းကော်မတီက တစ်လိပ် ၂၅ ပြား သတ်မှတ်ရန် အကြံပြုထားသည်။
ကယားပြည်နယ် မဲဆန္ဒနယ်အမှတ် ၉ မှ ဦးစိုးသိန်းက “အထူးကုန်စည်ခွန် အခန်း ၅ ပုဒ်မ ၁၁ (က၊ခ) ယခင်နှစ်နှုန်းထား ပြား ၅၀၊ တစ်ကျပ်မှ ယခုနှစ်နှုန်းထား ၂၅ ပြားသို့ လျှော့ချခဲ့ခြင်းကို ပြန်လည် သုံးသပ်သင့်ပါတယ်။ ကမ္ဘာ့နိုင်ငံတွေမှာ ပြည်သူတွေရဲ့ ကျန်းမာရေးကို ထိခိုက်ပျက်ပြားစေသော ကုန်စည်များဖြစ်သည့် စီးကရက်၊ ဆေးလိပ်၊ အရက်ကဲ့သို့သော ကုန်စည်များ၏ ထုတ်လုပ်မှုကဏ္ဍ၊ တင်သွင်းမှုကဏ္ဍများ လျော့ပါးစေရေးအတွက် ယင်းကုန်စည်များကို မြင့်မားသော အခွန်နှုန်းဖြင့် ကောက်ခံပြီး ထိန်းချုပ်ထားတာ ဖြစ်ပါတယ်”ဟု ဆွေးနွေးပြောကြားသည်။
အထူးကုန်စည်ခွန် ဥပဒေအရ အခွန်ကျသင့်သည့် အထူးကုန်စည်များအနက် သမဝါယမကဏ္ဍနှင့် ပုဂ္ဂလိကကဏ္ဍများက ပြည်တွင်း၌ ထုတ်လုပ်ရောင်းချသည့် ဆေးရွက်ကြီး၊ ဆေးပေါ့လိပ်နှင့် ဆေးပြင်းလိပ် ထုတ်လုပ်ရောင်းချခြင်းအတွက် နှစ်တစ်နှစ်အတွင်း ထုတ်လုပ်ရောင်းရငွေ စုစုပေါင်း ကျပ်သိန်း ၂၀၀ တိတိထက် မပိုလျှင် အထူးကုန်စည်ခွန် စည်းကြပ်ခြင်းမပြုရဟု မူလဥပဒေတွင် ပြဋ္ဌာန်းထားသည့်အတိုင်း ထားရှိသင့်ကြောင်း ဥပဒေကြမ်းပူးပေါင်းကော်မတီက အစီရင်ခံစာ တင်သွင်းထားသည်။
