အင်းတော်မြို့နယ်တံတားနှစ်စင်း ပျက်စီးနေမှုနှင့် ပတ်သက်၍သက်ဆိုင်ရာဝန်ကြီး၏ ဖြေကြားမှုအပေါ် မေးခွန်းမေးမြန်းခဲ့သည့် အင်းတော်မြို့နယ် မဲဆန္ဒနယ်မြေအမှတ် (၂) တိုင်းလွှတ်တော် ဦးသန်းဝင်းက ကျေနပ်မှုမရှိခဲ့ကြောင်း သိရသည်။
ဒုတိယအကြိမ် စစ်ကိုင်းတိုင်းဒေသကြီး လွှတ်တော် (၁၃) ကြိမ်မြောက် ပုံမှန်အစည်းအဝေးတွင် ၂၀၁၅-၂၀၁၆ ဘဏ္ဍာရေးနှစ်၌ ၃၄၅ ကုမ္ပဏီက တာဝန်တည်ဆောက်ခဲ့သော အင်းတော်မြို့နယ် ပုန်းဟုန်ကျေးရွာနှင့် ရွှေဘို-မြစ်ကြီးနားလမ်းကို ဆက်သွယ်သည့် တံ တားနှင့် ပေကုန်း-မြသလဝင်ကျေးရွာချင်း ဆက်လမ်းပေါ်ရှိ တံတားနှစ်စင်းမှာ သက်တမ်းကာလနှစ်နှစ်မပြည့်မီပျက်စီးနေသဖြင့် ယင်းကုမ္ပဏီအား တင်ဒါစည်းမျဉ်း၊ စည်းကမ်းများနှင့်အညီ မည်ကဲ့သို့ စီစဉ်ဆောင်ရွက်မေးမည်ကို သိရှိလိုကြောင်း အင်းတော်မြို့ နယ်မဲဆန္ဒနယ်မြေအမှတ် (၂) တိုင်းလွှတ်တော် ဦးသန်းဝင်းက မေးမြန်းခဲ့ခြင်းဖြစ်သည်။
“ဝန်ကြီးအဖြေကို ကျေနပ်မှုမရှိဘူး။ ဘာလို့လဲဆိုတော့ တာဝန်ရှိတဲ့ဝန်ကြီးက ခရီးသွားနေတယ်ဆိုလို့ လူမှုရေးဝန်ကြီးကို လွှဲထားခဲ့တယ်။ ဆိုတော့ မေးခွန်းမေးတာ ခက်သွားတာပေါ့။ ကျွန်တော်တို့ဆီမှာက မိုးကောင်းတဲ့ အရပ်ဆိုတော့ မိုးဦးမှာ မိုးရွာပြီး ရေကြီးရင် အဲဒီတံတားအောက်ခြေကနေ လှိုက်စားပြီး တံတားပျက်စီးမှု ဖြစ်နိုင်ပါတယ်။ အဲဒီတံတားပျက်စီးတာနဲ့ တံတားအနီးက ကျေးရွာတွေ သွားလာရေးအတွက် အခက်အခဲတွေ့ပါလိမ့်မယ်။ အဲဒီတံတားက မော်လူးကို ဈေးသွားဈေးပြန် ကျောင်းသွား ကျောင်းပြန် လုပ်နေရတဲ့ တံတားဖြစ်ပါတယ်။ ဒီနေ့ ကျွန်တော့်မေးခွန်းအပေါ် ဖြေကြားခဲ့တဲ့ အဖြေကတော့ အားရကျေနပ်မှုမရှိပါဘူး။သက်ဆိုင်ရာဝန်ကြီးကနေ ပြန်ပြီး ဖြေပေးစေချင်တယ်” ဟု အင်းတော်မြို့နယ်မဲဆန္ဒ နယ်မြေအမှတ် (၂) တိုင်းလွှတ်တော်ဦးသန်းဝင်းက ပြောကြားသည်။
၂၀၁၅-၂၀၁၆ ဘဏ္ဍာရေးနှစ် ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ခွင့်ပြုချက်ငွေဖြင့် ယင်းတံတားနှစ်စင်းအား တည်ဆောက်ခဲ့သည့် လုပ်ငန်းဖြစ်သည့် အတွက် သတ်မှတ်စံချိန်စံညွှန်းများဖြင့် ညီ မညီ စစ်ဆေးဆောင်ရွက်မည်ဆိုပါက ကျေးလက် ဒေသဖွံ့ဖြိုးတက်ရေးဦးစီးဌာနနှင့်အတူ ပူးပေါင်းဆောင်ရွက်မည်ဖြစ်ကြောင်း စစ်ကိုင်းတိုင်းဒေသကြီးအစိုးရအဖွဲ့ဝင် လူမှုရေးဝန်ကြီး ဒေါက်တာဇော်ဝင်းက ပြောကြားသည်။
ပုန်းဟုန်ကျေးရွာနှင့် ရွှေဘို - မြစ်ကြီးနားလမ်းကို ဆက်သွယ်သည့် တံတားနှင့် ပေကုန်း - မြသလဝင်ကျေးရွာချင်းဆက်လမ်းပေါ်ရှိ တံတားနှစ်စင်းကို ၂၀၁၅-၂၀၁၆ ခုနှစ် ဘဏ္ဍာရေးနှစ်က ကျေးလက်ဒေသဖွံ့ဖြိုး တိုးတက်ရေးဦးစီးဌာနမှခွင့်ပြုငွေ ကျပ် ၇၂ သန်းဖြင့်လည်းကောင်း၊ ယင်းဘဏ္ဍာရေးနှစ်တွင် ခွင့်ပြုငွေ ကျပ် ၂၇ သန်းဖြင့် တင်ဒါ အောင်မြင်ခဲ့သည့် ၃၄၅ ကုမ္ပဏီက တည် ဆောက်ခဲ့ခြင်းဖြစ်သည်။
