ကုလသမဂ္ဂ၏ အေဂျင်စီတစ်ခုဖြစ်သော အပြည်ပြည်ဆိုင်ရာ မူးယစ်ဆေးဝါး ထိန်း ချုပ်ရေးဘုတ်အဖွဲ့ (International Narcotics Contril Board - INCB) က ၂၀၁၇ ခုနှစ်၏ ကမ္ဘာ့မူးယစ်ဆေးဝါးဆိုင်ရာ အစီရင်ခံစာကို မတ် ၁ ရက်တွင် ထုတ်ပြန်ခဲ့ရာ မြန်မာနိုင်ငံသည် အာဖဂန်နစ္စတန်နိုင်ငံ၏နောက် ကမ္ဘာ့ဘိန်းစိုက်ပျိုးမှု ဒုတိယအများဆုံးနိုင်ငံ ဖြစ်ကြောင်း ဖော်ပြထားသည်။
မြန်မာနိုင်ငံ၏ ဘိန်းစိုက်ပျိုးမှုသည် ၂၀၀၆ ခုနှစ်၌ အနိမ့်ဆုံးသို့ ကျသွားခဲ့သော်လည်း တဖြည်းဖြည်း ပြန်လည် တိုးတက်လာနေခဲ့သည်ဟု အစီရင်ခံစာက ဖော်ပြသည်။
ဘိန်းစိုက်ပျိုး ထုတ်လုပ်မှု၏ ရာခိုင်နှုန်း ၉၀ သည် ရှမ်းပြည် မြောက်ပိုင်းမှဖြစ်ပြီး မူးယစ်ဆေးဝါးနှင့် ရာဇဝတ်မှုဆိုင်ရာ ကုလသမဂ္ဂရုံး (UNODC) ၏ နောက်ဆုံး ကောက်ယူခဲ့သည့် စစ်တမ်းအရ ရှမ်းပြည်နယ်အတွင်း ဘိန်းစိုက်ပျိုး ထုတ်လုပ်မှုသည် ၂၀၁၆ ခုနှစ်၌ ပိုမိုတိုးတက်လာသည်ဟု ဆိုသည်။
တစ်ချိန်တည်းမှာပင် မြန်မာနိုင်ငံအတွင်း မက်သာဖက်တမင်းဟု ခေါ်သော စိတ်ကြွဆေးပြား ထုတ်လုပ်မှုများ တိုးတက်လာနေပြီး ၂၀၁၆ ခုနှစ်အတွင်း စိတ်ကြွဆေးပြား နှစ်တန်ခွဲကို ဖမ်းဆီးမိခဲ့သေးသည်။
၎င်းအပြင် ဘိန်းဖြူနှင့် Fentanyl တင်ပို့မှုများသည် မက္ကဆီကိုနှင့် အမေရိကန်ပြည်ထောင်စုတို့၌ တိုးပွားလာနေသည်ဟု အစီရင်ခံစာက ဖော်ပြသည်။
ကမ္ဘာတစ်ဝန်း မူးယစ်ဆေးဝါး ထုတ်လုပ်သုံးစွဲမှုအကြောင်း အသေးစိတ် ဖော်ပြထားသော နှစ်ပတ်လည် အစီရင်ခံစာကို မတ် ၁ ရက်တွင် INCB က ထုတ်ပြန်လိုက်ခြင်း ဖြစ်သည်။ ယင်းတွင် မူးယစ်ဆေး သုံးစွဲမှုကြောင့် ကျန်းမာရေးပြဿနာများ ခံစားနေရသူများအတွက် ကုသခွင့်ရရှိနိုင်ရေး အာမခံချက်၏ အရေးကြီးပုံကို အလေးအနက်ထား ဖော်ပြခဲ့ပြီး မူးယစ်ဆေး သုံးစွဲမှုကြောင့် ဖြစ်ပေါ်သော ကျန်းမာရေးပြဿနာများကို ကုသပေးခြင်းအား လူ့အခွင့်အရေး တစ်ရပ်ဟု ဖော်ပြသွားရန် ပြောကြားထားသည်။ “အပြည်ပြည်ဆိုင်ရာ မူးယစ်ဆေးထိန်းချုပ်မှု သဘောတူညီချက်တွေမှာ ပါဝင်သူတွေအဖြစ် အစိုးရအဖွဲ့တွေဟာ မူးယစ်ဆေး စွဲနေသူတွေကို ကုသပေးတဲ့ ဌာနတွေ ထောက်ပံ့ဖို့ လိုအပ်ပါတယ်” ဟု အစီရင်ခံစာ၌ ပြောကြားထားသည်။
