တောင်သူလယ်သမားနေ့ အခမ်းအနားသို့ တက်ရောက်လာသူများ လှိုင်သာယာမြို့နယ်အတွင်း လမ်းလျှောက်ချီတက်နေသည်ကို မတ် ၂ ရက်ကတွေ့ရစဉ် (ဓာတ်ပုံ- ရှိုင်းလင်းအောင်)

မတ်၂ ရက် (တောင်သူလယ်သမားနေ့) တွင် တိုင်းဒေသကြီးနှင့် ပြည်နယ်အသီးသီးရှိ အင်အား ၄၀၀၀ ခန့်ရှိ တောင်သူလယ်သမားများ လှိုင်သာယာမြို့နယ် နဝဒေးမှတ်တိုင်မှ စက်မှုဇုန်မှတ်တိုင်အထိ ကြွေးကြော်သံများနှင့် ချီတက်ခဲ့ကြောင်း သိရသည်။

လမ်းလျှောက်ချီတက်ရာတွင် အစိမ်းရောင် တူညီဝတ်စုံများ ဝတ်ဆင်၍ ‘လယ်သမားထု သွေးစည်းညီညွတ်ရေး...၊ လယ်ယာမြေ ဥပဒေပြင်ဆင်ရေး...၊ လယ်ယာကဏ္ဍ တိုးတက်ရေး...’ စသည့် ကြွေးကြော်သံများ၊ သံချပ်များရွတ်ဆိုခဲ့ကြောင်း သိရသည်။

ထု့ိနောက် ချီတက်လမ်းလျှောက်သည့် လယ်သမားများက လှိုင်သာယာစက်မှုဇုန် မှတ်တိုင်အနီးရှိ ဘောလုံးကွင်းအတွင်း စုဝေး၍ တောင်သူလယ်သမားနေ့ အထိမ်းအမှတ် အခမ်းအနားကို ပြုလုပ်ခဲ့ကြောင်း သိရသည်။

တောင်သူလယ်သမားနေ့ အခမ်းအနားတွင် မြန်မာနိုင်ငံ တောင်သူလယ်သမားနှင့် စိုက်ပျိုးရေး အလုပ်သမား သမဂ္ဂများအဖွဲ့ချုပ်ဥက္ကဋ္ဌ ဦးသန်းဆွေက မြန်မာနိုင်ငံ၏ စီးပွားရေးသည် လယ်ယာစိုက်ပျိုးရေးကို အခြေခံသော စီးပွားရေးဖြစ်ကြောင်း၊ ကမ္ဘာ့လူဦးရေ တိုးတက်များပြားလာသည်နှင့်အမျှ ဘေးအန္တရာယ် ကင်းရှင်းသော၊ အာဟာရပြည့်ဝသော စားနပ်ရိက္ခာ ဖူလုံရေးသည် အရေးကြီးသော ကိစ္စတစ်ရပ် ဖြစ်လာကြောင်း၊ မြန်မာနိုင်ငံသည် လယ်ယာစိုက်ပျိုးရေးနိုင်ငံ ဖြစ်သည့်အတွက် များစွာအားသာကြောင်း၊ ဈေးကွက်အရ ကြည့်မည်ဆိုရင် ကမ္ဘာ့လူဦးရေ အများဆုံးဖြစ်သော တရုတ်နှင့် အိန္ဒိယ နှစ်နိုင်ငံကြားတွင် ရှိကြောင်း၊ သယ်ယူပို့ဆောင်ရေးစရိတ် သက်သာစွာဖြင့် အဆိုပါနိုင်ငံ နှစ်နိုင်ငံရှိ စားသုံးသူများကို ရောင်းချနိုင်မည် ဖြစ်ကြောင်း၊ အခြားသော အာရှနိုင်ငံများ၊ အနောက်နိုင်ငံများကိုလည်း ရောင်းချနိုင်မည် ဖြစ်ကြောင်း၊ ထိုကဲ့သို့ ဈေးကွက်ရှိနေသည့် အနေအထားတွင် လယ်ယာစိုက်ပျိုးရေး ကဏ္ဍသည် မြန်မာနိုင်ငံ၏ စီးပွားရေးကဏ္ဍကို အထောက်အကူ ပြုသင့်သလောက်မပြု ဖြစ်နေရသည့် အကြောင်းရင်းမှာ လယ်သမားများတွင် အခက်အခဲများစွာနှင့် ရင်ဆိုင်နေရခြင်း ဖြစ်ကြောင်း၊ လယ်ယာစိုက်ပျိုးရေးလုပ်မည့် လယ်သမားများ ရင်ဆိုင်နေရသည့် အခက်အခဲများမှာ မြေထု၊ မျိုးစေ့၊ နည်းပညာ၊ အရင်းအနှီး၊ လုပ်အား စသည်တို့ဖြစ်ကြောင်း ပြောကြားသည်။

လှိုင်သာယာမြို့နယ်အတွင်း လမ်းလျှောက်ချီတက်နေသူများကို တွေ့ရစဉ်

ဆက်လက်ပြီး ဦးသန်းဆွေက “မြန်မာနိုင်ငံမှာ မြေလွတ်၊ မြေလပ်၊ မြေရိုင်းများစွာ ရှိပါသေးတယ်။ အဲဒီမြေလွတ်၊ မြေလပ်၊ မြေရိုင်းတွေကို လယ်ယာစိုက်ပျိုးရေး ကဏ္ဍအတွက် အကျိုးရှိစွာ အသုံးမပြုနိုင်သေးပါဘူး။ လက်ရှိ စိုက်ပျိုးနေတဲ့ စိုက်ပျိုးမြေတွေကိုလည်း နည်းစနစ်ကျကျ၊ အကျိုးရှိရှိ ထိထိရောက်ရောက် အသုံးချနိုင်ခြင်း မရှိသေးပါဘူး။ မြေလွတ်၊ မြေလပ်၊ မြေရိုင်းဥပဒေကလည်း တကယ်လယ်လုပ်ချင်တဲ့ သူတွေအတွက် အဟန့်အတား ဖြစ်နေတယ်။ ဒါက ဘာလဲဆိုတော့ ၁၉၉၁ခုနှစ်၊ ၂၀၁၂ ခုနှစ် မြေလွတ်၊ မြေလပ်၊ မြေရိုင်းများ စီမံခန့်ခွဲရေး ဥပဒေတွေရဲ့ အားနည်းချက်ကြောင့် မြေလှောင် ရောင်းစားနေတဲ့စနစ်ကြီး ပေါ်လာတယ်။ ဥပဒေက ပြဌာန်းထားတဲ့အတိုင်း အထူးအဖွဲ့ဟာ မစစ်ဆေးနိုင်တော့ အခုအထိ ဥပဒေအတိုင်း မနာခံတော့ဘဲ စိုက်ပျိုးမြေအဖြစ် အသုံးမဝင် ဖြစ်နေတာတွေ တွေ့ရပါတယ်။ လယ်ယာမြေ ဥပဒေတွေ ပြင်ဆင်ဖို့ လွှတ်တော်ကို တင်သော်လည်း အလုပ်မဖြစ်တာတွေ တွေ့ရတယ်။ ဒီတော့ လုပ်ပိုင်ခွင့် အငြင်းပွားမှုတွေဟာ ဥပဒေက ပြဋ္ဌာန်းထားတဲ့ ကာလအတွင်းမှာ မပြီးမပြတ်တာတွေဟာ တော်တော်အခက်အခဲ ဖြစ်နေတယ်။ ပြီးတော့ ယခင်တုန်းက လယ်ယာမြေ အဓမ္မသိမ်းဆည်းခြင်း ကိစ္စမှာလည်း ပြန်လည်စိစစ်ရေး ကော်မတီက ရှင်းလို့ မနိုင်တာတွေလည်း ရှိနေတယ်။ ဒါ့အပြင် လက်ရှိစိုက်ပျိုးနေတဲ့ မြေတွေကိုလည်း နည်းစနစ်ကျကျ၊ အကျိုးရှိရှိ ထိထိရောက်ရောက် အသုံးမချနိုင်ခြင်း မရှိသေးပါဘူး။ လယ်ယာမြေ ပိုင်ဆိုင်ခွင့်နဲ့ ပတ်သက်ရင်လည်း လယ်ယာမြေ အဓမ္မသိမ်းဆည်းခြင်း လုပ်ပိုင်ခွင့် အငြင်းပွားမှုဖြစ်ခြင်း၊ ကိစ္စရပ် တွေကိုလည်း ထိရောက်စွာ ကိုင်တွယ်ဖြေရှင်းနိုင်ခြင်း မရှိသေးပါဘူး” ဟု ပြောကြားသည်။

တောင်သူလယ်သမားများအတွက် ဂုဏ်ယူစရာဖြစ်သည့် တောင်သူလယ်သမားနေ့ကို ဗိုလ်ချုပ်နေဝင်း အာဏာသိမ်းယူခဲ့သည့် မတ်၂ ရက်အစား ပြောင်းလဲသတ်မှတ်ပေးရန် အခမ်းအနားသို့ တက်ရောက်လာသည့် တောင်သူလယ်သမားများက ပြောကြားသည်။