လစ်လပ်ဝန်ကြီး နှစ်နေရာအား မတ်လအတွင်း ခန့်အပ်နိုင်ရန် စီစဉ်နေကြောင်း မကွေးတိုင်းဝန်ကြီးချုပ် ပြောကြား

လစ်လပ်ဝန်ကြီး နှစ်နေရာအား မတ်လအတွင်း ခန့်အပ်နိုင်ရန် စီစဉ်နေကြောင်း မကွေးတိုင်းဝန်ကြီးချုပ် ပြောကြား
Published 3 March 2018

လစ်လပ်ဝန်ကြီး နှစ်နေရာအား မတ်လထဲတွင် ခန့်အပ်နိုင်ရန် စီစဉ်နေကြောင်း မကွေးတိုင်းဝန်ကြီးချုပ် ဒေါက်တာအောင်မိုးညိုက မတ် ၁ ရက်က အောင်လံမြို့နယ်တို့ လာရောက်သည့် ခရီးစဉ်တွင် မီဒီယာများအား ပြောကြားသည်။

ဇန်နဝါရီ ၁၀ ရက်က မကွေးတိုင်း ဒေသကြီးအတွင်း စိုက်ပျိုးရေးဝန်ကြီး ဦးစိုးမြင့်မှာ ကျန်းမာရေးကြောင့် ဝန်ကြီးနေရာမှ နုတ်ထွက်ခဲ့ပြီး အလုပ်သမားဝန်ကြီး ဦးနေမျိုးကျော်မှာ လူမှုရေးပြဿနာ တစ်ခုကြောင့် ဝန်ကြီးရာထူးမှ နုတ်ထွက်ခဲ့ကာ ယင်းဝန်ကြီး နှစ်နေရာအား အစားထိုးရန် လိုအပ်နေခြင်းဖြစ်ပြီး လက်ရှိ တစ်လကျော် ကြာသည်အထိ မခန့်အပ်နိုင်သေးဘဲ ယခုမတ်လထဲတွင် ခန့်အပ်နိုင်ရန် လုပ်ဆောင်နေကြောင်း သိရသည်။

“လက်ရှိမှာတော့ သဘာဝသယံဇာတဝန်ကြီး ဦးမြင့်ဇော်က စိုက်ပျိုးရေးဝန်ကြီး နေရာအတွက် တာဝန်ယူထားရတယ်။ လူမှုရေးဝန်ကြီး ဒေါက်တာခင်မောင်အေးက လဝက၀န်ကြီး နေရာအတွက် တာဝန်ယူထားရတယ်။ ဝန်ကြီးရွေးဖို့က မကြာခင်ပဲ ဖြစ်မှာပါ။ လွှတ်တော်မှာတင်ပြီး ဆုံးဖြတ်ချက်ယူမှာ ဖြစ်တဲ့အတွက်ကြောင့်မို့ မကြာခင်မှာပဲ ခန့်နိုင်မှာပါ” ဟု ဒေါက်တာအောင်မိုးညိုက ဆိုသည်။

လက်ရှိဝန်ကြီး လိုအပ်ချက်ရှိနေသည့် အခြေအနေတွင် ၎င်းတင်သွင်းခဲ့သည့် ဝန်ကြီးအမည်စာရင်းကို လွှတ်တော် ကန့်ကွက်ခဲ့သော်လည်း ထိုကန့်ကွက်မှုက အစိုးရအဖွဲ့လုပ်ငန်း လုပ်ဆောင်မှုများကို မထိခိုက်နိုင်ကြောင်း၊ တိုင်းအစိုးရအဖွဲ့ အနေဖြင့် ဝန်ကြီးဌာနတစ်ခုနှင့် ပတ်သက်ပြီး ဆုံးဖြတ်ချက်ချမည် ဆိုပါက တစ်ဦးတည်းသဘောနှင့် ဆုံးဖြတ်ချက်ချလေ့မရှိဘဲ တိုင်းအစိုးရ အစည်းအဝေးပွဲတွင် စုပေါင်းဆုံးဖြတ်ချက် ချလေ့ရှိကြောင်း ၎င်းကဆက်လက် ပြောကြားသည်။

မကွေးတိုင်းဒေသကြီးတွင် စိုက်ပျိုးရေးဝန်ကြီး နေရာနှင့် အလုပ်သမား လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးနေရာ နှစ်နေရာ လစ်လပ်နေပြီး ထိုဝန်ကြီး နှစ်နေရာအတွက် ပြီးခဲ့သည့် ဖေဖော်ဝါရီလထဲက မကွေးတိုင်း ဝန်ကြီးချုပ်က တိုင်းလွှတ်တော်တို့ အမည်စာရင်း တင်သွင်းခဲ့ပြီး လွှတ်တော်ကိုယ်စားလှယ် ၁၇ ဦးက ကန့်ကွက်ခဲ့သဖြင့် ဝန်ကြီးအမည်စာရင်း ပြန်လည်ရုပ်သိမ်းခဲ့သည့် အခြေအနေများ ရှိခဲ့ပြီး အစိုးရနှင့် လွှတ်တော်ကြား သဘောထား တင်းမာမှုတချို့ ရှိခဲ့ကြောင်း သိရသည်။

Most Read

Most Recent