၂၀၁၈ ခုနှစ်အတွင်း ကျင်းပမည့် ကြားဖြတ်ရွေးကောက်ပွဲအတွက် မဲစာရင်းပြုစုရာတွင် တစ်အိမ်တက်တစ်အိမ်ဆင်း (Door to Door) လိုက်ကောက်မည်မဟုတ်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောကြား

၂၀၁၈ ခုနှစ်အတွင်း ကျင်းပမည့် ကြားဖြတ်ရွေးကောက်ပွဲအတွက် မဲစာရင်းပြုစုရာတွင် တစ်အိမ်တက်တစ်အိမ်ဆင်း (Door to Door) လိုက်ကောက်မည်မဟုတ်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောကြား
Published 3 March 2018

၂၀၁၇ ခုနှစ် ဧပြီ ၁ ရက်တွင် ရန်ကုန်တိုင်းဒေသကြီး ကော့မှူးမြို့နယ်၌ ကြားဖြတ်ရွေးကောက်ပွဲ ကျင်းပနေမှုကို တွေ့ရစဉ် (ဓာတ်ပုံ-မျိုးမင်းထက်)

၂၀၁၈ ခုနှစ်အတွင်း ကျင်းပမည့် ကြားဖြတ်ရွေးကောက်ပွဲအတွက် မဲစာရင်းပြုစုရာတွင် တစ်အိမ်တက်တစ်အိမ်ဆင်း (Door to Door) လိုက်ကောက်မည်မဟုတ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ဝင် ပြောရေးဆိုခွင့်ရှိသူ ဦးအောင်မြင့်က  The Daily Eleven သတင်းစာကို မတ် ၂ ရက် က ပြောကြားသည်။

လက်ရှိတွင် လွှတ်တော်ကိုယ်စားလှယ် လစ်လပ်နေသည့် မဲဆန္ဒနယ် ၁၀ နေရာရှိပြီး ၂၀၁၈ ခုနှစ်အတွင်း ကြားဖြတ်ရွေးကောက်ပွဲတစ်ရပ် ကျင်းပမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က ဆိုသည်။

“Door to Door မကောက်တော့ဘူး။ Door to Door က ကုန်ကျစရိတ် တော်တော်များတယ်။ ဟိုတစ်ခါတုန်းက စမ်းသပ်ကြည့်လိုက်တော့ Door to Door က ကုန်တယ်။ အခုက ဘယ်လိုလုပ်မလဲဆိုရင် ကိုယ့်မဲရုံအလိုက်ပေါ့လေ။ မဲရုံအလိုက်မှာ စောစောက ခွဲထုတ်ထားတဲ့ မဲစာရင်းရယ်၊ အဲဒီမဲစာရင်းပေါ်မှာ ရပ်ကျေးကော်မရှင်ရယ် အဲဒီရပ်ကွက်က ရပ်ကျေးပေါ့။ အဲဒီမဲရုံနယ်မြေကပေါ့။ နောက် အဲဒီမဲရုံနယ်မြေက ဆယ်အိမ်မှူး၊ ရာအိမ်မှူးလောက်နဲ့ အဲလိုပဲ လုပ်တော့မယ်။ တစ်အိမ်တက် တစ်အိမ်ဆင်းတော့ လိုက်မကောက်တော့ဘူး။ ဆယ်အိမ်မှူး၊ ရာအိမ်မှူးက သူတို့မှာလည်း စာရင်းရှိတယ်လေ။ သူတို့စာရင်းနဲ့ ဒီစာရင်းနဲ့ အဲလိုကိုက်ပြီးတော့ လုပ်ယူမယ်။ လုပ်ယူပြီးတော့ နည်းနည်းကြိုကပ်မှာပေါ့။ ကြိုကပ်တဲ့အခါကျတော့ ရပ်ကွက်က လာကြည့်တဲ့အခါမှာ လွယ်ပြီလေ။ အိမ်ထောင်စုအလိုက်ဆိုရင်။ လာကြည့်ပြီးတော့ လိုတာပြန်ပြင်လို့ ရတာပေါ့” ဟု ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးအောင်မြင့်က ဆိုသည်။

ထို့ပြင် ၂၀၁၈ခုနှစ်အတွင်း ကျင်းပမည့် ကြားဖြတ်ရွေးကောက်ပွဲတွင် မဲစာရင်းကြေညာရာ၌လည်း မိသားစုအလိုက် ထုတ်ပြန်ကြေညာမည်ဖြစ်ကြောင်း ၎င်းက ပြောကြားသည်။

လက်ရှိတွင် လွှတ်တော်ကိုယ်စားလှယ် လစ်လပ်နေသည့် မဲဆန္ဒနယ်နေရာများ၌ ရပ်ကျေးရွေးကောက်ပွဲ ကော်မရှင်အဖွဲ့ခွဲများဖွဲ့စည်းရာတွင် အများစုမှာ ဖွဲ့စည်းပြီးဖြစ်ပြီး အနည်းငယ်သာ ဖွဲ့စည်းရန်ကျန်ရှိတော့ ကြောင်း ရွေးကောက်ပွဲကော်မရှင်အဖွဲ့ဝင်ဦးအောင်မြင့်က ပြောကြားသည်။

“ရပ်ကျေးရွေးကောက်ပွဲ ကော်မရှင်အဖွဲ့ခွဲတွေ ဖွဲ့နေတယ်။ ဖွဲ့တယ်ဆိုတာက မဲစာရင်းတွေ ပြန်ပြီးတော့လုပ်ရဦးမှာကို။ မဲစာရင်း ပြန်လုပ်ရဦးမယ်ဆိုတော့ အဲဒီကြားဖြတ်ရွေး ကောက်ပွဲရှိမယ့်နေရာတွေမှာ ရပ်ကျေးကော်မရှင်တွေ ဖွဲ့တယ်။ လိုက်ဖွဲ့တဲ့အခါမှာ တော်တော်များများပြီးတယ်။ တချို့ နည်းနည်းလေးလောက် ကျန်တော့တယ်။ ကျန်တာက အုပ်ချုပ်ရေးမှူးကလည်း ရွေးနေတာကို တချို့နေရာတွေက”ဟု ဦးအောင်မြင့်က ဆိုသည်။

အဆိုပါရပ်ကျေး ရွေးကောက်ပွဲကော်မရှင်အဖွဲ့ခွဲများ ဖွဲ့စည်းပြီးပါက မဲစာရင်းပြုစုခြင်းလုပ်ငန်းများကို ဆက်တိုက်လုပ်ဆောင်သွားမည်ဖြစ်ကြောင်း ၎င်းက ဆက်လက်ပြောကြားသည်။

လက်ရှိတွင် ပြည်သူ့လွှတ်တော်၌ ချင်းပြည်နယ် ကန်ပက်လက်မဲဆန္ဒနယ်၊ ရှမ်းပြည်နယ် လဲချားမဲဆန္ဒနယ်နှင့် အမျိုးသားလွှတ်တော်၌ ကချင်ပြည်နယ်မဲဆန္ဒနယ်အမှတ် (၂) တို့တွင် လွှတ်တော်ကိုယ်စားလှယ် လစ်လပ်နေသည်။ ထို့ပြင် ပြည်နယ်လွှတ်တော်၌  ချင်းပြည်နယ် မတူပီမဲဆန္ဒနယ်အမှတ်(၁)၊ ရခိုင်ပြည်နယ် ရသေ့တောင် မဲဆန္ဒနယ်အမှတ်(၂)၊ တိုင်းဒေသကြီးလွှတ်တော်တွင် စစ်ကိုင်းတိုင်းဒေသကြီး တမူးမဲဆန္ဒနယ်အမှတ် (၂) ၊  ပဲခူးတိုင်းဒေသကြီး အုတ်တွင်းမဲဆန္ဒနယ်အမှတ် (၁)၊ မကွေးတိုင်းဒေသကြီး မင်းဘူးမဲဆန္ဒနယ် အမှတ် (၂) ၊ မန္တလေးတိုင်းဒေသကြီး သပိတ်ကျဉ်း မဲဆန္ဒနယ်အမှတ် (၁)နှင့် မန္တလေးတိုင်းဒေသကြီး ရှမ်းတိုင်းရင်းသားလူမျိုး မဲဆန္ဒနယ် တို့မှာ လွှတ်တော်ကိုယ်စားလှယ် လစ်လပ်နေကြောင်း သိရသည်။

၂၀၁၈ ခုနှစ်အတွင်း ကြားဖြတ်ရွေးကောက်ပွဲ ကျင်းပမည်ဖြစ်သော်လည်း ကျင်းပမည့်အချိန်ကို ပြည်ထောင်စုရွေးကောက်ပွဲကော်မရှင်က ထုတ်ပြန်ခြင်း မရှိသေးပေ။

၂၀၁၇ ခုနှစ် ဧပြီ ၁ ရက်က ကြားဖြတ် ရွေးကောက်ပွဲတစ်ရပ် ကျင်းပခဲ့ပြီး လစ်လပ်မဲ ဆန္ဒနယ် ၁၉ နေရာအတွက် ကျင်းပခဲ့ခြင်းဖြစ်ကာ မဲစာရင်းပြုစုရာတွင် တစ်အိမ်တက် တစ်အိမ်ဆင်းစနစ်ဖြင့် ကောက်ယူခဲ့ကြောင်း သိရသည်။

 

Most Read

Most Recent