မကြုံဂလက်မှ ဆလုံတိုင်းရင်းသား ကလေးငယ်များအား တွေ့ရစဉ်
ဆလုံတိုင်းရင်းသားများ၏ အသက်မွေးဝမ်းကျောင်း၊ နေထိုင်မှုပုံစံများမှာ နယ်မြေကျဉ်းမြောင်းလာသည့် အနေအထားကို ကြုံတွေ့လာနေရပြီး ခိုင်မာသည့် နည်းဥပဒေများနှင့် ထိန်းကျောင်းထားသင့်ပြီ ဖြစ်ကြောင်း ဒေသခံများက ပြောကြားသည်။
မြိတ်ကျွန်းစုအတွင်း နေထိုင်သော ဆလုံတိုင်းရင်းသားများမှာ ရေသယံဇာတများ ရှားပါးလာခြင်း၊ နေထိုင်ရာ ကျွန်းများတွင် ရွှေ့ပြောင်းအခြေချလာသူ များပြားလာသောကြောင့် တဖြည်းဖြည်းနှင့် ထိုင်းနိုင်ငံနှင့် မလေးရှား နိုင်ငံများသို့ ပြောင်းရွှေ့ထွက်ခွာမှုများ ရှိခဲ့ကြောင်း သိရသည်။
နယ်မြေနှင့် အသက်မွေးဝမ်းကျောင်း လုပ်ငန်းများ ရှားပါးလာသည့်အပြင် စီမံကိန်းတချို့ ဝင်ရောက် လာမှုများကြောင့် တိုင်းရင်းသားများမှာ ပိုမိုအခက်တွေ့လာကြောင်း သိရသည်။ ဆလုံတိုင်းရင်းသားများမှာ သီးသန့်နေထိုင်လိုသည့်ဆန္ဒ ရှိသူများဖြစ်ပြီး ရွှေ့ပြောင်းနေထိုင်သူ များပြားလာပါက လက်ရှိနေထိုင် လျက်ရှိသော ကျွန်းကို စွန့်ခွာထွက်သွားတတ်ကြောင်း သိရသည်။
“ကျွန်တော်တို့ ခရီးသွားလုပ်ငန်းကို ဆက်ပြီးတော့ လှုပ်ရှားမယ်ဆိုရင် ခိုင်မာတဲ့ ဥပဒေတွေ၊ နည်းဥပဒေတွေနဲ့ တိတိကျကျ ထိန်းမကျောင်းနိုင်ဘူးဆိုရင် နောက်ထပ်ဘာတွေ ဖြစ်လာမလဲဆိုတော့ သယံဇာတ ဆုံးရှုံးတာ၊ ဆလုံလူမျိုးတွေရဲ့ မတိုးတက်ဘူးဆိုတဲ့ အရာထက် နိမ့်ကျသွားတဲ့ ဘဝမျိုးကို ရောက်သွားနိုင်တယ်။ ဆလုံလူမျိုးတွေက အခုဘာဖြစ်လာသလဲဆိုရင် သယံဇာတ ရှားပါးလာမှုနဲ့အတူ နေရာရွှေ့ပြောင်းမှုတွေ ဖြစ်လာတယ်။ နောက်ပြီးတော့ ခရီးသွားလုပ်ငန်း ဖွံ့ဖြိုးမှုကြောင့် သူတို့နေထိုင်တဲ့ မြေယာတွေမှာ အတင်းနေရာယူ လာတာတွေ ဖြစ်လာတယ်။ အခုကျွန်တော်တို့ မကြုံဂလက်မှာဆိုရင် CB Bank Group ကနေ မြေ ၁၁ ဧက နေရာဝင်ယူလာတယ်။ ဒါတွေကို တိုင်းရင်းသားရေးရာ ဖွံ့ဖြိုးတိုးတက်ရေးမှာ ဆလုံတွေ ကိုယ်တိုင် ပြောခဲ့ပြီးသားပါ” ဟု မကြုံဂလက်ကျေးရွာမှ ဦးကိုထွေးက ပြောကြားသည်။
ဆလုံတိုင်းရင်းသားများကိုယ်တိုင် အလုပ်ရုံဆွေးနွေးပွဲတွင် တင်ပြခဲ့သော်လည်း ထူးခြားမှုမရှိခဲ့သလို တိကျသည့် မူဝါဒတချို့လည်း ချမှတ်ပေးထားခြင်း မရှိသေးကြောင်း သိရသည်။
မကြုံဂလက်ကျေးရွာမှာ ဆလုံတိုင်းရင်းသားများ အဓိက နေထိုင်သည့်ရွာ ဖြစ်သလို အဏ္ဏဝါ အမျိုးသား ဥယျာဉ်အတွင်း ကျရောက်နေသည့်အတွက် စီမံကိန်းများ ထပ်မံဝင်ရောက်လာပါက နေထိုင်လိုစိတ် မရှိတော့ဘဲ နောက်ထပ်ရွှေ့ပြောင်း သွားလာမှုများ ဖြစ်လာနိုင်ကြောင်း ဆလုံတိုင်းရင်းသား တစ်ဦးက ပြောကြားသည်။
“ဒီလိုမြေနေရာတွေကို အများအပြား လာယူနေလို့ရှိရင် နောက်သူတို့ရဲ့ သားသမီး မြေးမြစ်တွေ ဘယ်လိုနေရာတွေမှာသွားပြီး အခြေချနေထိုင်ရမလဲဆိုတဲ့ စိုးရိမ်သောကတွေ သူတို့ရဲ့ စိတ်ထဲမှာ ရှိနေကြပြီ။ မကြုံဂလက်ရွာလေးက တခြားရွာနှင့်မတူတဲ့အချက်က ကျွန်တော်တို့ဟာ Marine Nation Park ဧရိယာထဲမှာ အကန့်အသတ်နဲ့ နေရတာဖြစ်တယ်။၂၀၁၅ ဧပြီ ၂၈ ရက်ကမှ ၅၇ ဒသမ ၈၇ ဧကကို သစ်တောပိုင် ဧရိယာထဲကနေ ဖယ်ထုတ်ပေးထားတာ ဖြစ်ပါတယ်။ အဲဒီဧကလေးထဲကမှ မြေဧက ၁၁ ဧကကို တခြားစီးပွားရေး သမားတွေက လာရောက်ပိုင်ဆိုင်တဲ့ အရာက သိပ်ပြီးကောင်းတဲ့ လက္ခဏာ မဟုတ်ဘူး။ အဲဒါကို ကျွန်တော်တို့အနေနဲ့ သက်ဆိုင်ရာကို စာတော့ တင်ထားတယ်။ ဒီအပေါ်မှာ လှုပ်ရှားမှုကတော့ အနည်းငယ် နှေးသေးတယ်လို့ ကျွန်တော်ထင်တယ်။ ဒီဟာနှင့်ပတ်သက်ပြီး တိုင်းရင်းသားရေးရာဝန်ကြီး ဦးစောလုကာအဖွဲ့က ဒီမှာလာပြီး စစ်တမ်းကောက်မယ်ဆိုရင် ဆလုံတွေကို လွတ်လပ်စွာ ရင်ဖွင့်ခွင့်ပေးပါ” ဟု ဦးကိုထွေးက ဆက်လက်ပြောကြားသည်။
ဆလုံတိုင်းရင်းသားများကို တိုက်ရိုက်ထိန်းချုပ်မှု (သို့မဟုတ်) သွယ်ဝိုက်တဲ့ ထိန်းချုပ်မှုများ ရှိနေမည်ဆိုပါက တိကျတဲ့ ဒေတာများကို ရရှိမည်မဟုတ်ဘဲ တာဝန်ရှိသူများ အနေဖြင့် တိုင်းရင်းသားများ၏ ခံစားနေရတဲ့ စိန်ခေါ်မှုကို သိနိုင်မည် မဟုတ်ကြောင်း ကော့သောင်းမြို့မှ ဒေသခံတစ်ဦးက ဆိုသည်။
ဆလုံတိုင်းရင်းသားများ၏ ပြခန်းများ၊ အသုံးအဆောင်များကို လာရောက်ကြည့်ရှုခြင်း၊ ဆန်ဆီပေးခြင်း၊ အတူတွဲ ဓာတ်ပုံတွဲရိုက်ပြီး ပြန်သွားခြင်းများမှာ အဖြေမဟုတ်ဘဲ ဖိအားမရှိ လွတ်လပ်သည့် အသံကိုသာ ပြောခွင့်ပေးရန်နှင့် နားထောင်ပေးရန်သာအဓိက အရေးကြီးကြောင်း မြိတ်ကျွန်းစုအတွင်းမှ ဒေသခံများက ပြောကြားသည်။
မြိတ်ကျွန်းစုအတွင်း ဆလုံတိုင်းရင်းသားများ တဖြည်းဖြည်း နည်းပါးလာနေပြီး လွန်ခဲ့သည့်နှစ်များက ၁၉၀၀ သာ ကျန်တော့သည်ဟု ပြောကြားထားသော်လည်း အမှန်တကယ် မြေပြင်တွင် ၁၇၀၀ ခန့်သာ ကျန်ရှိနိုင်သည့် အနေအထား ဖြစ်နေကြောင်း၊ မြိတ်ကျွန်းစုအတွင်း ဆလုံတိုင်းရင်းသားများ၏ အချက်အလက်များကို တိကျသည့် စစ်တမ်းကောက်ယူနိုင်ရန် တနင်္သာရီတိုင်းဒေသကြီး အစိုးရအဖွဲ့မှ တိုင်းရင်းသားရေးရာဝန်ကြီး ဦးစောလုကာ ဦးဆောင်ပြီး ဆောင်ရွက်ရန် စီစဉ်နေကြောင်း သိရသည်။
