ရန်ကုန်တိုင်းဒေသကြီး အတွင်းရှိ စက်မှုဇုန်တစ်ခုကို တွေ့ရစဉ် (ဓာတ်ပုံ-စည်သူအောင်)
ရန်ကုန်တိုင်းဒေသကြီး လှိုင်သာယာ စက်မှုဇုန်အပိုင်း(၃)နှင့် ရွှေပြည်သာစက်မှု ဇုန်(၁)ရှိ စက်မှုမြေကွက် အချို့ကို ပြည်တွင်း ပြည်ပ ရင်းနှီးမြှုပ်နှံသူများသို့ ငှားရမ်းမည် ဖြစ်ကြောင်း မြို့ပြနှင့် အိမ်ရာဖွံ့ဖြိုးရေး ဦးစီးဌာနမှ ထုတ်ပြန်ထားသည်။
ဆောက်လုပ်ရေး ဝန်ကြီးဌာန မြို့ပြနှင့် အိမ်ရာဖွံ့ဖြိုးရေး ဦးစီးဌာနပိုင် စက်မှုမြေကွက်များအား ကုန်ထုတ်လုပ်မှု လုပ်ငန်းများ ဆောင်ရွက်နိုင်ရန် ပြည်တွင်းပြည်ပ ရင်းနှီးမြှုပ်နှံသူ လုပ်ငန်းရှင်များသို့ ငှားရမ်းခကို နိုင်ငံခြားငွေ အမေရိကန်ဒေါ်လာဖြင့် သတ်မှတ်ငှားရမ်းမည်ဖြစ်ကြောင်း ထုတ်ပြန်ထားသည်။
ရန်ကုန်တိုင်းဒေသကြီး လှိုင်သာယာစက်မှုဇုန် အပိုင်း (၃) ဗန်းမော်အတွင်းဝန် လမ်းနှင့် ဆိပ်ကမ်းသာလမ်းထောင့်၊ မြေကွက်အမှတ် (၅၀-ခ၊ ၅၁)၊ ဧရိယာ ၃ ဒသမ ၅၀၁ ဧကကိုလည်းကောင်း၊ ရန်ကုန်တိုင်းဒေသကြီး၊ ရွှေပြည်သာစက်မှုဇုန်(၁)၊ စက်မှု(၁) လမ်း၊ မြေကွက်အမှတ် (၃၀၀၊ ၃၀၁)၊ ဧရိယာ ၂ ဒသမ ၅ ဧကကိုလည်းကောင်း အသီးသီး ငှားရမ်းသွားမည်ဖြစ်သည်။
ငှားရမ်းလိုသူများ အနေဖြင့် အသေးစိတ် သိရှိလိုပါက ၀၆၇၄၀၇၃၁၁၊ ၀၁-၈၃၉၂၅၂၂ သို့ ၂၀၁၈ ခုနှစ် ဖေဖော်ဝါရီ၂၆ ရက်မှ မတ် ၂၆ ရက်အထိ ရုံးချိန်အတွင်း ဆက်သွယ်စုံစမ်းနိုင်ကြောင်း သိရသည်။
ရန်ကုန်တိုင်းဒေသကြီးအတွင်း စက်မှုဇုန်များအလိုက် ဖွဲ့စည်းပေးထားသည့် စက်မှုဇုန်စီမံခန့်ခွဲရေး ကော်မတီများမှာ အာဏာစက်မရှိသဖြင့် ဝန်ကြီးများပါဝင်သော စက်မှုဇုန်ကြီးကြပ်ကွပ်ကဲရေးအဖွဲ့ ဖွဲ့စည်းထားပြီး လက်ရှိစက်မှုဇုန်များတွင် ဂိုဒေါင်များ၊ မြေလွတ်များနှင့် ဈေးကစားမှုများ ပြည့်နေသည့် စက်မှုဇုန်များကို ဇုန်တာဝန်ရှိသူများ အနေဖြင့် အသေအချာ စီမံခန့်ခွဲနိုင်ရန် လိုအပ်မည်ဖြစ်ကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ဖေဖော်ဝါရီ ၁ ရက်တွင် အသိပေး ပြောကြားသည်။
မြန်မာနိုင်ငံရှိ စက်မှုဇုန်များကို ၁၉၉၅ ခုနှစ်က စတင်ဖွဲ့စည်းပေးခဲ့ပြီး အရေအတွက် အားဖြင့် ၂၁ ခုရှိနေကာ ရန်ကုန်တိုင်းဒေသကြီး စက်မှုဇုန်တွင်၂၉ ခုအထိ ရှိနေသည်။
စက်မှုဇုန်ဖော်ထုတ်ပြီးသည့် မြေကွက်များအဖြစ် တိုင်းဒေသကြီးနှင့် ပြည်နယ်အလိုက် ၃၇၀၇၆ ကွက်ရှိသော်လည်း လုပ်ငန်းမဆောင်ရွက်သည့် မြေကွက်လွတ်မှာ ၇၁၉၄ ကွက်အထိ ရှိနေကြောင်း စက်မှုလုပ်ငန်းမူဝါဒတွင် ဖော်ပြထားမှုအရ သိရသည်။ ထိုသို့ လုပ်ငန်းမဆောင်ရွက်သည့် မြေကွက်လွတ် ၇၀၀၀ ကျော်တွင် ရန်ကုန်တိုင်းဒေသကြီး အတွင်းက စက်မှုဇုန်များမှာ ယခင်အစိုးရ လက်ထက်က ၂၀၁၄ နိုဝင်ဘာတွင် လုံးဝမလုပ်သည့် စက်မှုဇုန်မြေကွက်ကို စာရင်းကောက်ယူခဲ့ရာ ဧကပေါင်း ၄၄၁၈ ဧက၊ အကွက်အားဖြင့် ၂၃၃၉ ကွက်ရှိကာ ယင်းအထဲတွင် ဂိုဒေါင် ၁၂၉၉ လုံးပါဝင်ကြောင်းနှင့် ယခင်အစိုးရ လက်ထက်က ၂၀၁၅ ခုနှစ် ဖေဖော်ဝါရီ ၁ ရက် နောက်ဆုံးထား၍ လုပ်ကိုင်ခြင်း မရှိပါက သိမ်းယူမည်ဟု ကြေညာခဲ့သော်လည်း အမှန်တကယ် လုပ်ဆောင်နိုင်ခဲ့ခြင်း မရှိကြောင်း သိရသည်။
