ဖားကန့်မြို့နယ်ရှိ ကျောက်စိမ်းတူးဖော်ရေး လုပ်ကွက်တစ်ခုကို တွေ့ရစဉ် (ဓာတ်ပုံ-အောင်ဟိန်းမင်း)
လုံးခင်း၊ ဖားကန့်၊ မိုးညှင်း၊ မိုးကုတ်၊ ခန္တီး၊ မိုင်းရှူးနှင့် နန့်ယားဆိပ် ရတနာနယ်မြေများရှိ ကျောက်မျက် တူးဖော်ရေးလုပ်ကွက် ၁၉၀ ကျော်မှာ မတ်လတွင် သက်တမ်းကုန်ဆုံးမည် ဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနမှ ထုတ်ပြန်ခဲ့ကြောင်း သိရသည်။
မတ်လတွင် လုံးခင်း၊ ဖားကန့်ရတနာ နယ်မြေ၌ လုပ်ကွက် ၁၁၁ ခု၊ မိုင်းရှူးရတနာ နယ်မြေတွင် လုပ်ကွက်ခုနစ်ခု၊ မိုးကုတ်ရတနာ နယ်မြေတွင် လုပ်ကွက် ၁၄ ခု၊ ခန္တီးရတ နာနယ်မြေတွင် လုပ်ကွက်ခြောက်ခု၊ မိုးညှင်း ရတနာနယ်မြေရှိ လုပ်ကွက် ၅၆ ခု၊ နန့်ယားဆိပ် ရတနာနယ်မြေရှိ လုပ်ကွက်လးခုတို့မှာ သက်တမ်းကုန်ဆုံးကြောင်း ထုတ်ပြန်ခဲ့ခြင်း ဖြစ်သည်။ ၂၀၁၈ ခုနှစ် မတ်လတွင် သက်တမ်းကုန်ဆုံးသည့် လုပ်ကွက် စုစုပေါင်း ၁၉၈ ခုရှိကြောင်း သိရသည်။
မိုင်းရှူးရတနာနယ်မြေရှိ လုပ်ကွက် ခုနစ်ခုမှာ ၂၀၁၅ ခုနှစ်က လုပ်ကိုင်ခွင့်ပြုခဲ့ခြင်းဖြစ်ပြီး မိုးကုတ် ရတနာနယ်မြေရှိ လုပ်ကွက် ၁၄ ခုမှာ ၂၀၁၃ နှင့်၂၀၁၅ ခုနှစ်က လုပ် ကိုင်ခွင့်ပြုခဲ့ခြင်း ဖြစ်ကြောင်း သိရသည်။ လုံးခင်း၊ ဖားကန့်ရတနာနယ်မြေရှိ လုပ်ကွက် ၁၁၁ ခုမှာ ၂၀၁၀ နှင့် ၂၀၁၅ ခုနှစ်တို့တွင် လုပ်ကိုင်ခွင့်ပေးခဲ့ခြင်း ဖြစ်သည်။ မိုးညှင်းရတနာ နယ်မြေရှိ လုပ်ကွက် ၅၆ ခုကို ၂၀၁၅ ခုနှစ်တွင် လုပ်ကိုင်ခွင့်ပေးခဲ့ခြင်းဖြစ်ကြောင်း သိရသည်။ နန့်ယားဆိပ်ရှိ ကျောက်မျက် တစ်ပိုင်တစ်နိုင်လုပ်ကွက် လေးကွက်ကို ၂၀၁၅ ခုနှစ်က လုပ်ကိုင်ခွင့် ပြုထားခြင်းဖြစ်ကြောင်း သိရသည်။
လက်ရှိတွင် လုပ်ကွက်သက်တမ်းကုန်ဆုံးမည့် ရတနာနယ်မြေများရှိ လုပ်ကွက်များကို သက်တမ်းတိုးမြှင့် မပေးဘဲ လစ်လပ်လုပ်ကွက်များအဖြစ် ကြေညာထားကာ အဆိုပါ လုပ်ကွက်များအတွက် Envrionmental Management Plan ရေးဆွဲနေကြောင်းနှင့် ရေးဆွဲပြီးပါက ပြည်ထောင်စုအစိုးရအဖွဲ့၊ ပြည်နယ်နှင့် တိုင်းဒေသကြီး အစိုးရအဖွဲ့အနေဖြင့် လုပ်ပိုင်ခွင့်ရှယ်ယာများ ခွဲဝေသွားမည် ဖြစ်ကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနမှ အကြံပေး ဦးဝင်းထိန်က ပြောကြားသည်။
လုံးခင်း၊ ဖားကန့်၊ မိုးညှင်း၊ မိုးကုတ်၊ နန့်ယားဆိပ်နှင့် မိုင်းရှူးရတနာနယ်မြေများရှိ ကျောက်မျက်တူးဖော်ရေး လုပ်ကွက် ၃၀၀ မှာ လာမည့် ၂၀၁၈ ခုနှစ် ဇန်နဝါရီတွင် သက်တမ်းကုန်ဆုံးကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနမှ ထုတ်ပြန်ခဲ့ပြီးဖြစ်ကြောင်း သိရသည်။
လုံးခင်း၊ ဖားကန့်၊ မိုးညှင်း၊ မိုးကုတ်၊ ခန္တီးနှင့် မိုင်းရှူးရတနာနယ်မြေများရှိ ကျောက်မျက်တူးဖော်ရေးလုပ်ကွက် ၃၄၃ ခုမှာ ဖေဖော်ဝါရီတွင် သက်တမ်းကုန်ဆုံးကြောင်း သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနမှ ထုတ်ပြန်ခဲ့ကြောင်း သိရသည်။
လုံးခင်း၊ ဖားကန့်၊ ခန္တီး၊ မိုးကုတ်နှင့် မိုးညှင်း ရတနာနယ်မြေများရှိ ကျောက်မျက်တူးဖော်ရေး လုပ်ကွက် ၃၁၁ ခုမှာ ၂၀၁၇ ခုနှစ် စက်တင်ဘာလတွင် သက်တမ်းကုန်ဆုံးခဲ့ကြောင်း သယံဇာတနှင့် သဘာဝပတ်ဝန်း ကျင်ထိန်းသိမ်းရေး ဝန်ကြီးဌာနက ထုတ်ပြန်ခဲ့ကြောင်း သိရသည်။
