အသေးစား၊ အလတ်စား စီးပွားရေးလုပ်ငန်းများ ဖွံ့ဖြိုးတိုးတက်မှုစီမံကိန်း အဆင့် (၂) အတွက် JICA ထံမှ ဂျပန်ယန်း ၁၄ ဒသမ ၉၄၉ ဘီလျံချေးယူရန် ပြည်ထောင်စုလွှတ်တော်က အတည်ပြုခဲ့သည်။
ဖေဖော်ဝါရီ ၂၂ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ယင်းချေးငွေနှင့်ပတ်သက်ပြီး လွှတ်တော်ကိုယ်စားလှယ်များ၏ ဆွေးနွေးချက်များအား စီမံကိန်း နှင့် ဘဏ္ဍာရေးဝန်ကြီးဌာနဒုတိယဝန်ကြီး ဦးမောင်မောင်ဝင်းက ပြန်လည်ရှင်းလင်းမှု ပြုလုပ်ပြီးနောက် ပြည်ထောင်စုလွှတ်တော်တွင် မဲခွဲဆုံးဖြတ်ရာ ထောက်ခံသူများသည့်အတွက် ယင်းချေးငွေရယူရန် ပြည်ထောင်စုလွှတ်တော်က အတည်ပြုခဲ့သည်။
ဒုတိယဝန်ကြီးက အဆိုပါချေးငွေနှင့်ပတ်သက်၍ လွှတ်တော်ကိုယ်စားလှယ်များ၏ ဆွေးနွေးချက်များတွင် ချေးငွေအတိုးနှုန်းအား လျှော့ချပေးစေလိုခြင်း၊ ချေးငွေသက်တမ်းအား တိုးမြှင့်ပေးစေလိုခြင်း၊ ချေးငွေလျှောက်ထားရာတွင် သတ်မှတ်သည့် စံချိန်စံညွှန်းများကို ဖြေလျှော့ပေးစေလိုခြင်း၊ အမှန်တကယ် ရသင့် ရထိုက်သော SME များထံသို့ ရောက်ရှိစေလိုခြင်းစသည့် အချက်များ တွေ့ရကြောင်း၊ စီမံကိန်း အဆင့်-၁ တွင် အတိုးနှုန်း ၈ ဒသမ ၅ ရာခိုင်နှုန်း သတ်မှတ်ဆောင်ရွက်ခဲ့ကြောင်း၊ အဆင့်-၁ ၏ သက်တမ်းသည် နှစ်နှစ်ကျော်လာပြီဖြစ်ကြောင်း၊ မြန်မာနိုင်ငံတွင် ထုတ်ချေးနေသော အတိုးနှုန်းများကိုကြည့်ပါက ထုတ်ချေးသည့် အဖွဲ့အစည်းအလိုက် အတိုးနှုန်း ရှစ်ရာခိုင်နှုန်းမှ ရာခိုင်နှုန်း ၃၀ အထိရှိနေကြောင်း၊ အပ်ငွေအပေါ်အတိုးနှုန်းသည် ရှစ်ရာခိုင်နှုန်းဖြစ်ကြောင်း၊ ငွေကြေးမူဝါဒနှင့် လုပ်ထုံးလုပ်နည်းများအရ မည်သည့်ချေးငွေကိုမျှ အပ်ငွေအပေါ်အတိုးနှုန်းထက်လျှော့၍ ထုတ်ချေးပါက ထုတ်မချေးသင့်ကြောင်း၊ ချေးငွေအမျိုးအစားတစ်ခုကို အပ်ငွေအတိုးနှုန်းထက် လျှော့၍ ထုတ်ချေးပါက အခြားချေးငွေများအတွက်ပါ လိုက်လံစဉ်းစားပေးရမည် ဖြစ်ကြောင်း၊ JICA၊ SME ကိုယ်စားလှယ်များ နှင့် ညှိနှိုင်းပြီး အခြားသောပြည်တွင်းချေးငွေ အတိုးနှုန်းများနှင့်ချိန်ဆကာ သင့်လျော်သော အတိုးနှုန်းဖြစ်သည့် ၈ ဒသမ ၅ ရာခိုင်နှုန်း သတ်မှတ်ရခြင်းဖြစ်ကြောင်း ရှင်းလင်းသည်။
