<

သက်သာသော အတိုးနှုန်းဖြင့် နှစ်ရှည်ပေးဆပ်ပြီး ပိုင်ဆိုင်ခွင့်ရမည့် တန်ဖိုးနည်း၊ တန်ဖိုးသင့်အိမ်ရာများ တည်ဆောက်ရန် ဂျပန်နိုင်ငံ JICA ထံမှ ဂျပန်ယန်း ၁၅ ဘီလျံ ချေးယူရန် ပြည်ထောင်စုလွှတ်တော်သို့ တင်ပြ

သက်သာသော အတိုးနှုန်းဖြင့် နှစ်ရှည်ပေးဆပ်ကာ ပိုင်ဆိုင်ခွင့်ရမည့် တန်ဖိုးနည်း၊ တန်ဖိုးသင့်အိမ်ရာများ တည်ဆောက်ရန် ဂျပန်နိုင်ငံ JICA ထံမှ ဂျပန်ယန်း ၁၅ ဘီလျံ ချေးယူရန် ဆောက်လုပ်ရေးဝန်ကြီးဌာန ဒုတိယ၀န်ကြီး ဦးကျော်လင်းက ဖေဖော်ဝါရီ ၂၂ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးသို့ တင်ပြခဲ့သည်။

ဒုတိယ၀န်ကြီးက “ဆောက်လုပ်ရေးကဏ္ဍမှာ အရည်အသွေး ကောင်းမွန်၍ အဆင့်အတန်းမီတဲ့ တန်ဖိုးနည်း၊ တန်ဖိုးသင့်အိမ်ရာတွေ စဉ်ဆက်မပြတ် ထုတ်လုပ်ခြင်းအားဖြင့် ပြည်သူတို့ရဲ့ အဓိကအရေးသုံးပါးဖြစ်တဲ့ ‘စား၊ ၀တ်၊ နေရေး’ မှာ မရှိမဖြစ် လိုအပ်တဲ့နေရေးအတွက် ပြည်သူတွေ သက်သာတဲ့ အတိုးနှုန်းထားနဲ့ နှစ်ရှည်ပေးဆပ်ရင်း အနာဂတ်မှာ ပိုင်ဆိုင်မည့်အိမ်ရာမှာ နေထိုင်ခွင့်ရရှိ၍ လုံခြုံစိတ်ချရတဲ့ နေရေးကိုရရှိဖို့ ဂျပန်နိုင်ငံ JICA မှ ဂျပန်ယန်း ၁၅ ဘီလျံ ချေးငွေရယူရေး ကိစ္စအား ပြည်ထောင်စုလွှတ်တော်မှ ခွင့်ပြုပေးနိုင်ပါရန် လေးစားစွာ တင်ပြအပ်ပါတယ်” ဟု ပြောကြားသည်။

နိုင်ငံတော်၏ အတိုင်ပင်ခံပုဂ္ဂိုလ်၏ (၁-၁၁-၂၀၁၆) ရက်မှ (၅-၁၁-၂၀၁၆) ရက်အထိ ဂျပန်နိုင်ငံသို့ သွားရောက်ခဲ့သည့် ချစ်ကြည်ရေး ခရီးစဉ်အတွင်း ဂျပန်နိုင်ငံအစိုးရမှ မြန်မာနိုင်ငံသို့ ပုဂ္ဂလိကရင်းနှီးမြှုပ်နှံမှုများ အပါအ၀င် ငါးနှစ်အတွင်း အမေရိကန် ဒေါ်လာသန်း ၈၀၀၀ ထောက်ပံ့ပေးအပ်မည်ဟု ဆွေးနွေးပြောကြားခဲ့ကြောင်း၊ အဆိုပါ ဆွေးနွေးမှုတွင် ဆောက်လုပ်ရေးဝန်ကြီးဌာနအနေဖြင့် Housing Finance Development Project စီမံကိန်းတစ်ခုလည်း ပါဝင်ခဲ့ကြောင်း၊ အဆိုပါ စီမံကိန်းသည် ပြည်သူများ တန်ဖိုးနည်းနှင့် တန်ဖိုးသင့်အိမ်ရာများ ၀ယ်ယူရာတွင် သက်သာသော အတိုးနှုန်းထားနှင့် နှစ်ရှည်ချေးပေးနိုင်ရန် ရည်ရွယ်ပြီး ဂျပန်နိုင်ငံ JICA မှ ODA Loan အဖြစ် အကူအညီပေးမည်ဖြစ်ကြောင်း ဒုတိယ၀န်ကြီးက ပြောကြားသည်။

ဆောက်လုပ်ရေးဝန်ကြီးဌာန အနေဖြင့် Housing Finance Development Project စီမံကိန်းလုပ်ငန်း ဆောင်ရွက်ရန်အတွက် ချေးငွေ ဂျပန်ယန်း ၁၅ ဘီလျံ ရယူဆောင်ရွက် ခွင့်ပြုကြောင်း စီမံကိန်းနှင့်ဘဏ္ဍာရေးဝန်ကြီးဌာနမှ အကြောင်းကြားစာ ပေးပို့လာခဲ့ပါသဖြင့် အဆိုပါရရှိငွေဖြင့် ပြည်သူတို့နေထိုင်ရေး လိုအပ်လျက်ရှိသော ရန်ကုန်မြို့အပါအ၀င် အခြားပြည်နယ်နှင့် တိုင်းဒေသကြီး အားလုံးရှိ တန်ဖိုးနည်း၊ တန်ဖိုးသင့်အိမ်ရာများကို သက်သာသော အတိုးနှုန်းထားဖြင့် ချေးယူပြီး အိမ်ရာပိုင်ဆိုင်နိုင်ရေးအတွက် ဆောင်ရွက်သွားရန် လျာထားစီစဉ်ခဲ့ကြောင်း၊ စီမံကိန်းအတွက် ချေးငွေရယူရေး ကိစ္စနှင့်ပတ်သက်၍ ဖွံ့ဖြိုးမှုအကူအညီများ ညှိနှိုင်းရေးအဖွဲ့၏ အစည်းအဝေး အမှတ်စဉ် (၂၆/၂၀၁၇)၊ စီးပွားရေးရာ ကော်မတီ အစည်းအဝေး အမှတ်စဉ် (၁၉/၂၀၁၇) နှင့် ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၂/၂၀၁၈)တို့မှ ခွင့်ပြုချက်ရရှိခဲ့ပြီး စီမံကိန်းနှင့် ဘဏ္ဍာရေးဝန်ကြီးဌာနမှ (၁-၂-၂၀၁၈) ရက်စွဲပါစာဖြင့် ပြည်ထောင်စုလွှတ်တော်၏ အတည်ပြုချက်ရယူရန် နိုင်ငံတော်သမ္မတက သ၀ဏ်လွှာပေးပို့ခဲ့ပြီးဖြစ်ကြောင်း ၎င်းက ဆက်လက် ပြောကြားသည်။

တစ်နိုင်ငံလုံးတွင် နှစ်အလိုက် အိမ်ရာထုတ်လုပ်မည့် အစီအစဉ်အနေဖြင့် တန်ဖိုးနည်းအိမ်ရာနှင့် တန်ဖိုးသင့် အိမ်ရာများကို ရန်ကုန်တိုင်း၊ ဧရာဝတီတိုင်း၊ မကွေးတိုင်း၊ စစ်ကိုင်းတိုင်း စသည့် တိုင်းဒေသကြီး၊ ပြည်နယ် လေးခုတွင် ၂၀၁၇-၂၀၁၈ ဘဏ္ဍာနှစ်အတွက် တိုက်လုံးရေ ၁၅၈ လုံး၊ အခန်းပေါင်း ၄၅၅၀၊ ၂၀၁၈-၂၀၁၉ ဘဏ္ဍာနှစ်အတွက် တိုက်လုံးရေ ၂၀၇ လုံး၊ အခန်းပေါင်း ၅၉၀၈ ခန်းနှင့် ၂၀၁၉-၂၀၂၀ ဘဏ္ဍာနှစ်အတွက် တိုက်လုံးရေ ၄၀၊ အခန်းပေါင်း ၁၄၅၆ ခန်း စုစုပေါင်းတိုက်လုံးရေ ၄၀၅ လုံး၊ အခန်းပေါင်း ၁၁၉၁၄ ခန်း ထုတ်လုပ်သွားမည်ဖြစ်ကြောင်း ဦးကျော်လင်းက ပြောကြားသည်။

ချေးငွေထုတ်ချေးမည့် အစီအစဉ်အနေဖြင့် စီမံကိန်းနှင့်ဘဏ္ဍာရေးဝန်ကြီးဌာန (MOPF) မှ တာဝန်ခံချေးယူသူ (Borrower) အဖြစ်လည်းကောင်း၊ မြန်မာ့စီးပွားရေးဘဏ်မှ ကြားခံအဖွဲ့အစည်း (Executing Agency) အဖြစ်လည်းကောင်း တာဝန်ယူ၍ ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်မှတစ်ဆင့် အိမ်ရာချေးငွေရယူသူများသို့ အတိုးနှုန်း ၈ ဒသမ ၅ ရာခိုင်နှုန်းဖြင့် ထုတ်ချေးပေးသွားမည် ဖြစ်ကြောင်း၊ အတိုးနှုန်း ခွဲဝေသတ်မှတ်ရာတွင် စီမံကိန်းနှင့် ဘဏ္ဍာရေးဝန်ကြီးဌာနမှ တစ်ရာခိုင်နှုန်း၊ မြန်မာ့စီးပွားရေးဘဏ်မှ သုံးရာခိုင်နှုန်း၊ ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်မှ သုံးရာခိုင်နှုန်း ရယူမည်ဖြစ်ပြီး ကျန် ၁ ဒသမ ၅ ရာခိုင်နှုန်းကို သီးသန့်ရန်ပုံငွေ Reserve Account အဖြစ် စီမံကိန်းနှင့် ဘဏ္ဍာရေးဝန်ကြီးဌာန၊ မြန်မာ့စီးပွားရေးဘဏ်တွင် ထိန်းသိမ်းထားရှိမည်ဖြစ်ကြောင်း ဒုတိယ၀န်ကြီးက ပြောကြားသည်။

“အိမ်ရာချေးငွေဖြင့် တန်ဖိုးနည်းအိမ်ရာ ၀ယ်ယူလိုသူတွေဟာ လစဉ်မိသားစုတစ်စုလုံးဝင်ငွေ (Household Income) အနည်းဆုံး သုံးသိန်းရှိရမှာဖြစ်ပြီးတော့ တန်ဖိုးသင့်အိမ်ရာ ၀ယ်ယူလိုသူတွေဟာ လစဉ်မိသားစုတစ်စုလုံးဝင်ငွေ (Household Income) အနည်းဆုံး ငါးသိန်းရှိရမှာ ဖြစ်ပါတယ်။ အိမ်ရာချေးငွေ ရယူသူများမှ ပေးဆပ်ရမည့် အစီအစဉ်မှာ အိမ်ရာချေးငွေဖြင့် အိမ်ရာဝယ်ယူသူတွေဟာ တိုက်ခန်းတန်ဖိုး၏ ရာခိုင်နှုန်း ၂၀ ကို ကနဦးပေးသွင်းငွေ (Down Payment) အဖြစ် ပေးသွင်းရမှာဖြစ်ပြီး ကျန်ရာခိုင်နှုန်း ၈၀ ကို တစ်နှစ်လျှင် အတိုးနှုန်း ၈ ဒသမ ၅ ရာခိုင်နှုန်းဖြင့် အနည်းဆုံး ၁၀ နှစ်မှ ၁၅ နှစ် ထုတ်ချေးပေးသွားမှာ ဖြစ်ပါတယ်။ ချေးငွေ အရင်းအတိုး ပြန်လည်ပေးသွင်းရန်နှင့် ပတ်သက်၍ မြန်မာ့စီးပွားရေးဘဏ်မှ သတ်မှတ်ထားသည့် လုပ်ထုံးလုပ်နည်းများ၊ JICA မှ ချမှတ်ထားသည့် သတ်မှတ်ချက်များအတိုင်း ဆောင်ရွက်သွားမှာ ဖြစ်ပါတယ်။ ချေးငွေ ပြန်လည်ပေးဆပ်မည့် အစီအစဉ်မှာကတော့ အဆိုပါ ချေးငွေသည် JICA (Two Step Loan) ဖြစ်၍ စီမံကိန်းနှင့် ဘဏ္ဍာရေးဝန်ကြီးဌာနမှ ဂျပန်နိုင်ငံအစိုးရသို့ ဆိုင်းငံ့ကာလ ၁၀ နှစ်အတွင်း အတိုးငွေကိုသာ ပေးဆပ်ရမည်ဖြစ်ပြီး ၁၁ နှစ်မြောက်မှစ၍ အရင်းစတင်ပေးဆပ်ကာ နှစ် ၃၀ အတွင်း အကျေပေးဆပ်ရမည် ဖြစ်ပါတယ်။ ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်အနေဖြင့် အိမ်ရာချေးငွေရယူသူများက လစဉ်အတိုး အရင်းပေးဆပ်မှုရရှိငွေကို သုံးလတစ်ကြိမ် မြန်မာ့စီးပွားရေးဘဏ်သို့ ပြန်လည်ပေးဆပ်သွားရမှာ ဖြစ်ပါတယ်” ဟု ဦးကျော်လင်းက ပြောကြားသည်။

အိမ်ရာချေးငွေ ရယူသူများ (End Borrowers) ၏ ချေးငွေ ပြန်လည် ပေးဆပ်နိုင်စွမ်းကို စနစ်တကျ စိစစ်ပြီးမှသာ ထုတ်ချေးမည်ဖြစ်ပြီး ပျက်ကွက်မှုများ၊ ကြန့်ကြာမှုများရှိခဲ့ပါက မြန်မာ့စီးပွားရေးဘဏ်သို့ ချေးငွေပြန်လည်ပေးဆပ်ခြင်းကို ထိခိုက်မှုမရှိစေဘဲ ဆောက်လုပ်ရေးနှင့် အိမ်ရာဖွံ့ဖြိုးရေးဘဏ်၏ အစီအစဉ်ဖြင့် သတ်မှတ်ကာလအတွင်း မပျက်မကွက် ပြန်လည်ပေးဆပ်သွားမည်ဖြစ်ကြောင်း၊ ပြည်သူများအားလုံး သက်သာသော အတိုးနှုန်းထားဖြင့် နှစ်ရှည် ပေးဆပ်ရင်း အိမ်ရာပိုင်ဆိုင်ခွင့်ရရှိခြင်း၊ အိမ်ရာဘဏ္ဍာငွေကြေးစနစ် ဖွံ့ဖြိုးတိုးတက်လာခြင်း၊ အရည်အသွေး ပြည့်ဝကောင်းမွန်သော အိမ်ရာများပေါ်ထွက်လာပြီး ဈေးကွက်လိုအပ်ချက်နှင့်အညီ အိမ်ခန်းများဝယ်လိုအား ပေါ်အခြေပြု၍ ဆောက်လုပ်နိုင်ခြင်းဖြင့် ငွေသားစီးဆင်းမှုကို လျင်မြန်စေမှာဖြစ်ခြင်း၊ အိမ်ရာကဏ္ဍဖွံ့ဖြိုးရေးအတွက် စဉ်ဆက်မပြတ် အောင်မြင်စွာ အကောင်အထည်ဖော် ဆောင်ရွက်နိုင်မှာဖြစ်ခြင်း၊ အိမ်ရာလိုအပ်ချက်များကို ပိုမိုဖြည့်ဆည်းပေးနိုင်ကာ ၀င်ငွေနည်း ပြည်သူများ အိမ်ရာပိုင်ဆိုင်ခွင့် ရရှိရေးကို အထောက်အကူပြုနိုင်မှာဖြစ်ခြင်း၊ တစ်ဖက်တွင်လည်း အစိုးရ၏ ဘဏ္ဍာရန်ပုံငွေ (Budget) သုံးစွဲရမှုကို သက်သာစေနိုင်မည်ဖြစ်ခြင်းစသည့် အကျိုးကျေးဇူးများ ရရှိစေနိုင်မည်ဖြစ်ကြောင်း ဆောက်လုပ်ရေးဝန်ကြီးဌာန ဒုတိယ၀န်ကြီးဦးကျော်လင်းက ပြောကြားသည်။

February 22, 2018














Copy Protected by Chetan's WP-Copyprotect.