ပြည်တွင်းဘဏ် ၂၄ ခုတွင် ကမ္ဘောဇဘဏ်မှာ စုစုပေါင်း ပိုင်ဆိုင်မှုအချိုးအများဆုံးဖြင့် ၄၂ ရာခိုင်နှုန်းတွင် ရှိနေပြီး ဧရာဝတီက ၁၄ ရာခိုင်နှုန်း၊ သမဝါယမဘဏ်က ၁၀ ရာခိုင်နှုန်းဖြင့် အသီးသီး ရပ်တည်နေကြောင်း သိရသည်။

ပြည်တွင်းဘဏ် ၂၄ ခုအနက် ကမ္ဘောဇဘဏ်မှာ စုစုပေါင်းပိုင်ဆိုင်မှုအချိုး ၄၂ ရာခိုင်နှုန်းဖြင့် ထိပ်ဆုံးတွင် ရှိနေပြီး ပထမပုဂ္ဂလိကဘဏ် (FPB) မှာ စုစုပေါင်း ပိုင်ဆိုင်မှုအချိုး (Total Assets) တစ်ရာခိုင်နှုန်းဖြင့် အဆင့် ၁၅ နေရာတွင်သာ ရှိနေသော်လည်း အဆင့်ကိုးနောက်ပိုင်း ပြည်တွင်းဘဏ်များမှာ များစွာကွာဟမှု မရှိသဖြင့် မကြာမီကာလ၌ အဆင့် ၁၀ အတွင်းသို့ ဝင်ရောက်လာနိုင်မည် ဖြစ်ကြောင်း ရန်ကုန်စတော့အိတ်ချိန်းမှ Listed ကုမ္ပဏီများ၏ တိုးတက်လာနိုင်မှု အလားအလာနှင့် ပတ်သက်၍ သုံးသပ်ထားသည့် အစီရင်ခံစာတွင် ဖော်ပြထားမှုအရ သိရသည်။

ပြည်တွင်းဘဏ် ၂၄ ခုတွင် ကမ္ဘောဇဘဏ်မှာ စုစုပေါင်း ပိုင်ဆိုင်မှုအချိုး ၄၂ ရာ ခိုင်နှုန်းဖြင့် ထိပ်ဆုံးတွင် ရှိနေသည့်အပြင် ဒုတိယနေရာတွင် ရှိနေသည့် ဧရာဝတီဘဏ်ထက် ပိုင်ဆိုင်မှု ၂၈ ရာခိုင်နှုန်း ကွာဟနေကာ တတိယနေရာတွင် ရှိနေသည့် သမဝါယမ ဘဏ်ထက် ၃၂ ရာခိုင်နှုန်းအထိ သာလွန်နေကြောင်း သိရသည်။ စတုတ္တနေရာတွင် မြဝတီဘဏ်၊ ပဉ္စမနေရာတွင် မြန်မာ့ရှေ့ဆောင်ဘဏ်၊ ဆဋ္ဌမနေရာတွင် ရိုးမဘဏ်တို့အပြင် အဆင့် ၇ နှင့် ၈ နေရာတွင် စုစုပေါင်းပိုင်ဆိုင်မှုအချိုး သုံးရာခိုင်နှုန်းစီဖြင့် UAB ဘဏ်နှင့် ကမ္ဘာ့ရတနာဘဏ်တို့ ရပ်တည်နေပြီး အဆင့်ကိုးနှင့် ၁၀ နေရာတွင် AGD ဘဏ်နှင့် မြန်မာအရှေ့တိုင်းဘဏ်တို့က ရပ်တည်နေကြောင်းနှင့် အဆင့်ကိုးနောက်ပိုင်း ဘဏ်များမှာ စုစုပေါင်းပိုင်ဆိုင်မှု ကွာဟခြင်းမရှိဘဲ ရပ်တည်နေကြောင်း သိရသည်။

လက်ရှိတွင် FPB ဘဏ်၌ ဘဏ်ခွဲ ၃၂ ခုဖြင် ဝန်ဆောင်မှုပေးနေပြီး ချေးငွေများ၏ ရာခိုင်နှုန်း ၉၀ မှာ စာရင်းပိုချေးငွေဖြင့် လည်ပတ်နေကာ ချေးငွေတိုးတက်မှု ရာခိုင်နှုန်းတွင် ၂၀၁၀ ပြည့်နှစ်မှ ၂၀၁၅ ခုနှစ်အတွင်း စာရင်းပို ထုတ်ချေးငွေတွင် ၂၉ ဒသမ ၁၅ ရာခိုင်နှုန်းနှင့် ရိုးရိုးဘဏ်ချေးငွေမှာ ၂၃ ဒသမ ၁၈ ရာခိုင်နှုန်းဖြင့် တိုးတက်နေသည်။ ဘဏ်ချေးငွေ အဓိကထုတ်ပေးနေသည့် လုပ်ငန်းများတွင် ကုန်ထုတ်လုပ်မှု ၁၇ ရာခိုင်နှုန်း၊ လက်လီ အရောင်းအဝယ်တွင် ၅၈ ရာခိုင်နှုန်း နှင့်ဝန်ဆောင်မှုလုပ်ငန်းတွင် ၂၅ ရာခိုင်နှုန်း စသည်ဖြင့် ဝန်ဆောင်မှုပေးနေသည်။

ဘဏ်မှချေးငွေ ရယူလိုသော လုပ်ငန်းရှင်များကို အာမခံပစ္စည်း ပိုင်ဆိုင်မှုထားရှိသည့် နည်းလမ်းဖြင့် ဝန်ဆောင်မှုပေးနေပြီး အာမခံပစ္စည်းအများစုမှာ မြေယာနှင့်အဆောက်အအုံ (၉၉ ဒသမ ၈ ရာခိုင်နှုန်း) အထိရှိနေပြီး ရွှေငွေ လက်ဝတ်ရတနာများနှင့် ဘဏ်ငွေရင်း အပ်ငွေတို့အပေါ်မှ တစ်ဆင့် ချေးယူသော ချေးငွေမှာ ပမာဏနည်းပါးနေသည်။ ချေးငွေရယူပြီးသော လုပ်ငန်းရှင်များကို အခါအားလျော်စွာ ပုံမှန်စစ်ဆေးနေသည့်အပြင် ပထမအရစ်တွင် အာမခံပစ္စည်း၏ ရာခိုင်နှုန်း ၃၀ သာချေးပေးခြင်း၊ နောက်ပိုင်းအရစ်များကို ဖြေလျှော့ပေးခြင်းများကို ဆောင်ရွက်နေခြင်းကြောင့် အရင်းအတိုး ပေးဆပ်ရန် ပျက်ကွက်သော ချေးငွေအချိုး အလွန်နည်းပါးပြီး ယခင်ဘဏ္ဍာနှစ်တွင် အရင်းအတိုးပေးဆပ်ရန် ပျက်ကွက်သောချေးငွေအချိုး အလွန်နည်းပါးက ၀ ဒသမ ၁ ရာခိုင်နှုန်း အောက်တွင်သာ ရှိနေသည်။