သက်ငယ်မုဒိမ်းကျူးလွန်သူများကို ထိရောက်ပြင်းထန်စွာအပြစ်ပေးရန် မြန်မာနိုင်ငံအမျိုးသားလူ့အခွင့် အရေးကော်မရှင်က ဖေဖော်ဝါရီ ၁၉ ရက်တွင် ကြေညာချက်တစ်စောင်ထုတ်ပြန်သည်။
ယင်းကြေညာချက်တွင် လူမှုကွန်ရက်မီဒီယာများနှင့် သတင်းဂျာနယ်များတွင် သက်ငယ်မုဒိမ်းမှုများ ဖြစ်ပွားနေသည့် သတင်းများကိုမကြာခဏတွေ့ရှိနေရကြောင်း၊ သက်ငယ်မုဒိမ်းမှုများကို ၂၀၁၆ ခုနှစ်က ၆၇၁ မှု နှင့် ၂၀၁၇ ခုနှစ်တွင် ၈၉၇ မှုဖြစ်ပွားခဲ့ခြင်းကြောင့် ၂၂၆ မှုပိုများလာကြောင်း၊ အသက် ၁၆ နှစ်နှင့်အထက် မုဒိမ်းမှုမှာ ၂၀၁၆ ခုနှစ်တွင် ၄၂၉ မှုနှင့် ၂၀၁၇ ခုနှစ်တွင် ၅၀၈ မှု ဖြစ်ပွားခဲ့ခြင်းကြောင့် ၇၉မှုပိုများလာကြောင်း၊ မုဒိမ်းမှု စုစုပေါင်း၂၀၁၆ ခုနှစ်က ၁၁၀၀ မှုနှင့် ၂၀၁၇ ခုနှစ်တွင် ၁၄၀၅ မှုဖြစ်ပွားခဲ့ခြင်း ကြောင့် ယခင်နှစ်ကထက် ၃၀၅ မှုမိုများလာ သည်ကို တွေ့ရကြောင်း ဖော်ပြထားသည်။သက်ငယ်မုဒိမ်းမှုများနှင့် ၁၆ နှစ်အထက် မိန်းကလေးများ မုဒိမ်းကျင့်ခံရခြင်းသည် ကလေးသူငယ်များအပါအဝင် အမျိုးသမီး အခွင့်အရေးများ ထိခိုက်မှုပင်ဖြစ်ကြောင်း၊ အချို့အမှုများတွင် မုဒိမ်းမှုကျူးလွန်သည့်အပြင် ပစ္စည်းလုယက်ခြင်း၊ လူသတ်၍ အလောင်းဖျောက်ခြင်း စသည့် ရက်စက် သောရာဇဝတ်မှုများကိုပါ ကျူးလွန်လာသည် ကိုတွေ့ရကြောင်း၊ ယင်းဖြစ်ရပ်များသည် ကလေးသူငယ်များနှင့် အမျိုးသမီးများ၏ ဘဝလုံခြုံမှုကို ခြိမ်းခြောက်နေသည့်အပြင် မိဘများအတွက် စိုးရိမ်သောကရောက်နေရသည့် အခြေအနေများဖြစ်ကြောင်း သတင်းထုတ်ပြန်ချက်တွင်ပါရှိသည်။
မုဒိမ်းမှုကျူးလွန်သူများ၊ အထူးသဖြင့်သက်ငယ်မုဒိမ်းမှု ကျူးလွန်မှုများကို မဖြစ်ပွားစေရေးအတွက်နည်းလမ်းပေါင်းစုံဖြင့် ကြိုတင်ကာကွယ်မှုများ ပြုလုပ်ကြပြီး၊ ပြစ်မှုကျူးလွန်သူကို အမြန်ဆုံးဖော်ထုတ်ဖမ်းဆီးနိုင်ရေး ပြည်သူတစ်ရပ်လုံး ပူးပေါင်းပါဝင်ဆောင်ရွက်ကြရန်နှင့် ပြစ်မှုကျူးလွန်သူများကို ထိရောက်ပြင်းထန်စွာပြစ်ဒဏ်ပေးနိုင်ရေး ဆောင်ရွက်နိုင်ရန် သက်ဆိုင်ရာတာဝန်ရှိသူများသို့ မြန်မာနိုင်ငံအမျိုးသားလူ့အခွင့်အရေး ကော်မရှင်က အလေးအနက် တိုက်တွန်းအပ်ပါသည်ဟူ၍ သတင်းထုတ်ပြန်ထားသည်။
