<

ပြည်မြို့နယ်တွင် အရွယ်မရောက်သေးသော ကလေးငယ်များအား တောင်းရမ်းခိုင်းသောအဖွဲ့များနှင့် တောင်းရမ်းသူများကို ဥပဒေဖြင့် အရေးယူနိုင်မည်ဖြစ်သော်လည်း မူးယစ်ဆေးသဖွယ် ကော်ရှူနေသူများနှင့်ပတ်သက်၍ အရေးယူနိုင်သည့် အခြေအနေ မရှိသေးဟုဆို

ပြည်မြို့နယ်အတွင်း တောင်းရမ်းစားသောက်နေသည့် ကလေးငယ်များအား ဖေဖော်ဝါရီ ၁၆ ရက်ကတွေ့ရစဉ်

ပြည်မြို့နယ်အတွင်း အရွယ်မရောက်သေးသော ကလေးငယ်များကို တောင်းရမ်းခိုင်းသော အဖွဲ့များနှင့် အများပြည်သူသွားလာသော နေရာများတွင် တောင်းရမ်းသူများကို ဥပဒေဖြင့် အရေးယူနိုင်မည်ဖြစ်သော်လည်း မူးယစ်ဆေးသဖွယ် ကော်ရှူနေသူများနှင့် ပတ်သက်၍ အရေးယူနိုင်သည့် အခြေအနေတွင် မရှိသေးဟု အကြောင်းပြန်ကြားခဲ့ကြောင်း သိရသည်။

ဖေဖော်ဝါရီ ၁၅ ရက်က ပြုလုပ်သော ဒုတိယအကြိမ် ပဲခူးတိုင်းဒေသကြီးလွှတ်တော် န၀မပုံမှန် အစည်းအဝေး (ဒုတိယနေ့)၌ ပြည်မြို့နယ် မဲဆန္ဒနယ်အမှတ် (၂) မှ ဦးကျော်ဇေယျက ကြယ်ပွင့်ပြမေးခွန်းအဖြစ် ပြည်မြို့နယ်တွင် ဖြစ်ပေါ်နေသော ကော်ဘူးများကို မူးယစ်ဆေးအဖြစ် အသုံးပြုရှူနေခြင်းများနှင့် အရွယ်မရောက်သေးသော ကလေးငယ်များကို ခိုင်းစေ၍ တောင်းရမ်း စားသောက်နေကြသော အဖွဲ့များကို ဌာနဆိုင်ရာများ ပူးပေါင်း၍ မည်ကဲ့သို့ စစ်ဆေးအရေးယူမည်ကို သိရှိလိုပါကြောင်း မေးမြန်းခြင်းကို လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး လှမျိုးရွှေက ပြန်လည်ဖြေကြားခဲ့ခြင်း ဖြစ်သည်။

“တောင်းရမ်း စားသောက်ရန်စေခိုင်းတဲ့ကိစ္စအပေါ် သက်ဆိုင်ရာ ဥပဒေနဲ့အညီအရေးယူဖို့ ပြန်ဖြေတယ်။ ကော်ရှူတာကတော့ မူးယစ်ဆေးဝါးနဲ့ စိတ်ကိုပြောင်းလဲစေတဲ့  ဥပဒေအရမူးယစ်ဆေးက အကျုံးမ၀င်တဲ့အတွက် ပညာပေးလုပ်ငန်း လုပ်ဆောင်သွားမယ်လို့ ၀န်ကြီးက ပြောတယ်။ ဒါကပညာပေးလုပ်ငန်းနဲ့တင် မရတော့ဘူး။ မူးယစ်ဆေးဝါး ထက်ကိုပိုပြီး ကျန်းမာရေးစိတ်ပိုင်းဆိုင်ရာ ရုပ်ပိုင်းဆိုင်ရာကို ထိခိုက်တဲ့ဖြစ်တဲ့အတွက် ကျွန်တော်တို့အနေနဲ့ကတော့ ဒါကိုထိထိရောက်ရောက် ကာကွယ်တားဆီး အရေးယူဖို့ လိုတယ်ဆိုပြီး ဆက်စပ်မေးတဲ့ အခါမှာတော့ အရေးယူလို့ရတဲ့ပုဒ်မ မရှိဘူးဆိုတာ မဟုတ်ဘူး။ ဒေသန္တရအမိန့်တွေ ထုတ်လို့ရတယ်။ အဲဒီအမိန့်ကို ဖောက်ဖျက်ရင် ဥပဒေနဲ့အညီအရေးယူလို့ရတယ်။ နည်းလမ်းရှိတယ်လို့ ပြန်မေးတဲ့အခါမှာတော့ ကျွန်တော်တို့ကို စာနဲ့ပြန်ဖြေပါ့မယ်ဆိုပြီး အသေးစိတ်ကို ၀န်ကြီးက ပြန်ဖြေသွားတယ်” ဟု တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျက ပြောကြားသည်။

ကော်ဘူးများမှာဆောက်လုပ်ရေး ပစ္စည်းအရောင်းဆိုင်များတွင်ဘူးသေး တစ်ဘူးလျှင် ကျပ် ၁၀၀၀၊ ဘူးလတ်တစ်ဘူးလျှင် ကျပ် ၁၇၀၀၊ ဘူးကြီးတစ်ဘူးလျှင် ကျပ် ၃၀၀၀ နှုန်းဖြင့်အလွယ်တကူ ရောင်းချနေသော တရားဝင်ပစ္စည်းများဖြစ်ခြင်း၊ ကော်ဘူးများမှာ မူးယစ်ဆေးဝါး မဟုတ်သဖြင့် ဖမ်းဆီးအရေးယူ၍ မရခြင်း၊ ကော်ဘူးရှူသူများမှာ လမ်းဘေးတွင်ကော်ဘူး၊ ရေသန့်ဘူးနှင့် အခြားသော လမ်းဘေးပစ္စည်းများကို ကောက်ယူရောင်းချနေသော အိမ်ခြေမဲ့ လမ်းဘေးနေလူငယ်များဖြစ်ပြီး ၎င်းတို့မှာ ကော်ဘူးအသေးတစ်ဘူး ရှူလိုက်လျှင် အစာမစားဘဲ နေနိုင်ထိုင်နိုင်ခြင်း၊ စိတ်ပျော်ရွှင်မှု ရရှိစေခြင်းတို့ကြောင့် ကော်ရှူနေခြင်းဖြစ်ကြောင်း သိရသဖြင့် ကော်ဘူးရှူနေသည့် လူငယ်များအား အခြားသက်ဆိုင်ရာဌာနများနှင့် ပူးပေါင်းပညာပေး ဟောပြောခြင်းများ ဆောင်ရွက်သွားမည်ဖြစ်ပါကြောင်း ဖြေကြားသည်။

“ဒါကြီးကို တရားဝင်သဖွယ် လုပ်နေတာကို မသိကျိုးကျွန်လုပ်နေမယ်ဆိုရင် ပြဿနာက မြို့နယ်အတွက်၊ တိုင်းအတွက်၊ နိုင်ငံအတွက်ရော ၀န်ထုပ်ဝန်ပိုးတွေ ဖြစ်လာမယ်။ ဘက်ပေါင်းစုံကချို့ယွင်းပြီး ၀န်ထုပ်ဝန်ပိုးတွေ ဖြစ်လာမယ်” ဟု ဦးကျော်ဇေယျက ဆိုသည်။

February 18, 2018














Copy Protected by Chetan's WP-Copyprotect.