ဥပဒေနှင့်အညီ နိုင်ငံတော်မှ အသိအမှတ်ပြုထားသည့် လုပ်ငန်းစဉ်များတွင်သာ သတိပြုပါဝင်ဆောင်ရွက်ကြရန် ပြည်ထောင်စု ရွေးကောက်ပွဲကော်မရှင်က နိုင်ငံရေးပါတီများထံ စာပေးပို့

ဥပဒေနှင့်အညီ နိုင်ငံတော်မှ အသိအမှတ်ပြုထားသည့် လုပ်ငန်းစဉ်များတွင်သာ သတိပြုပါဝင်ဆောင်ရွက်ကြရန် ပြည်ထောင်စု ရွေးကောက်ပွဲကော်မရှင်က နိုင်ငံရေးပါတီများထံ စာပေးပို့
Published 12 August 2017

ဥပဒေနှင့်အညီ နိုင်ငံတော်မှ အသိအမှတ်ပြုထားသည့် လုပ်ငန်းစဉ်များတွင်သာ သတိပြုပါဝင်ဆောင်ရွက်ကြရန် ပြည်ထောင်စု ရွေးကောက်ပွဲကော်မရှင်က နိုင်ငံရေးပါတီများထံလိပ်မူ၍ သြဂုတ် ၄ ရက်စွဲဖြင့် စာပေးပို့ထားကြောင်း သတင်းရရှိသည်။ အဆိုပါစာတွင် နိုင်ငံရေးပါတီများသည် နိုင်ငံသားများအကျိုးအတွက် ရည်ရွယ်လျက် နိုင်ငံတော်၏ ဖွံ့ဖြိုးတိုးတက်ရေး လုပ်ငန်းစဉ်များနှင့် ငြိမ်းချမ်းရေးလုပ်ငန်းစဉ်များတွင် တက်ကြစွာပါဝင်ဆောင်ရွက်လျက်ရှိသည်ကို ပြည်ထောင်စုရွေးကောက်ပွဲ ကော်မရှင်အနေဖြင့် အသိအမှတ်ပြု ဂုဏ်ယူလျက်ရှိကြောင်း ရေးသားထားသည်။

သို့ရာတွင် သက်ဆိုင်ရာနိုင်ငံရေးပါတီကို ကိုယ်စားပြု၍ အဖွဲ့အနေဖြင့်လည်းကောင်း၊ တစ်ဦးချင်းအနေဖြင့်လည်းကောင်း စိတ်ကောင်းစေတနာကောင်းဖြင့် ဆောင်ရွက်ကြရာတွင် မလိုလားအပ်သည့် ကိစ္စရပ်များမပေါ်ပေါက်စေရေးအတွက် နိုင်ငံတော် ဖွဲ့စည်းပုံအခြေခံဥပဒေ၊ နိုင်ငံရေးပါတီများ မှတ်ပုံတင်ခြင်းဥပဒေနှင့် နည်းဥပဒေပါ ပြဋ္ဌာန်းချက်များနှင့်အညီ နိုင်ငံတော်မှ အသိအမှတ်ပြုထားသည့် လုပ်ငန်းစဉ်များတွင်သာ သတိပြုပါဝင်ဆောင်ရွက်ကြရန်ဖြစ်ကြောင်းကို အသိပေးကြောင်း ကော်မရှင်၏စာတွင်ပါရှိသည်။

ပြည်ထောင်စုရွေးကောက်ပွဲ ကော်မရှင်အနေဖြင့် ယခုကဲ့သို့ နိုင်ငံရေးပါတီအားလုံးသို့ ရည်ညွှန်းချက်ထက် မိမိတို့ဟန့်တားလိုသည့် ပါတီအား တိုက်ရိုက်ရည်ညွှန်းသင့်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ (SNLD) တွဲဖက်အတွင်းရေးမှူး (၁) ဦးစိုင်းလိတ်က ပြောကြားသည်။

“နိုင်ငံရေးပါတီထဲမှာ နိုင်ငံရေးပါတီ အစုအဖွဲ့မဟုတ်တဲ့ ငြိမ်းချမ်းရေးဆောင်ရွက်နေတဲ့ လက်နက်ကိုင်အဖွဲ့အစည်းတွေနဲ့ အများဆုံးထိတွေ့ဆက်ဆံနေတယ်ဆိုတာ SNLD နဲ့ UNA (စည်းလုံးညီညွတ်သော တိုင်းရင်းသားလူမျိုးများ မဟာမိတ်အဖွဲ့) အဝန်းအဝိုင်းက နိုင်ငံရေးပါတီတွေပဲ များတာပေါ့နော်။ အဲဒီတော့ ကျွန်တော်တို့ရှမ်းပါတီ SNLD မဟုတ်တောင်မှဘဲ UNA တစ်ဖွဲ့လုံးလား အဲဒီလိုမျိုးရည်ညွှန်းတယ်လို့ မှတ်ယူလို့ရကောင်းတယ်လို့ထင်တာပဲလေ။ ဒါပေမဲ့ အဲဒါကလည်းပဲ ၂၀၀၈ ဖွဲ့စည်းပုံအခြေခံဥပဒေကိုတောင် ကျော်လွန်ပြီးတော့မှ UEC (ပြည်ထောင်စု ရွေးကောက်ပွဲကော်မရှင်)က ပိုပြီးတော့ အာဏာရှိနေသလားလို့ သံသယဖြစ်စရာကောင်းပါတယ်။ တကယ်တမ်း ကျွန်တော်တို့ကိုသော်လည်းကောင်း၊ နိုင်ငံရေးပါတီ တစ်ခုခုကိုသော်လည်းကောင်း ဟန့်တားချင်တယ်။ အပြစ်ရှိတယ်ဆိုလို့ရှိရင်လည်း တိတိကျကျ ရည်ညွှန်းပြီးတော့မှသာ ထုတ်ဖော်ပြောကြားဖို့ လိုအပ်ပါတယ်။ ဒီလိုမျိုးဝါးလုံးသိမ်းပြီးတော့မှ မည်မည်ရရ၊ ခြေခြေမြစ်မြစ်မရှိဘဲနဲ့ ယေဘုယျဆန်ဆန် ဥပဒေထုတ်တယ်။ အမိန့်ထုတ်တယ်ဆိုတာမျိုးကြီးကတော့ သိပ်ပြီးနည်းလမ်းမကျဘူးလို့ မြင်ပါတယ်” ဟု ဦးစိုင်းလိတ်က ပြောကြားသည်။

ပြည်ထောင်စု ရွေးကောက်ပွဲကော်မရှင်က ပေးပို့သည့်စာအား ကချင်ပြည်နယ် ဒီမိုကရေစီပါတီဥက္ကဋ္ဌ ဒေါက်တာမနာမ်တူးဂျာ၊ ဖလုံ-စဝေါ်ဒီမိုကရက်တစ်ပါတီဥက္ကဋ္ဌ မန်းအောင်ပြည်စိုးတို့က တွေ့မြင်ရခြင်းမရှိသေးကြောင်းနှင့် ရခိုင်ဒီမိုကရေစီအဖွဲ့ချုပ်ပါတီ ဖြစ်မြောက်ရေးအဖွဲ့ဝင် ဦးမျိုးကျော်က တရားဝင်လက်ခံရရှိခြင်းမရှိသေးသဖြင့် တစ်စုံတစ်ရာ မှတ်ချက်ပေးခြင်းမပြုပေ။

ထိုင်းနိုင်ငံ၊ ချင်းမိုင်မြို့တွင် ၂၀၁၇ ခုနှစ် ဇူလိုင် ၂၀ ရက်မှ ၂၂ ရက်ထိကျင်းပမည့် ရှမ်းပြည်ညီညွတ်ရေးကော်မတီ (CSSU) အစည်းအဝေးအား ထိုင်းနိုင်ငံဆိုင်ရာ မြန်မာစစ်သံမှူးက ထိုင်းအစိုးရထံ အစည်းအဝေးကျင်းပခြင်းအား ခွင့်မပြုရန်နှင့် တားဆီးပေးရန် အကြောင်းကြားခဲ့သောကြောင့် အစည်းအဝေး ကျင်းပခွင့်မရရှိခဲ့ဘဲ ထိုသို့စစ်သံမှူး၏ တားမြစ်စာတွင် CSSU အစည်းအဝေး၌ NCA မထိုးထားသည့်အဖွဲ့များပါဝင်ခြင်း၊ တရားဝင်နိုင်ငံရေးပါတီများနှင့် တရားမဝင် အဖွဲ့အစည်းများကြား တွေ့ဆုံမှုပါဝင်ခြင်း စသည်တို့ကြောင့် ဥပဒေဆိုင်ရာ ငြိစွန်းနေသည့် အခြေအနေများအား ထည့်သွင်းဖော်ပြခဲ့သည်။

CSSU တွင် ရှမ်းပြည် ပြန်လည်ထူထောင်ရေးကောင်စီ (RCSS/SSA)၊ ရှမ်းတိုင်းရင်းသားများ ဒီမိုကရက်တစ်ပါတီ (SNDP)၊ ရှမ်းပြည်ပူးပေါင်း ဆောင်ရွက်ရေးကော်မတီ (SSJAC)၊ ရှမ်းအရပ်ဘက်အဖွဲ့အစည်းများ စသည်တို့ပါဝင်ကာ ၂၀၁၃ ခုနှစ် အောက်တိုဘာတွင် ဖွဲ့စည်းခဲ့ခြင်းဖြစ်ပြီး SSJAC ထဲတွင် NCA လက်မှတ်ရေးထိုးရခြင်းမရှိသေးသည့် ရှမ်းပြည်တိုးတက်ရေးပါတီ (SSPP/SSA)၊ တရားဝင်နိုင်ငံရေးပါတီဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) နှင့် SSA အသွင်ပြောင်းစိန်ကျော့ ပြည်သူ့စစ်အဖွဲ့တို့ ပါဝင်နေခြင်းဖြစ်သည်။

“အစက ကျွန်တော်တို့လည်း နားလည်ထားတာက တပ်မတော်က ဟန့်တားတယ်လို့ပဲသိတာကို။ အခုကျမှ UEC ကိုယ်တိုင်က ဝင်ပါလာတယ်ဆိုတဲ့အခါကျတော့ တကယ်လို့ ကျွန်တော်တို့ကို အမှန်ရည်ညွှန်းတယ်ဆိုရင်တော့ CSSU ကိစ္စမှာ တပ်မတော်ဘက်ကတင်မကဘဲ အစိုးရပါ ပါဝင်စွက်ဖက်နေတယ်လို့ ကျွန်တော်တို့ဒီအတိုင်းပဲ နားလည်ရတော့မှာပေါ့” ဟု ဦးစိုင်းလိတ်က ပြောကြားသည်။

Most Read

Most Recent