ဖေဖော်ဝါရီ ၁၆ ရက်က နိုင်ငံခြားရေးဝန်ကြီးဌာန၌ ပြုလုပ်သည့် နိုင်ငံခြားသံရုံးများ နေပြည်တော် သံတမန်ဇုန်သို့ ပြောင်းရွှေ့ဖွင့်လှစ် နိုင်ရေးအတွက် နေပြည်တော် သံတမန်ဇုန် မြေယာမူဝါဒဆိုင်ရာ ညှိနှိုင်း အစည်းအဝေးကို တွေ့ရစဉ် (ဓာတ်ပုံ- MOFA)

နိုင်ငံခြားသံရုံးများကို ရန်ကုန်မှ နေပြည်တော်သို့ ပြောင်းရွှေ့ဖွင့်လှစ်နိုင်ရန်အတွက် မူဝါဒများ ချမှတ်ထားပြီးဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ်၊ နိုင်ငံခြားရေးဝန်ကြီး ဒေါ်အောင်ဆန်းစုကြည်က ပြောကြားသည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နေပြည်တော်ရှိ နိုင်ငံခြားရေး ဝန်ကြီးဌာန၌ ဖေဖော်ဝါရီ ၁၆ ရက်က ကျင်းပသည့် ရန်ကုန်မြို့အခြေစိုက် နိုင်ငံခြားသံရုံးများ နေပြည်တော်သံတမန်ဇုန်သို့ ပြောင်းရွှေ့ဖွင့်လှစ် နိုင်ရေးအတွက် နေပြည်တော်သံတမန်ဇုန် မြေယာမူဝါဒဆိုင်ရာ ညှိနှိုင်းအစည်းအဝေးတွင် အထက်ပါကဲ့သို့ ထည့်သွင်းပြောကြားခဲ့ကြောင်း နိုင်ငံခြားရေး ဝန်ကြီးဌာန၏ သတင်းထုတ်ပြန်ချက်အရ သိရသည်။

အဆိုပါ နေပြည်တော်သံတမန်ဇုန် မြေယာမူဝါဒဆိုင်ရာ ညှိနှိုင်းအစည်းအဝေးတွင် ဒေါ်အောင်ဆန်းစုကြည်က အဖွင့်အမှာစကား ပြောရာ၌ နေပြည်တော်သည် မြန်မာနိုင်ငံ၏ အစိုးရရုံးစိုက်သည့် မြို့တော်ဖြစ်သည်နှင့်အညီ နိုင်ငံခြားသံရုံးများကို ရန်ကုန်မှ နေပြည်တော်သို့ ပြောင်းရွှေ့ဖွင့်လှစ်နိုင်ရန်အတွက် မူဝါဒများ ချမှတ်ထားပြီး ဖြစ်ကြောင်း၊ ယခုအခါ နိုင်ငံခြားသံရုံးများ အနေဖြင့် လုပ်ငန်းဆောင်ရွက်မှု၊ နေထိုင်မှု စသည်တို့ ပိုမိုအဆင်ပြေစေရန် အတွက်လည်းကောင်း၊ သံရုံးများမှ အဆိုပြု တင်ပြချက်များမှ လက်တွေ့တွင် ဖြစ်နိုင်မည့် အချက်များနှင့်အညီ ဆောင်ရွက်ပေးနိုင်ရန်အတွက် လည်းကောင်း မူဝါဒများကို ပြန်လည်သုံးသပ်မှု ပြုလုပ်ရန် လိုအပ်ကြောင်းနှင့် ဆက်သွယ်ရေး၊ ပို့ဆောင်ရေး၊ ပညာရေးနှင့် ကျန်းမာရေးဆိုင်ရာ ဝန်ဆောင်မှု ကိစ္စရပ်များကို ပိုမိုမြှင့်တင် ဆောင်ရွက်သွားနိုင်မည့် နည်းလမ်းများ ရှာဖွေဆောင်ရွက်ရန် လိုအပ်ကြောင်းဖြင့် ထည့်သွင်းပြောကြား ခဲ့သည်ဟု နိုင်ငံခြားရေး ဝန်ကြီးဌာနက ထုတ်ပြန်သည်။

ထို့နောက် သက်ဆိုင်ရာ ဝန်ကြီးဌာန အသီးသီးမှ ပြည်ထောင်စုဝန်ကြီးများ၊ ပြည်ထောင်စုရှေ့နေချုပ်၊ နေပြည်တော်ကောင်စီ ဥက္ကဋ္ဌနှင့် အဖွဲ့ဝင်များ၊ နေပြည်တော် စည်ပင်သာယာရေး ကော်မတီနှင့် ရန်ကုန်မြို့တော် စည်ပင်သာယာရေး ကော်မတီတို့မှ တာဝန်ရှိသူများက နိုင်ငံခြားသံရုံးများ နေပြည်တော်သို့ ပြောင်းရွှေ့ဖွင့်လှစ် နိုင်ရေးအတွက် အစီအစဉ်များနှင့် ဆောင်ရွက်ထားရှိမှုများကို ဆွေးနွေးခဲ့ကြကြောင်း နိုင်ငံခြားရေး ဝန်ကြီးဌာနက ဆိုသည်။

အဆိုပါ အစည်းအဝေးသို့ နိုင်ငံတော် အတိုင်ပင်ခံရုံး ဝန်ကြီးဌာန၊ ပို့ဆောင်ရေးနှင့် ဆက်သွယ်ရေး ဝန်ကြီးဌာန၊ လျှပ်စစ်နှင့် စွမ်းအင်ဝန်ကြီးဌာန၊ ပညာရေးဝန်ကြီးဌာန၊ စီမံကိန်းနှင့် ဘဏ္ဍာရေး ဝန်ကြီးဌာန၊ ဆောက်လုပ်ရေး ဝန်ကြီးဌာန၊ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနတို့မှ ပြည်ထောင်စုဝန်ကြီးများ၊ ပြည်ထဲရေး ဝန်ကြီးဌာနမှ ဒုတိယဝန်ကြီး၊ ပြည်ထောင်စုရှေ့နေချုပ်၊ နေပြည်တော် ကောင်စီဥက္ကဋ္ဌ၊ ရန်ကုန်မြို့တော် စည်ပင်သာယာရေး ကော်မတီ မြို့တော်ဝန်နှင့် တာဝန်ရှိသူများ တက်ရောက်ခဲ့သည်။