ကချင်ပြည်နယ်တွင် ဖားကန့်ရတနာမြေ အပါအဝင် လုပ်ကွက်ပေါင်း ၂၉၂ ကွက် ၂၀၁၈ ခုနှစ် ဖေဖော်ဝါရီလ အတွင်း ကုန်ဆုံးမည်

ကချင်ပြည်နယ်တွင် ဖားကန့်ရတနာမြေ အပါအဝင် လုပ်ကွက်ပေါင်း ၂၉၂ ကွက် ၂၀၁၈ ခုနှစ် ဖေဖော်ဝါရီလ အတွင်း ကုန်ဆုံးမည်
Published 17 February 2018

ဖားကန့်ဒေသ ဆိပ်မူကျေးရွာအုပ်စု အတွင်းရှိ လုပ်ငန်းခွင် တစ်နေရာကို ၂၀၁၇ ခုနှစ် နိုဝင်ဘာလအတွင်းက တွေ့ရစဉ် (ဓာတ်ပုံ-အောင်ဟိန်းမင်း)

၂၀၁၈ ခုနှစ် ဖေဖော်ဝါရီလအတွင်း ကချင်ပြည်နယ်တွင် ဖားကန့်ရတနာမြေ အပါအဝင် လုပ်ကွက်ပေါင်း ၂၉၂ ကွက် ကုန်ဆုံးမည်ဖြစ်ကြောင်း အစိုးရ စာရင်းများအရ သိရသည်။ ကချင်ပြည်နယ်တွင် လုံးခင်း၊ ဖားကန့် ရတနာမြေမှ ကုမ္ပဏီပေါင်း ၂၃၄ ခု၊ လုပ်ကွက်ပေါင်း ၂၃၄ ကွက်၊ မော်လူး၊ မော်ဟန် ရတနာမြေမှ ကုမ္ပဏီပေါင်း ၅၈ ခု၊ လုပ်ကွက်ပေါင်း ၅၈ ကွက် သက်တမ်းကုန်ဆုံးမည် ဖြစ်ကြောင်း သိရသည်။

ကချင်ပြည်နယ် အစိုးရအဖွဲ့ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဦးHလအောင်က “ဒီဖေဖော်ဝါရီလထဲမှာ သက်တမ်းကုန်ဆုံးမယ့် လုပ်ကွက်တွေ အများကြီးရှိတယ်။ လုပ်ကွက်သက်တမ်း ကုန်ဆုံးတာတွေနဲ့ ပတ်သက်ပြီးတော့ ကိုင်တွယ်တာက ကျောက်စိမ်းတူးဖော်ရေး ကြီးကြပ်မှု ကော်မတီက ကိုင်တာက။ လုပ်ကွက်ပိတ်သိမ်းတာနဲ့ သူတို့ဆီအပ်ရမှာပေါ့။ ဖားကန့်က OSS ရုံးမှာလည်း ပိတ်သိမ်းခဲ့တဲ့ လုပ်ကွက်တွေကို တရားဝင် ထုတ်ပြန်ထားတာ ရှိပါတယ်။ ကျွန်တော့်ဆီကိုလည်း မိတ္တူတွေ ပို့တာရှိတယ်။ အဓိကတော့ ကျွန်တော်တို့က လေးလပတ်ကိုင်တာပါ။ ယန္တရားနဲ့ ပတ်သက်လာရင် လုံခြုံရေးနှင့် နယ်စပ်ရေးရာ ဝန်ကြီးက ကြီးကြပ်တာ။ ရွှေ့ပြောင်းတာတွေကတော့ နိုင်ငံတော်ရဲ့သမ္မတ အမိန့်လက်မှတ်မပါဘဲနဲ့ လုပ်လို့မရဘူး” ဟု ပြောကြားသည်။

၂၀၁၈ ခုနှစ် ဖေဖော်ဝါရီတွင် သက်တမ်းကုန် လုပ်ကွက်များ အနေဖြင့် လုံးခင်း၊ ဖားကန့် ရတနာမြေတွင် ကုမ္ပဏီပေါင်း ၂၃၄ ခု၊ လုပ်ကွက်ပေါင်း ၂၃၄ ကွက်၊ မော်လူး-မော်ဟန် ရတနာမြေ (မိုးညှင်း) တွင် ကုမ္ပဏီပေါင်း ၅၈ ခု၊ လုပ်ကွက် ၂၅ ကွက်၊ ခန္တီးရတနာမြေတွင် ကုမ္ပဏီပေါင်း ၄၂ ခု၊ လုပ်ကွက်ပေါင်း ၄၂ ကွက်၊ မိုးကုတ် ရတနာမြေတွင် ကုမ္ပဏီလေးခု၊ လုပ်ကွက် လေးခု၊ မိုင်းရှူးရတနာမြေတွင် ကုမ္ပဏီငါးခု၊ လုပ်ကွက်ငါးခု သက်တမ်းကုန်ဆုံးမည် ဖြစ်ကြောင်း အစိုးရ စာရင်းများအရ သိရသည်။

ကချင်ပြည်နယ် ဖားကန့်ဒေသ၌ ဦးသိန်းစိန်အစိုးရ လက်ထက်တွင် သတ္တုတွင်း ဝန်ကြီးဌာန၏ စာရင်းများအရ ပုဂ္ဂလိက ကုမ္ပဏီ ၈၀၈ ခု တစ်ဧက လုပ်ကွက်ပေါင်း ၁၅၆၃၈ ကွက်၊ အကျိုးတူကုမ္ပဏီ ၂၂၂ ခု   လုပ်ကွက်ပေါင်း ၃၀၂ ကွက်ရှိခဲ့ရာတွင် NLD အစိုးရလက်ထက်၌ သက်တမ်းကုန်များကို သက်တမ်းထပ်တိုးခွင့် မပြုဘဲ ထားရှိခဲ့ရာ ၂၀၁၇ ခုနှစ် အောက်တိုဘာ ၃၁ ရက် စာရင်းချုပ်အရ အကျိုးတူ ၉၅ ကွက်၊ ပုဂ္ဂလိက လုပ်ကွက် ၇၄၅ ကွက်ရှိနေကြောင်း သိရသည်။

၂၀၁၅ ခုနှစ် သတ္တုတွင်း ဝန်ကြီးဌာန၏ စာရင်းများအရ ဖားကန့်ဒေသတွင် ပုဂ္ဂလိက ကုမ္ပဏီ ၈၀၈ ခု တစ်ဧက လုပ်ကွက်ပေါင်း ၁၅၆၃၈ ကွက်၊ အကျိုးတူကုမ္ပဏီ ၂၂၂ ခု လုပ်ကွက်ပေါင်း ၃၀၂ ကွက်ရှိခဲ့ရာ ယခုအချိန် တွင် NLD အစိုးရ တက်လာပြီးနောက်ပိုင်း သက်တမ်းကုန် လုပ်ကွက်များ သက်တမ်းတိုးခွင့် မရှိတော့သဖြင့်  အနည်းငယ်သာ ကျန်ရှိတော့ခြင်း ဖြစ်ကြောင်း၊ ကျောက်စိမ်းရတနာမြေမှ အစိုးရစာရင်းအရ တွင်းဝခွန်ရရှိမှုမှာ ၂၀၁၄ -၁၅ ခုနှစ်တွင် ကျပ်သန်းပေါင်း ၇၃၃၄ သန်း၊ ၂၀၁၅ -၁၆ ခုနှစ်တွင် ကျပ်သန်းပေါင်း ၁၇၂၄၉ သန်း၊ ၂၀၁၆ -၁၇ ခုနှစ်တွင် ၂၁၃၇၂ သန်းအထိ တိုးမြှင့်ကောက်ခံ နိုင်ခဲ့ကြောင်း သိရသည်။

Most Read

Most Recent