၁၉၇၀ ခုနှစ်တွင် သင်္ဘောကျင်းတစ်ခုအဖြစ် စတင်ဖွဲ့စည်းထူထောင်ခဲ့ပြီး ၁၉၇၆ ခုနှစ်တွင် ရေယာဉ်တည်ဆောက်ရေး၊ ရေယာဉ်ပြင်ဆင်ရေး လုပ်ငန်းများအား ဆောင်ရွက်ပေးနေသည့် မြန်မာ့သင်္ဘောကျင်းလုပ်ငန်းသည် စတင်ချိန်မှ ယခု ၂၀၁၇-၂၀၁၈ ဘဏ္ဍာနှစ်ထိ သက်တမ်း ၄၈ နှစ်အတွင်း ရေယာဉ်သစ် ၅၂၈ စီးနှင့်ရေယာဉ် ၁၅၈၃စီး လွန်းတင် ပြင်ဆင်ပေးနိုင်ခဲ့ကြောင်း မြန်မာ့သင်္ဘောကျင်းလုပ်ငန်းမှ သတင်းရရှိသည်။
ပို့ဆောင်ရေးနှင့် ဆက်သွယ်ရေးဝန်ကြီးဌာန လက်အောက်ရှိ မြန်မာ့သင်္ဘောကျင်းလုပ်ငန်းသည် ၂၀၁၂-၂၀၁၃ ဘဏ္ဍာနှစ်မှ စတင်ကာ နိုင်ငံတော်ဘဏ္ဍာရန်ပုံငွေမှ ကုန်ကြမ်းပစ္စည်းအတွက် သုံးစွဲမည့်ငွေ၏ ၂၂ ရာ ခိုင်နှုန်းသာရရှိခဲ့ပြီး ကျန်ငွေအား ဌာနလုပ် ငန်းဆောင်ရွက်သည့်ငွေမှ ကျခံသုံးစွဲခဲ့ပြီး ၂၀၁၃-၂၀၁၄ဘဏ္ဍာနှစ်မှစတင်ကာ နိုင်ငံတော်ပိုင်စီးပွားရေးလုပ်ငန်းအဖြစ်ဆောင်ရွက်ခဲ့ခြင်းဖြစ်ကြောင်း သိရသည်။
စတင်တည်ဆောက်ချိန်က လျှောလမ်း သုံးလွန်းကျင်းသာရှိခဲ့ပြီး တန်ချိန် ၂၀၀၀ အထိ ရေယာဉ်များသာ တည်ဆောက်ပြင်ဆင်ပေးနိုင်ခဲ့ရာမှ ၂၀၁၅ ခုနှစ်မှ စတင်ကာ တန်ချိန် ၁၂၀၀၀ ရေလုံသင်္ဘောကျင်း တည်ဆောက်ပြီးခဲ့ချိန်မှစ၍ ရန်ကုန်မြစ်အတွင်း ဝင်ရောက်နိုင်သည့် ရေယာဉ်ကြီးများအား လွန်းတင်ပြင်ဆင်ပေးနိုင်ခဲ့သည်။
“ကျွန်တော်တို့ မြန်မာ့သင်္ဘောကျင်းလုပ်ငန်းအနေနဲ့ ၁၉၇၀ခုနှစ်ကနေ ၂၀၁၇-၂၀၁၈ဘဏ္ဍာနှစ်ထိ ရေယာဉ်သစ် ၅၂၈ စီး နှင့်ရေယာဉ် ၁၅၈၃ စင်းကိုလွန်းတင်ပြင်ဆင်ပေးနိုင်ခဲ့ပါတယ်။ ၂၀၁၇-၂၀၁၈ဘဏ္ဍာ နှစ်စနေ ဒီဇင်ဘာလထိ ရေယာဉ် ၁၄ စင်းကို လွန်းတင်ပြင်ဆင်ရေးလုပ်ငန်းတွေ ဆောင်ရွက်ခဲ့ပြီး၊ ဆောက်လုပ်ငန်းရေး ဝန်ကြီးဌာန လက်အောက်၊ တံတားဦးစီးဌာနကနေ တံတားကြီးတွေတည်ဆောက်ရေး လုပ်ငန်းခွင်မှာ အသုံးပြုနိုင်ဖို့ တန်၄၀၀ တွဲရေယာဉ်သစ် သုံးစီးကိုလည်း တည်ဆောက်ပေးနိုင်ခဲ့ပါတယ်” ဟု မြန်မာ့သင်္ဘောကျင်းလုပ်ငန်းမှ အထွေထွေ မန်နေဂျာဦးမြင့်ဇော်က ပြောကြားသည်။