မန္တလေး-မြစ်ကြီးနား ရထားလမ်းကို တစ်နာရီ ၃၂ ကီလိုမီတာမှ ကီလိုမီတာ ၄၀ အထိ မောင်းနှင်နိုင်အောင် အပိုင်းသုံးပိုင်းခွဲ၍ ငါးနှစ်စီမံကိန်းဖြင့် ပြန်လည်အဆင့်မြှင့်တင်သွားမည်ဖြစ်ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာနမှ သိရသည်။
“ဒါတွေကတော့ မီးရထားလမ်း အဆင့်မြှင့်တင်ခြင်းလုပ်ငန်းပိုင်းဖြစ်ပါတယ်” ဟု ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ဒုတိယအထွေထွေမန်နေဂျာ ဒေါက်တာမျိုးငြိမ်းအေးက ပြောကြားသည်။
အဆိုပါ မန္တလေး-မြစ်ကြီးနား ရထားလမ်း၏ စုစုပေါင်းအရှည် ၅၄၂ ကီလိုမီတာအရှည်ရှိပြီး ပထမအပိုင်း (Phase-1) အနေဖြင့် ကောလင်း-နဘား-မိုးညှင်းလမ်းပိုင်းကို တစ်နာရီလျှင် ကီလိုမီတာ ၂၀ မှ ၂၄ ကီလိုမီတာအထိ မောင်းနှင်နိုင်အောင် အဆင့်မြှင့်တင်သွားမည်ဖြစ်ပြီး ယင်းလမ်းပိုင်းအတွင်း ရထားဘူတာ ၁၇ ခုရှိကြောင်း ဖော်ပြထားသည်။
ဒုတိယအပိုင်းအနေဖြင့် မိုးညှင်း-မြစ်ကြီးနားလမ်းပိုင်းကို တစ်နာရီကို ကီလိုမီတာ ၃၂ မှ ၄၀ အထိမောင်းနှင်နိုင်အောင် အဆင့်မြှင့်တင်သွားမည်ဖြစ်ပြီး ယင်းလမ်းပိုင်းအတွင်း ရထားဘူတာ ၂၀ ရှိကြောင်း သိရသည်။
တတိယအပိုင်းအနေဖြင့် မန္တလေး-ကောလင်းလမ်းပိုင်းကို တစ်နာရီကီလိုမီတာ ၃၂ မှ ၄၀ အထိ မောင်းနှင်နိုင်အောင် အဆင့်မြှင့်တင်သွားမည်ဖြစ်ပြီး ယင်းလမ်းပိုင်းအတွင်း ရထားဘူတာ ၃၉ ခုရှိကြောင်း ဖော်ပြထားသည်။
ယင်းကဲ့သို့ ပို့ဆောင်ဆက်သွယ်ရေး လမ်းပိုင်းဆိုင်ရာများကို ရင်းနှီးမြှုပ်နှံမှုများ ဝင်ရောက်၍ မီးရထားလမ်းများနှင့် အဝေးပြေးလမ်းမကြီးများ ရာနှုန်းပြည့်ကောင်းမွန်လာပါက လက်ရှိ သယ်ယူပို့ဆောင်ရေး ကုန်ကျစရိတ်ကို ရာခိုင်နှုန်း ၃၀ ခန့်အထိ လျှော့ချနိုင်မည်ဖြစ်ကြောင်း၊ နိုင်ငံ၏ GDP တွက်ချက်မှုမှာလည်း ၁၃ ရာခိုင်နှုန်းအထိ တိုးတက်လာမည်ဖြစ်ကြောင်း သိရသည်။
“အဲဒီလိုရင်းနှီးမြှုပ်နှံလိုက်မယ်ဆိုရင် ကျွန်တော်တို့ ပို့ဆောင်ရေးကုန်ကျစရိတ်ကိုလည်း လက်ရှိအနေအထားကနေ ရာခိုင်နှုန်း ၃၀ လောက် လျှော့ချနိုင်မယ်လို့ ထင်ပါတယ်။ GDP တွက်ချက်မှုအနေအထားအရလည်း ၁၃ ရာခိုင်နှုန်းလောက် တိုးတက်လာမယ်လို့ မှန်းပါတယ်” ဟု ဒေါက်တာမျိုးငြိမ်းအေးက ပြောကြားသည်။
ကိုရီးယားနိုင်ငံအနေဖြင့် မြန်မာနိုင်ငံ၏ ရထားပို့ဆောင်ရေးကဏ္ဍတွင် လာရောက်ရင်းနှီးမြှုပ်နှံလိုကြောင်းနှင့် လက်ရှိဆောင်ရွက်နေသည့် ကုမ္ပဏီများနှင့်လည်း ပူးပေါင်းဆောင်ရွက်လိုကြောင်း ဖေဖော်ဝါရီ ၈ ရက်က ရန်ကုန်မြို့ရှိ Lotte Hotel တွင်ပြုလုပ်သည့် Myanmar-Korea Investment Promotion Seminar အခမ်းအနားမှ သိရသည်။
“ကိုရီးယားနိုင်ငံ မီးရထားအဖွဲ့ဝင်တွေက မေးထားတာ။ ကျွန်တော်တို့ဆီမှာရှိတဲ့ နည်းပညာတွေကို အခြေခံပြီးတော့ မြန်မာနိုင်ငံရဲ့ ရထားပို့ဆောင်ရေးမှာ ဆောင်ရွက်လိုတဲ့ဆန္ဒရှိပါတယ်။ မီးရထားနဲ့ပတ်သက်ပြီး ပူးပေါင်းဆောင်ရွက်နိုင်မယ့် ကုမ္ပဏီအဖွဲ့အစည်းကို တွေ့ချင်ပါတယ်” ဟု အခမ်းအနားသို့ တက်ရောက်လာသည့် ကိုရီးယားနိုင်ငံ မီးရထားအဖွဲ့အစည်းက မေးမြန်းခဲ့သည်။
လက်ရှိတွင် မြန်မာနိုင်ငံ၏ ရထားသယ်ယူပို့ဆောင်ရေးကဏ္ဍ၌ လမ်းပိုင်းဆိုင်ရာ အရည်အသွေးမြှင့်တင်ရန် လိုအပ်နေပြီး အဆိုပါကဏ္ဍ၌ ကိုရီးယားနိုင်ငံ၏ ရင်းနှီးမြှုပ်နှံမှုများကို လာရောက်လုပ်ကိုင်စေလိုကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယအထွေထွေမန်နေဂျာ ဒေါက်တာမျိုးငြိမ်းအေးက ပြန်လည်ဖြေကြားသည်။
“အခုလက်ရှိအနေနဲ့ကတော့ မြန်မာ့မီးရထားဌာနကနေ အဓိကဆောင်ရွက်ပါတယ်။ မြန်မာ့မီးရထားကတော့ ပို့ဆောင်ရေးနှင့် ဆက်သွယ်ရေးဝန်ကြီးဌာနအောက်ရှိ ဌာန ၁၈ ခုထဲကတစ်ခုဖြစ်ပါတယ်။ ရထားလမ်း အဆင့်မြှင့်တင်မှုတွေအနေနဲ့ နိုင်ငံတကာက အထောက်အပံ့တွေ နိုင်ငံတကာက ပူးပေါင်းဆောင်ရွက်နေပါတယ်။ ပုဂ္ဂလိကရင်းနှီးမြှုပ်နှံမှုတွေလည်း ဖိတ်ခေါ်ထားတာဖြစ်တဲ့အတွက် မြန်မာ့မီးရထားဌာနနဲ့ တိုက်ရိုက်ဆောင်ရွက်နိုင်တယ်ဆိုတာ ပြောချင်ပါတယ်။ ကိုရီးယားနိုင်ငံရဲ့ အတတ်ပညာနဲ့ အရင်းအနှီးတွေပူးပေါင်းပြီး မြန်မာ့မီးရထားလုပ်ငန်းတွေ ဖွံ့ဖြိုးတိုးတက်လာမယ်ဆိုတာ ယုံကြည်ပါတယ်” ဟု ဒေါက်တာမျိုးငြိမ်းအေးက ပြောကြားသည်။
မြန်မာနိုင်ငံအနေဖြင့် ၂၀၁၂ ခုနှစ်တွင် National Transport Master Plan စီမံကိန်းတစ်ရပ်ကို ဆောင်ရွက်ခဲ့ကြောင်း၊ အဆိုပါ Master Plan အတွက် ဆောင်ရွက်ရမည့် အဓိကမူဝါဒပိုင်းဆိုင်ရာ၊ အခြေခံအဆောက်အအုံပိုင်းဆိုင်ရာ၊ မူဝါဒနှင့် အခြေခံအဆောက်အအုံပိုင်း နှစ်ခုပေါင်းကိုပါ စဉ်းစားလေ့လာပြီး ဆောင်ရွက်ထားကြောင်း သိရသည်။
