လွတ်လပ်စွာထုတ်ဖော်ပြောဆိုခွင့်နှင့် ပတ်သက်ပြီး မီဒီယာများထံ စစ်တမ်းများကောက်ယူနေပြီး စာတမ်းပြုစုကာ အစိုးရထံတင်ပြသွားမည်ဖြစ်ကြောင်း Free Expression Myanmar လွတ်လပ်သော ထုတ်ဖော်ပြောဆိုခြင်း မြန်မာအဖွဲ့မှ ပြောကြားသည်။
အဆိုပါတွေ့ဆုံပွဲကို တောင်ကြီးမြို့ Heart Beat စားသောက်ဆိုင်တွင် တောင်ကြီးမြို့ခံ မီဒီယာများနှင့် Free Expression Myanmar လွတ်လပ်သော ထုတ်ဖော်ပြောဆိုခြင်း မြန်မာအဖွဲ့တို့ ဆုံတွေ့ခဲ့ကြခြင်းဖြစ်ပြီး ပြည်နယ်တွင်းရှိ နယ်မြေခံသတင်းထောက်များ ခံစားနေရသော အခက်အခဲများ၊ မီဒီယာဥပဒေဆိုင်ရာ ကိစ္စရပ်များတို့ကို ဆွေးနွေးခဲ့ကြကာ စစ်တမ်းများ ကောက်ယူခဲ့ကြခြင်းဖြစ်သည်။
“ဒီပွဲက မီဒီယာလွတ်လပ်ခွင့်နဲ့ ပတ်သက်ပြီးတော့ ဘယ်လိုတွေ စိုးရိမ်သောကတွေရှိနေသလဲ။ ဘာတွေပြုပြင်ပြောင်းလဲခြင်းဆိုတဲ့ စစ်တမ်းပေါ့။ စစ်တမ်းကရရှိလာတာတွေကို အစိုးရတွေဥပဒေနဲ့ ပေါ်လစီတွေပြုပြင်ပြောင်းလဲပေးနိုင်တဲ့ အစိုးရကို ချိတ်ဆက်ပေးတဲ့အခါမှာ သက်သေတွေရဖို့ ပြုလုပ်ရခြင်းဖြစ်ပါတယ်။ မြို့ကြီးတွေ ရန်ကုန်၊ မန္တလေးတွေမှာတောင် မီဒီယာလွတ်လပ်ခွင့်က အပြည့်အဝမရသေးဘူး။ ပြည်နယ်တွေမှာ ပိုပြီးတော့ဆုံးရှုံးတယ်။ ဒီနယ်ဘက်မှာ သင်တန်းတွေနဲ့ဝေးတယ်။ လာလုပ်ကြတဲ့အဖွဲ့အစည်းတွေတော့ လုပ်ကြတယ်။ အလှမ်းဝေးတဲ့အတွက် အားနည်းချက်တွေရှိတယ်။ ဥပဒေအပိုင်းမှာ နားလည်မှုလည်း ဒီအတိုင်းပဲ။ မြို့ကြီးမှာ ခဏခဏလုပ်တယ်။ ပြည်နယ်နဲ့တိုင်းတွေမှာ လွတ်လပ်ခွင့်က Capacity နိမ့်တဲ့အတွက် တခြားမီဒီယာလွတ်လပ်ခွင့်တွေမှာ အခွင့်အရေးတွေအားနည်းတယ်။ နောက်ပြီး တရားဥပဒေစိုးမိုးရေးပေါ့။ ရှမ်း၊ ကချင်ပေါ့။ ပဋိပက္ခဖြစ်နေတော့ တရားဥပဒေစိုးမိုးရေး လျော့တယ်။ တရားဥပဒေစိုးမိုးရေး ကျလေလေ မီဒီယာလွတ်လပ်ခွင့်က ချိုးဖောက်ခံရလေလေပဲပေါ့” ဟု Free Expression Myanmar လွတ်လပ်သော ထုတ်ဖော်ပြောဆိုခြင်း မြန်မာအဖွဲ့မှ ဂရိုဂရမ်မန်နေဂျာ မယဉ်ရတနာသိန်းက ပြောကြားသည်။
မီဒီယာသမားများကို ခြိမ်းခြောက်နေသော မီဒီယာဥပဒေများ၊ အခြားသော ရာဇသတ်ကြီးဥပဒေပုဒ်မများ၊ ဆက်သွယ်ရေးဥပဒေပုဒ်မများ ပါဝင်နေပြီး အချို့မှာ ပြင်ဆင်ရန်လိုအပ်သလို အချို့ဥပဒေများသည် ပယ်ဖျက်ရန်လိုအပ်နေကြောင်း ၎င်းက ထောက်ပြပြောကြားသည်။
“လွတ်လပ်စွာထုတ်ဖော်ပြောဆိုခွင့်က အရေးကြီးတယ်။ သူမပါဘူးဆိုရင် တခြားအခွင့်အရေးတွေ ဘာမှရတော့မှာမဟုတ်ဘူး။ လွတ်လွတ်လပ်လပ် ထုတ်ပြောခွင့်မရှိဘူးဆိုရင် အမျိုးသမီးနဲ့ ကလေးသူငယ်အခွင့်အရေး ဆုံးရှုံးတာတွေ ထုတ်ပြောခွင့်ရတော့မှာ မဟုတ်ဘူး။ တခြားအခွင့်အရေးတွေပါ ဆုံးရှုံးနိုင်တယ်။ ဒီမိုကရေစီနိုင်ငံတစ်ခုမှာ လွတ်လပ်စွာထုတ်ပြောခွင့်မရှိဘူးဆိုရင် အစိုးရကို ထိန်းကျောင်းဖို့ခက်သွားတယ်။ အစိုးရက မှားယွင်းစွာဆောင်ရွက်ခဲ့တယ်ဆိုရင် အဲဒီအရာတွေမှာ တာဝန်ခံဖို့အတွက် တာဝန်ယူမှုရှိဖို့ ပြန်ပြီးခိုင်းစေရာမှာ အခက်အခဲရှိတယ်။ အဲဒီအခွင့်အရေးတွေပါ ဆုံးရှုံးနိုင်တယ်လို့ပြောတာပါ” ဟု Free Expression Myanmar လွတ်လပ်သောထုတ်ဖော်ပြောဆိုခြင်း မြန်မာအဖွဲ့မှအကြံပေးဖြစ်သူ Oliver Spencer ကပြောကြားသည်။
Free Expression Myanmar လွတ်လပ်သော ထုတ်ဖော်ပြောဆိုခြင်း မြန်မာအဖွဲ့မှ မန္တလေးတိုင်းဒေသကြီး၊ ရှမ်းပြည်နယ် (တောင်ကြီး)၊ ကယားပြည်နယ်၊ စစ်တွေမြို့ စသော ပြည်နယ်နှင့်တိုင်းဒေသကြီး ငါးနေရာသို့သွားရောက်ကာ စစ်တမ်းများ ကောက်ယူသွားမည်ဖြစ်ကြောင်း သိရသည်။
မီဒီယာသမားများအနေဖြင့် ပြုပြင်ပြောင်းလဲရန်လိုအပ်နေသော အချက်အလက်များကို မေးခွန်းများကို မေးမြန်းထားခြင်းဖြစ်ပြီး အဆိုပါစစ်တမ်းတွင် ရာဇသတ်ကြီးဥပဒေ၌ မီဒီယာသမားများကို ခြိမ်းခြောက်နေသောဥပဒေများ၊ အစိုးရနှင့် သက်ဆိုင်သောအကြောင်းအရာများ၊ သတင်းမီဒီယာလွတ်လပ်ခွင့်နှင့် သက်ဆိုင်သော လက်ရှိအခြေအနေများကို မေးမြန်းထားခြင်းဖြစ်သည်။