MICT Park တွင် ကျင်းပသည့် နည်းပညာ ဆွေးနွေးပွဲသို့ လာရောက်ကြသော လူငယ်များ မိုဘိုင်းဖုန်း သုံးစွဲနေကြစဉ် (ဓာတ်ပုံ-နေမျိုးထွန်း)
၂၀၁၆-၂၀၁၇ ဘဏ္ဍာနှစ်အတွင်း ကောက်ခံရရှိသော ဖုန်းဘီလ်ခွန် ကျပ် ၈၇ ဒသမ ၁၃၁ ဘီလျံတွင် ဖုန်းပြောဆိုခြင်းမှ ကောက်ခံရရှိသော အခွန်ပမာဏမှာ ကျပ် ၈၄ ဒသမ ၉၃၉ ဘီလျံဖြစ်ပြီး အခြားသုံးစွဲခြင်း များအတွက် ကောက်ခံရရှိသော အခွန်ပမာဏမှာ ကျပ် ၂ ဒသမ ၁၉၂ ဘီလျံသာ ရှိနေကြောင်း ပြည်တွင်းအခွန်များ ဦးစီးဌာနမှ အချက်အလက်များအရ သိရသည်။
ဖုန်းဘီလ်ခွန်ကို ၂၀၁၆ ခုနှစ် ဧပြီလတွင် စတင်ကောက်ခံခဲ့ခြင်းဖြစ်ပြီး ယင်းပမာဏမှာ ၂၀၁၇ မတ်လကုန်အထိ ကောက်ခံရရှိခဲ့သော ပမာဏဖြစ်သည်။
ဆက်သွယ်ရေး အော်ပရေတာသုံးခု ရှိသည့်အနက် ၂၀၁၆-၂၀၁၇ ဘဏ္ဍာနှစ်အတွင်း MPT မှာ ဖုန်းပြောဆိုခအခွန် ကျပ် ၄၄ ဒသမ ၈၄၃ ဘီလျံနှင့် အခြားသုံးစွဲခအခွန်ကျပ် ၄ ဒသမ ၆ သန်းအခွန်ပမာဏ ရှိခဲ့ကြောင်း သိရသည်။ ထို့ကြောင့် စုစုပေါင်း ဖုန်းဘီလ်ခွန်မှာ ကျပ် ၄၄ ဒသမ ၈၄၇ ဘီလျံရှိခဲ့ပြီး ဆက်သွယ်ရေး အော်ပရေတာ သုံးခုအနက် သုံးစွဲမှုအများဆုံးအဖြစ် ဦးဆောင်ခဲ့ကြောင်း သိရသည်။
တယ်လီနောမှာ အဆိုပါ ဘဏ္ဍာနှစ်အတွင်း ဖုန်းပြောဆိုခအခွန် ကျပ် ၃၂ ဒသမ ၁၇၈ ဘီလျံနှင့် အခြားသုံးစွဲခြင်းများ အတွက် အခွန်ကျပ် ၉၄၇ သန်းပေးသွင်းခဲ့ရပြီး စုစုပေါင်း အခွန်ပမာဏမှာ တစ်နှစ်အတွင်း ကျပ် ၃၃ ဒသမ ၁၂၅ ဘီလျံဖြင့် ဒုတိယအများဆုံး ပေးဆောင်ရသည့် အော်ပရေတာ ဖြစ်ခဲ့ကြောင်း သိရသည်။
ထို့အတူ အူရီဒူးမှာလည်း ဖုန်းပြောဆိုခ အခွန်အဖြစ် ကျပ် ၇ ဒသမ ၉၁၈ ဘီလျံနှင့် အခြားသုံးစွဲခအခွန် ကျပ် ၁ ဒသမ ၂၄၁ ဘီလျံပေးသွင်းခဲ့ရပြီး စုစုပေါင်း ဖုန်းဘီလ်ခွန် ပမာဏမှာ ကျပ် ၉ ဒသမ ၁၅၉ ဘီလျံဖြင့် ဆက်သွယ်ရေး အော်ပရေတာ သုံးခုအနက် သုံးစွဲမှု အနည်းဆုံး ဖြစ်ခဲ့ကြောင်း သိရသည်။
ဖုန်းဘီလ်ခွန် ပေးဆောင်မှု အခြေအနေအရ အဆိုပါ ဘဏ္ဍာနှစ်အတွင်း ဆက်သွယ်ရေး အော်ပရေတာ သုံးခု၏ ဈေးကွက်ဝေစုရယူမှု အချိုးအစားမှာ MPT က ၅၁ ရာ ခိုင်နှုန်း၊ တယ်လီနောက ၃၈ ရာခိုင်နှုန်းနှင့် အူရီဒူးက ၁၁ ရာခိုင်နှုန်းဖြစ်ကြောင်း သိရသည်။
လက်ရှိတွင် ဆက်သွယ်ရေး အော်ပရေတာသုံးခု အနေဖြင့် ဆင်းမ်ကတ်ပေါင်း သန်း ၅၀ ကျော် ရောင်းချသုံးစွဲမှု ရှိနေပြီး မြန်မာနိုင်ငံ၏ မိုဘိုင်းဖုန်း သိပ်သည်းဆမှာ ၁၀၀ ရာခိုင်နှုန်းကို အနည်းငယ် ကျော်လွန်လာကြောင်း ထုတ်ပြန်ချက်များအရ သိရသည်။
၂၀၁၇ ခုနှစ်အတွင်း ဖုန်းဘီလ်ခွန် စုစုပေါင်း ၉၈ ဒသမ ၅၉ ဘီလျံ ကောက်ခံရရှိပြီး မတ်လတွင် ကောက်ခံရရှိမှု အများဆုံးဖြစ်ကာ ဇူလိုင်လတွင် ကောက်ခံရရှိမှု အနည်းဆုံး ဖြစ်ခဲ့ကြောင်း သိရသည်။
၂၀၁၇ ခုနှစ်အတွင်း ဖုန်းဘီလ်ခွန် ကောက်ခံရရှိမှု စာရင်းများအရ ၂၀၁၇ ဇန်နဝါရီတွင် ကျပ် ၈ ဒသမ ၄၀ ဘီလျံ၊ ဖေဖော်ဝါရီတွင် ကျပ် ၈ ဒသမ ၀၁ ဘီလျံ၊ မတ်တွင် ကျပ် ၉ ဒသမ ၁၂ ဘီလျံ၊ ဧပြီတွင် ကျပ် ၈ ဒသမ ၇၈ ဘီလျံ၊ မေတွင် ကျပ် ၉ ဒသမ ၀၆ ဘီလျံ၊ ဇွန်တွင် ကျပ် ၈ ဒသမ ၆၅ ဘီလျံ၊ ဇူလိုင်တွင် ကျပ် ၆ ဒသမ ၂၂ ဘီလျံ၊ သြဂုတ် တွင် ကျပ် ၈ ဒသမ ၆၈ ဘီလျံ၊ စက်တင်ဘာ တွင် ကျပ် ၈ ဒသမ ၁၈ ဘီလျံ၊ အောက်တိုဘာ တွင် ကျပ် ၇ ဒသမ ၆၉ ဘီလျံ၊ နိုဝင်ဘာတွင် ကျပ် ၈ ဒသမ ၁ ဘီလျံ၊ ဒီဇင်ဘာတွင် ကျပ် ၇ ဒသမ ၇၀ ဘီလျံ စသည်ဖြင့် အသီးသီး ကောက်ခံရရှိခဲ့ကြောင်း ပြည်တွင်းအခွန်များ ဦးစီးဌာနမှ သိရသည်။
