ကနီမြို့နယ်တွင် သဘာဝပတ်ဝန်းကျင် ပျက်စီးနေသည့်နေရာများအား ပြန်လည်ထူထောင်ရန် မြန်မာနိုင်ငံ ဝါးစိုက်ပျိုးသူများအသင်းနှင့် စစ်ကိုင်းတိုင်းဒေသကြီးအစိုးရအဖွဲ့တို့ ပူးပေါင်းကာ ဝါးစိုက်ပျိုးရေးဇုန်တစ်ခု ဆောင်ရွက်မည်

ကနီမြို့နယ်တွင် သဘာဝပတ်ဝန်းကျင် ပျက်စီးနေသည့်နေရာများအား ပြန်လည်ထူထောင်ရန် မြန်မာနိုင်ငံ ဝါးစိုက်ပျိုးသူများအသင်းနှင့် စစ်ကိုင်းတိုင်းဒေသကြီးအစိုးရအဖွဲ့တို့ ပူးပေါင်းကာ ဝါးစိုက်ပျိုးရေးဇုန်တစ်ခု ဆောင်ရွက်မည်
Published 14 February 2018

စစ်ကိုင်းတိုင်းဒေသကြီး ယင်းမာပင်ခရိုင် ကနီမြို့နယ်တွင် သဘာဝပတ်ဝန်းကျင် ပျက်စီးနေသည့်နေရာများအား ပြန်လည်ထူထောင်ရန်အတွက် မြန်မာနိုင်ငံ ဝါးစိုက်ပျိုးသူများအသင်းနှင့် စစ်ကိုင်းတိုင်းဒေသကြီးအစိုးရအဖွဲ့တို့ ပူးပေါင်းကာ ဝါးစိုက်ပျိုးရေးဇုန်တစ်ခု ဆောင်ရွက်သွားမည်ဖြစ်ကြောင်း သိရသည်။

ယင်းမြို့နယ်တွင် ဝါးစိုက်ပျိုးဇုန်ဆောင်ရွက်ရခြင်း၏ ရည်ရွယ်ချက်သည် ဒေသခံများ၏ အလုပ်အကိုင်အခွင့်အလမ်းရရှိစေရေးနှင့် သဘာဝပတ်ဝန်းကျင်ပျက်စီးနေမှုအား ပြန်လည်ထိန်းသိမ်းကာကွယ်ရန်အတွက်ဖြစ်ကြောင်း သိရသည်။

“ကျွန်တော်တို့စစ်ကိုင်းတိုင်းမှာက ဝါးစိုက်ပျိုးရေးလုပ်ကိုင်သူများ အဖွဲ့နှစ်ဖွဲ့ရှိပါတယ်။ အထက်ပိုင်းမှာတစ်ဖွဲ့ပါ။ အောက်ပိုင်းမှာတစ်ဖွဲ့ပါ။ သူတို့ဘက်ကတော့ ကနီမြို့နယ်ထဲက မြေတွေကို စိတ်ဝင်စားကြတယ်လို့ပြောတယ်။ ဒါပေမဲ့ ကျွန်တော်တို့ သစ်တောဘက်ကလည်း ခွင့်ပြုပေးနိုင်တဲ့ မြေအမျိုးအစား ဟုတ်မဟုတ် ကွင်းဆင်းစစ်ဆေးခိုင်းထားပါတယ်။ ဝါးဆိုတဲ့မျိုးက နှစ်အတိုတွင်းမှာ ငွေပြန်ရမယ်။ အရင်တုန်းကတော့ ဝါးကို ဝါးလောက်ပဲသုံးတော့ တန်ဖိုးကသိပ်မရကြဘူးလေ။ ဝါးစိုက်ပျိုးသူများအဖွဲ့တွေက နည်းပညာတွေနဲ့ ဝါးမစိုက်ပျိုးခင်မှာ သင်တန်းတွေပို့ချပေးသွားမယ်။ နည်းပညာဆိုတာ တန်ဖိုးမြင့်ကုန်ချောတွေထုတ်လုပ်နိုင်တဲ့ နည်းပညာကိုပြောတာပါ။ နောက်ဆုံးကတော့ ဝါးကနေဖြတ်တောက်လိုက်တဲ့ လေလွင့်တဲ့ဝါးခြမ်းတွေကအစ ပြည်ပကို အိတ်စ်ပို့တင်ပို့နိုင်တဲ့အဆင့်အထိ ကူညီပေးမှာလို့ ဆွေးနွေးတယ်။ နောက်တစ်ခုကတော့ ကနီမြို့နယ်ထဲမှာ သဘာဝပတ်ဝန်းကျင် ပျက်စီးမှုများနေတဲ့အတွက် ဒါတွေကို ပြန်လည်ထူထောင်လိုတဲ့ ရည်ရွယ်ချက်လည်းပါတယ်” ဟု စစ်ကိုင်းတိုင်းဒေသကြီး သစ်တောရေးရာဦးစီးဌာန ညွှန်ကြားရေးမှူး ဦးခင်မောင်ဝင်းက ပြောကြားသည်။

ကနီမြို့နယ်သည် နှစ်စဉ်နှစ်တိုင်း လေဘေး/ရေဘေး ကျရောက်သည့် မြို့နယ်တစ်ခုဖြစ်ကြောင်း၊ ထို့ပြင် စစ်ကိုင်းတိုင်းဒေသကြီးအတွင်း သဘာဝပတ်ဝန်းကျင်ပျက်စီးနေသည့် ဒေသများအား ဝါးစိုက်ပျိုးရေးဇုန်များဖြစ်လာရန် ကြိုးစားနေကြောင်း၊ ယင်းဝါးစိုက်ပျိုးရေးဇုန်ကို စစ်ကိုင်းတိုင်းဒေသကြီးအစိုးရအဖွဲ့ကလည်း ပူးပေါင်းပါဝင်မည်ဖြစ်ကြောင်း မြန်မာနိုင်ငံ ဝါးစိုက်ပျိုးသူများအသင်းဥက္ကဋ္ဌ (စစ်ကိုင်းတိုင်းဒေသကြီး) အောက်ပိုင်း မုံရွာမြို့ခံ ကိုသန့်ဇင်က ပြောကြားသည်။

“ကျွန်တော်တို့ ဝါးစိုက်ပျိုးသူများအသင်းရဲ့ ရည်ရွယ်ချက်ကတော့ နှစ်ခုရှိပါတယ်။ ပထမကတော့ ဒေသခံတွေအတွက် အလုပ်အကိုင်အခွင့်အလမ်းရရှိဖို့ရယ် နောက်တစ်ခုကတော့ ကနီမြို့မှာက သဘာဝတ်ဝန်းကျင်တွေ ပျက်စီးနေတာတွေများလာနေတဲ့အတွက် ဒီပျက်စီးမှုတွေကို ကာကွယ်တဲ့အနေနဲ့ ဒီဝါးစိုက်ပျိုးရေးဇုန်လုပ်ဖို့ဆိုပြီး တိုင်းဒေသကြီးအစိုးရအဖွဲ့ကို ကျွန်တော်တို့အသင်းတို့က တင်ပြဆွေးနွေးထားပြီးဖြစ်ပါတယ်” ဟု မုံရွာမြို့ခံ ကိုသန့်ဇင်က ပြောကြားသည်။

ကနီမြို့နယ်ရှိ ဒေသခံများအနေဖြင့် စီးပွားဖြစ် ဝါးစိုက်ပျိုးနိုင်ရေးအတွက် ဝါးပင်စိုက်ပျိုးပုံ စိုက်ပျိုးနည်းများကိုလည်း မြန်မာနိုင်ငံ ဝါးစိုက်ပျိုးသူများအသင်း (စစ်ကိုင်းတိုင်းဒေသကြီး)အောက်ပိုင်းအဖွဲ့က နည်းပညာများ ပံ့ပိုးကူညီပေးမည်ဖြစ်ကြောင်း၊ ထို့ပြင် ကနီမြို့နယ်တွင် မြေလွတ်မြေရိုင်း ဧကအများအပြား ကျန်ရှိနေသေးကြောင်း သိရသည်။

Most Read

Most Recent