လွှတ်တော်ကိုယ်စားလှယ်အချို့မှာ တာဝန်ဝတ္တရားများကို ပေါ့လျော့စွာ ထမ်းဆောင်နေကြသည်ကိုတွေ့ရကြောင်း NLD ပါတီ ဗဟိုအလုပ်အမှုဆောင်အဖွဲ့၏ အစီရင်ခံစာတွင် ဖော်ပြ

လွှတ်တော်ကိုယ်စားလှယ်အချို့မှာ တာဝန်ဝတ္တရားများကို ပေါ့လျော့စွာ ထမ်းဆောင်နေကြသည်ကိုတွေ့ရကြောင်း NLD ပါတီ ဗဟိုအလုပ်အမှုဆောင်အဖွဲ့၏ အစီရင်ခံစာတွင် ဖော်ပြ
Published 13 February 2018

လွှတ်တော်အသီးသီး၏ ကိုယ်စားလှယ်အများစုမှာ တာဝန်ဝတ္တရားများကို ကျေပွန်စွာ ထမ်းဆောင်လျက်ရှိသည်ကို တွေ့ရပြီး အနည်းစုဖြစ်သော ကိုယ်စားလှယ်အချို့မှာ ပေါ့လျော့စွာ တာဝန်ထမ်းဆောင်နေကြသည်ကို တွေ့ရကြောင်း အမျိုးသားဒီမိုကရေစီအဖွဲ့ ချုပ် (NLD) ပါတီ ဗဟိုအလုပ်အမှုဆောင်အဖွဲ့၏ အစီရင်ခံစာတွင် ဖော်ပြထားသည်။

အမျိုးသားဒီမိုကရေစီအဖွဲ့ချုပ် အဋ္ဌမအကြိမ် ဗဟိုကော်မတီအစည်းအဝေးသို့ တင်သွင်းသည့် ဗဟိုအလုပ်အမှုဆောင်အဖွဲ့၏အစီရင်ခံစာကို ဗဟိုအလုပ်အမှုဆောင်အဖွဲ့ဝင် ဦးအောင်စိုးက ရန်ကုန်မြို့ မင်းဓမ္မလမ်းရှိ MCC ခန်းမ၌ကျင်းပသည့် အမျိုးသားဒီမိုက ရေစီအဖွဲ့ချုပ် ရန်ကုန်တိုင်းဒေသကြီး အဋ္ဌမအကြိမ် တိုင်း၊ ခရိုင်၊ မြို့နယ် စုံညီတွေ့ဆုံပွဲတွင် ဖတ်ကြားတင်သွင်းရာ၌ အထက်ပါကဲ့သို့ ထည့်သွင်းဖတ်ကြားခဲ့ခြင်းဖြစ်သည်။

“လွှတ်တော်ကိုယ်စားလှယ်များနှင့် ပတ်သက်၍ ၎င်းတို့၏ အရည်အချင်းကို အကဲဖြတ်နိုင်ရန် ရည်ရွယ်လျက် ယခုနှစ်ကစ၍ မေးခွန်းများမေးလျက် အဖြေများတောင်းခံခဲ့ပါသည်။ ကိုယ်စားလှယ်အများစုသည် မိမိတို့၏ တာဝန်ဝတ္တရားများကို ကျေပွန်စွာထမ်း ဆောင်လျက်ရှိသည်ကို တွေ့ရပါသည်။ သို့သော် အနည်းစုဖြစ်သော ကိုယ်စားလှယ်အချို့သည် ပေါ့လျော့စွာ တာဝန်ထမ်းဆောင်နေကြသည်ကိုလည်း တွေ့ရှိရပါသည်” ဟု ဦးအောင်စိုးက ဖတ်ကြားတင်ပြခဲ့သည်။

ထို့ပြင် လွှတ်တော်သက်တမ်းများသည် နောက်ထပ်သုံးနှစ်ခန့် ကျန်သေးကြောင်း၊ သို့ဖြစ်၍ မိမိတို့လွှတ်တော်ကိုယ်စားလှယ်များသည် ပြည်သူလူထုအကျိုးကို သယ်ပိုး ထမ်းဆောင်သော ကိုယ်စားလှယ်များဖြစ်လာရန် ကြိုးပမ်းကြစေလိုကြောင်း အစီရင်ခံစာတွင် တိုက်တွန်းထားသည်။

လွှတ်တော်ကိုယ်စားလှယ်များနှင့် ပတ်သက်၍ တိုင်ကြားစာများကို ကိုင်တွယ်ရန် ဗဟိုအလုပ်အမှုဆောင်ကော်မတီဝင် ဒေါက်တာ မျိုးညွန့်အား တာဝန်ပေးအပ်ထားကြောင်း၊ တိုင်ကြားစာအများစုမှာ အထောက်အထား မခိုင်လုံဘဲ တိုင်ကြားခဲ့ကြသည်ကို တွေ့ရှိရ ကြောင်းနှင့် အရေးယူရန်လိုအပ်သော တိုင်ကြားစာများမှာ အနည်းစုသာဖြစ်ကြောင်း ဦးအောင်စိုးက ဖတ်ကြားတင်သွင်းခဲ့သည်။

ကိုယ်စားလှယ်များကို တိုင်ကြားထားမှုအနေဖြင့် လူဦးရေ ၁၀၀ ကျော်ရှိကြောင်း၊ တိုင်ကြားစာ ၁၀၀ ကျော်တွင် လွှတ်တော် ကိုယ်စားလှယ်များ အပါအဝင် အစုံဖြစ်ကြောင်း ပါတီဗဟိုအလုပ်အမှုဆောင်အဖွဲ့ အတွင်းရေးမှူး အဖွဲ့ဝင် ဦးဉာဏ်ဝင်းက ပြောကြား ထားသည်။

Most Read

Most Recent