မြိတ်မြို့တွင် တရားမဝင် ဝက်တင်သွင်းမှု စိစစ်ရေးအဖွဲ့မှ တိမွေး/ကု ဒုဦးစီးမှူးအား ကိုယ်ထိလက်ရောက် လုပ်ဆောင်ခဲ့မှုကို ဥပဒေကြောင်းအရ ဆောင်ရွက်သွားမည် ဖြစ်ကြောင်း သိရ

မြိတ်မြို့တွင် တရားမဝင် ဝက်တင်သွင်းမှု စိစစ်ရေးအဖွဲ့မှ တိမွေး/ကု ဒုဦးစီးမှူးအား ကိုယ်ထိလက်ရောက် လုပ်ဆောင်ခဲ့မှုကို ဥပဒေကြောင်းအရ ဆောင်ရွက်သွားမည် ဖြစ်ကြောင်း သိရ
Published 13 February 2018

မြိတ်မြို့တွင် တရားမဝင် ဝက်တင်သွင်းမှု စိစစ်ရေးအဖွဲ့မှ တိမွေး/ကု ဒုဦးစီးမှူးအား ကိုယ်ထိလက်ရောက် လုပ်ဆောင်ခဲ့မှုကို ဥပဒေကြောင်းအရ ဆောင်ရွက်မည်ဖြစ်ကြောင်း ကော်မတီအစည်းဝေးမှ သိရှိရသည်။

မြိတ်မြို့၊ ဂေါက်ကလပ်နှင့် ဆေးတပ်ရှေ့တွင် တရားမဝင်ဝက်များ တင်သွင်းလာမှုအား စိစစ်ဆောင်ရွက်နေသည့် အဖွဲ့က မြိတ်မြို့နယ် တိမွေး/ကု ဒုဦးစီးမှူး ဒေါက်တာ ပြည့်ဖြိုးဝင်းအား ဝက်တင်သွင်းသူများက ကိုယ်ထိလက်ရောက် ထိုးကြိတ်ကန်ကျောက် ခဲ့ကြောင်း သိရသည်။

မြိတ်မြို့နယ်အတွင်းသို့ ဝက်သတ်လိုင်စင် ယူထားသူများက ထိုင်းနိုင်ငံနှင့် တခြားမြို့နယ်များမှ ဝက်များ တရားမဝင် တင်သွင်းနေသောကြောင့် ဒေသခံ ဝက်မွေးမြူရေး လုပ်ကိုင်သူများမှာ ထိခိုက်နစ်နာမှုများ ရှိနေသည်ကို သက်ဆိုင်ရာသို့ တင်ပြထားခဲ့ကြောင်း သိရသည်။

တရားမဝင်ဝက်များ တင်သွင်းနေမှုကို စိစစ်နိုင်ရန်အတွက် အဖွဲ့စုံမှ ဖေဖော်ဝါရီ ၉ ရက်တွင် စောင့်ဆိုင်းစိစစ်ရာမှ ယခုကဲ့သို့ ပြဿနာ ဖြစ်ပွားခဲ့ခြင်းဖြစ်ကြောင်း သိရသည်။

အဆိုပါဖြစ်စဉ်နှင့် ပတ်သက်ပြီး သက်ဆိုင်ရာဌာန အသီးသီးနှင့် လိုင်စင်ယူထားသူများ၊ မွေးမြူရေးလုပ်ငန်း လုပ်ဆောင်သူများကို စည်ပင်သာယာရေးကော်မတီ ရုံးခန်းတွင် ဖေဖော်ဝါရီ ၁၂ ရက်က ခေါ်ယူမေးမြန်းခဲ့ကြောင်း သိရသည်။

“ပြီးခဲ့တဲ့ရက်က ဖြစ်သွားတဲ့ကိစ္စမှာ လိုင်စင်သမားတွေနှင့် မွေးမြူရေးသမားတွေကြားမှာ မကျေနပ်မှုတွေ ဖြစ်ခဲ့တယ်။ ဝန်ကြီးချုပ်ခရီးစဉ်မှာ မွေးမြူရေးသမားတွေက တင်ပြခဲ့တာ ရှိပါတယ်။ လိုင်စင်သမားတွေက တစ်ဖက်နိုင်ငံကနေ ဝက်တွေကို မြို့တွင်းအထိ သယ်ဆောင်လာပြီး ရောင်းနေတဲ့အတွက် မွေးမြူရေး သမားတွေက အသားမရောင်းရတဲ့ အနေအထားဖြစ်နေတယ်။ လုပ်ငန်းတွေ မအောင်မြင်တဲ့ အနေအထား ဖြစ်လာနေတယ်ဆိုပြီး တင်ပြခဲ့တယ်။ ဒါကြောင့် ဝန်ကြီးချုပ်ရဲ့ လမ်းညွန်ချက်နဲ့ ကျွန်တော်တို့ စည်ပင်သာယာရေး ကော်မတီရုံးခန်းမှာ မွေးမြူရေးသမားတွေ၊ လိုင်စင် ( ခ ) တွေ၊ သက် ဆိုင်ရာဌာနတွေ အားလုံးကိုခေါ်ပြီး အစည်းအဝေး တစ်ခုလုပ်ပြီး အဖွဲ့နဲ့ စိစစ်ဖို့ဆုံးဖြတ်ချက်တစ်ခု ချခဲ့ပါတယ်။ ကျေးရွာ/ ရပ်ကွက် အုပ်ချုပ်ရေးမှူးတွေရဲ့ ထောက်ခံချက်နဲ့ ဝင်လာပါဆိုပြီး ခံဝန်ချက်နဲ့ လက်မှတ်ထိုးခဲ့ပါတယ်။ အားလုံးက လိုက်နာပါ့မယ်ဆိုပြီး ဌာနဆိုင်ရာတွေရှေ့မှာ လက်မှတ်ထိုးခဲ့တယ်။ ဒါပေမဲ့ အကြိမ်ကြိမ်အလီလီ ဝင်လာနေတာ ရှိခဲ့တယ်။ ကျွန်တော်တို့ စစ်ဆေးတဲ့အဖွဲ့က ညပိုင်းမှာ ဝင်ရောက်လာတဲ့အပေါ်မှာ မသင်္ကာလို့ စစ်ဆေးတဲ့အခါမှာ အစစ်မခံဘဲ ဒီလို ကိုယ်ထိလက်ရောက် ကျူးလွန်တဲ့အတွက် မွေး/ကုကလည်း ဝန်ထမ်းကို ကိုယ်ထိလက်ရောက် စော်ကားမှုနှင့် အရေးယူထားတာ ရှိသလို ကျွန်တော်တို့ မြို့နယ်စည်ပင်သာယာရေး ကော်မတီအနေနဲ့ကလည်း လိုင်စင်စည်ကမ်းကို ချိုးဖောက်တယ်။ တရားမဝင်ဘဲ သယ်ယူလာတယ်။ သက်ဆိုင်ရာ ထောက်ခံချက်လည်း မပြနိုင်ဘူး။ သက်ဆိုင်ရာ တိုင်းဒေသကြီး၊ ပြည်နယ်၊ မြို့များက PC-3 မပါ လာတဲ့အတွက်ကြောင့် စည်ပင်သာယာရေး ကော်မတီကလည်း ချမှတ်ထားတဲ့ စည်းမျဉ်းအတိုင်း စိစစ်ဆောင်ရွက် သွားပါ့မယ်” ဟု မြိတ်မြို့နယ် စည်ပင်သာယာရေး ကော်မတီဥက္ကဋ္ဌ ဦးမြတ်ကိုကိုက ပြောကြားသည်။

ဒုဦးစီးမှူးအား ကိုယ်ထိလက်ရောက် ပြုမူနေသည့် ဗီဒီယိုဖိုင်မှာ ပျံ့နှံ့နေခဲ့ပြီး အမျိုးသား ဒီမိုကရေစီ အဖွဲ့ချုပ်ပါတီ ရင်ထိုးကို ဝက်သတ်လိုင်စင်လုပ်နေသူ ပြသကာ ပြန်လည်အော်ဟစ် ခြိမ်းခြောက်နေမှုကိုလည်း တွေ့ရှိခဲ့ရသည်။

“တာဝန်ချိန်မှာ ကိုယ်ထိလက်ရောက် စော်ကားတယ်။ ဝတ္တရား နှောင့်ယှက်တယ်။ ဒါကြောင့် ကျွန်တော်တို့ ဥပဒေကြောင်းအရ ဆက်လက်လုပ်ဆောင်သွားမယ်။ နိုင်ငံဖြတ်ကျော်တယ် ဆိုတာက နိုင်ငံတော်အဆင့် ဖြစ်သွားပြီ။ ကျွန်တော်တို့ ခွင့်ပြုလို့ မရတော့ဘူး။ တိုင်းဒေသကြီးအစိုးရကို တင်ရမယ်။ ခွင့်ပြုချက်ရမှ ကျွန်တော်တို့ဌာနရဲ့ ထောက်ခံချက်နဲ့ သွားဝယ်ရတယ်။ ဒီလိုသွားဝယ်ရင်လည်း ဘယ်နေရာမှာ ဘယ်နှကောင်ဝယ် ဘယ်သူ့ခြံမှာဝယ်မယ်။ ဘယ်ကားနှင့် သယ်ယူလာမလဲ။ အဲဒီလိုစုံလင်အောင် ထည့်သွင်းရေးရပါတယ်။ အခုက ဘာအထောက်အထားမှ မပါဘူး။ ဝန်ကြီးချုပ်လာတုန်းက တရားမဝင် သယ်ယူနေတာကို တားဆီးပေးဖို့ မွေးမြူရေးသမားတွေ တင်ပြထားတာရှိတယ်။ စည်ပင်သာယာရေး ကော်မတီကလည်း အစည်းအဝေးထိုင်ပြီး တားဆီးအဖွဲ့ကို ဖွဲ့ထားတယ်။ ဒီအဖွဲ့နဲ့ သွားရောက်တားဆီးတာပါ။ တကယ်က ကျွန်တော်တို့က ဖမ်းတာမဟုတ်ပါဘူး။ စိစစ်တာပါ။ ဒါကို သူတို့က လက်မခံဘဲ ကိုယ်ထိလက်ရောက် စော်ကားသွားတာပါ” ဟု မြိတ်မြို့နယ် တိ/မွေးကု ဦးစီးမှူး ဒေါက်တာဝင်းဇော်ဦးက ပြောကြားသည်။

ဝက်သတ်လိုင်စင် ယူထားသူမှာ ဒေါ်ဝင်း၏ ခင်ပွန်းဖြစ်ပြီး ယခုဖြစ်စဉ်တွင် ကိုယ်ထိလက်ရောက် တွန်းထိုးခြင်း၊ ထိုးကြိတ်ခြင်း၊ ကန်ကျောက်ခြင်း လုပ်ခဲ့သူများမှာ ဒေါ်လှရီ (ခ) စုမနှင့် ခင်ပွန်းဖြစ်သူ ကရင်တို့ဖြစ်ကြောင်း သိရသည်။

လိုင်စင်လက်ခွဲ ယူထားသူများသာဖြစ်ကာ ဒေါ်လှရီ (ခ) စုမဆိုသူက အမျိုးသား ဒီမိုကရေစီအဖွဲ့ချုပ် မြို့နယ်အလုပ် အမှုဆောင်ဟု အော်ဟစ်ပြောဆိုခြင်း၊ ပါတီရင်ထိုးတံဆိပ်အား ပြသကာ တိမွေး/ကုဆရာဝန်အား အော်ဟစ်ခြိမ်းခြောက်ခြင်းများ ပြုလုပ်ခဲ့ကြောင်း သိရသည်။

“ဝန်ထမ်းတစ်ယောက်အနေနဲ့ တရားစွဲမယ်ဆိုပြီး ပြောတယ်။ ဒါပေမဲ့ သူဝန်ထမ်းအင်္ကျီ မဝတ်ထားဘူး။ ဗီဒီယိုဖိုင်ထဲမှာလည်း မြင်လိမ့်မယ်။ အဲဒီလူက အရှေ့တည့်တည့်ကနေ ကားကိုတားပြီး သော့ဖြုတ်ပါတယ်။ ဒီလိုလုပ်တာကတော့ ဘယ်သူမဆို ဒေါသထွက်လိမ့်မယ်။ စိတ်ခံစားချက်ဖြစ်မှာပါ။ ကျွန်မက လိုင်စင်စီကိုင်ထားသူပါ။ သူတို့ကို လက်ခွဲတွေပါ။ ဒါကြောင့် လာရောက်ဖြေရှင်း ပေးရတာပါ။ သူ့မှာ စာရွက်စာတမ်းတွေလည်း ပါလာတယ်လို့ ပြောတယ်။ ဝက်ဝယ်ယူတယ် ဆိုတာက တစ်အိမ်တည်းက လိုသလောက် မရပါဘူး။ တောထဲမှာ ပြန့်ကျဲနေတာကို ဝယ်ရတာပါ။ ပြဿနာ ဖြစ်သွားတာက ဆေးတပ်အရှေ့မှာပါ” ဟု ဝက်သတ် (ဃ) လိုင်စင်ယူထားသူ သူဒေါ်ဝင်းက ဆိုသည်။

အဆိုပါဖြစ်စဉ်နှင့် ပတ်သက်ပြီး မြို့နယ်စည်ပင်သာယာရေး ကော်မတီက လိုင်စင်ပြန်လည် သိမ်းယူရေးကိစ္စ ဆုံးဖြတ်သွားမည်ဖြစ်ပြီး တိုင်းဒေသကြီး ဝန်ကြီးချုပ်နှင့် အမျိုးသားဒီမိုကရေစီ အဖွဲ့ချုပ်ဗဟို အလုပ်အမှုဆောင်သို့လည်း သုံးသပ်ချက်များ တင်ပြသွားမည်ဖြစ်ကြောင်း သိရသည်။

Most Read

Most Recent