လုပ်ငန်းရှင်များ၏ ကန့်ကွက်မှု ကြုံတွေ့နေရသည့် ဝင်ငွေခွန်အပေါ် ကြိုတင်ကောက်ခံသောပင်ရင်းမှ နုတ်ယူပေးသွင်းသည့် အခွန် Withholding Tax ကောက်ခံမှုကို နိုင်ငံတော်အစိုးရက ကောက်ခံတော့မည်မဟုတ်ဘဲ ပယ်ဖျက်တော့မည်ဖြစ်ကြောင်း ပြည်တွင်း အခွန်များဦးစီးဌာနထံမှ သိရှိရသည်ဟု ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်က ဖေဖော်ဝါရီ ၁၁ ရက်တွင် သတင်းထုတ်ပြန်သည်။

အဆိုပါ ပြောကြားချက်ကို ကုန်သည်စက်မှုအသင်းချုပ်တွင် ဖေဖော်ဝါရီ ၁၁ ရက်က ဆွေးနွေးခဲ့သည့် ပြည်ထောင်စုအခွန်အကောက်ဥပဒေဆိုင်ရာ အစိုးရ-ပုဂ္ဂလိက ဆွေးနွေးပွဲ၌ ပြည်တွင်းအခွန်များဦးစီးဌာနက အသိပေး ပြောကြားခဲ့ခြင်းဖြစ်ပြီး လက်ရှိတွင် Withholding Tax ကောက်ခံခြင်းအား ပယ်ဖျက်ရန် အဆင့်ဆင့် တင်ပြဆောင်ရွက်နေကာ မကြာမီလအနည်းငယ်အတွင်း စတင်အကျိုးသက်ရောက်နိုင်မည်ဖြစ်ကြောင်း ထုတ်ပြန်ချက်အရ သိရသည်။

၂၀၁၈ ပြည်ထောင်စု အခွန်အကောက်ဥပဒေတွင် ထည့်သွင်းရေးဆွဲသင့်သည့် အကောက်ခွန်နှင့် အခွန်ဆိုင်ရာနှုန်းထားများကို ကုန်သည်စက်မှုအသင်းချုပ်တွင် ဆွေးနွေးနေခြင်းဖြစ်ပြီး ကုန်သည်စက်မှုအသင်းချုပ်နှင့် ညီနောင်အသင်းများမှ ကိုယ်စားလှယ်များက ရန်ကုန်တိုင်းဒေသကြီးဝန်ကြီးချုပ်၊ တိုင်းဒေသကြီး စီမံ-ဘဏ္ဍာဝန်ကြီး အပါအဝင် သက်ဆိုင်ရာ အစိုးရတာဝန်ရှိသူများနှင့် အခွန်ဆိုင်ရာ ဖြေလျှော့မှုများအတွက် ဆွေးနွေးခဲ့သည်။

ယနေ့ အစည်းအဝေးတွင် ပြည်တွင်းမှ ထုတ်လုပ်နေသည့်စက်ရုံများ ပို့ကုန်မြှင့်တင်ရေးနှင့် သွင်းကုန်အစားထိုးရေးအတွက် အကျိုးပြုနေသည့် လုပ်ငန်းများ၏ ယှဉ်ပြိုင်နိုင်စွမ်း တိုးတက်လာဖို့ ကုန်သွယ်လုပ်ငန်းခွန်နှင့် အကောက်ခွန်နှုန်းထားများ လျှော့ချရေး၊ အိမ်၊ ခြံ၊ မြေဝယ်ယူရာတွင် ပေးဆောင်နေရသည့် ဝင်ငွေခွန်နှုန်းထားများ လျှော့ချရေးနှင့် ဝင်ငွေခွန်ဥပဒေသစ်ရေးဆွဲရာတွင် ပုဂ္ဂလိကကဏ္ဍ၏ အကြံပြုချက်များကို ကျယ်ကျယ်ပြန့်ပြန့် ရယူရေး ဆွေးနွေးခဲ့ကြောင်း သိရသည်။

ထို့ပြင် အခွန်ဆိုင်ရာနှစ် (Tax Year) ကို ဧပြီ ၁ ရက်မှ မတ် ၃၁ ရက်အထိထားရှိရေး၊ အခွန်ဆိုင်ရာဥပဒေများ၊ အခွန်ဆိုင်ရာ လုပ်ထုံးလုပ်နည်းများ၊ ဆောင်ရွက်မှုပုံစံများ ပိုမိုရှင်းလင်း လွယ်ကူလာစေရေးနှင့် ICT နည်းပညာများ အသုံးပြုရေးအပြင် ပြည်တွင်းအခွန်များဦးစီးဌာနအတွက် နိုင်ငံတော်အစိုးရက ပိုမိုပံ့ပိုးထောက်ပံ့ပေးခြင်းနှင့် နှစ်စဉ်ဘဏ္ဍာငွေ ပိုမိုစီစဉ်ပေးခြင်း စသည့်နည်းများနှင့် အခွန်ထမ်းပြည်သူကို ပိုမိုကောင်းမွန်သည့် ဝန်ဆောင်မှုပေးနိုင်ရေး ဆွေးနွေးခဲ့ကြောင်း သိရသည်။