<

မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့သည် အကြမ်းဖက်သူများ မဟုတ်ကြောင်းနှင့် မတရားအသင်းမှ ပယ်ဖျက်ကြောင်း ပြည်ထဲရေးဝန်ကြီးဌာန ထုတ်ပြန်

နိုင်ငံတော်၏အတိုင်ပင်ခံပုဂ္ဂိုလ်နှင့် မွန်ပြည်သစ်ပါတီ၊ လားဟူဒီမိုကရက်တစ် အစည်းအရုံးခေါင်းဆောင်များ ဇန်န၀ါရီ ၂၃ ရက်က အမှတ်တရဓာတ်ပုံ ရိုက်ကူးစဉ် (ဓာတ်ပုံ – Myanmar State Counsellor Office)

မွန်ပြည်သစ်ပါတီ (New Mon State Party-NMSP) နှင့် လားဟူ ဒီမိုကရက်တစ်အစည်းအရုံး (Lahu Democratic Union-LDU) တို့သည် အကြမ်းဖက်သူများ မဟုတ်ကြောင်းနှင့် မတရားအသင်းမှ ပယ်ဖျက်ကြောင်း ပြည်ထဲရေးဝန်ကြီးဌာနက ဖေဖော်ဝါရီ ၁၁ ရက်တွင် သတင်းထုတ်ပြန်ခဲ့သည်။

ပြည်ထောင်စုသမ္မတမြန်မာနိုင်ငံတော်၊ ပြည်ထဲရေးဝန်ကြီးဌာန၏ အမိန့်ကြော်ငြာစာအမှတ် (၁/၂၀၁၈) တွင် နိုင်ငံတော်သမ္မတသည် အကြမ်းဖက်တိုက်ဖျက်ရေးဥပဒေအရ မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့ကို အကြမ်းဖက်သူများ မဟုတ်ကြောင်းနှင့် အမိန့်ကြော်ငြာစာ အမှတ် (၂/၂၀၁၈) တွင် နိုင်ငံတော်သမ္မတသည် မတရားအသင်းများ အက်ဥပဒေအရ အဆိုပါ အဖွဲ့နှစ်ဖွဲ့အား မတရားအသင်းမအဖြစ်မှ ပယ်ဖျက်ကြောင်း ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေ၏ အမိန့်ဖြင့် ထုတ်ပြန်ထားခြင်းဖြစ်သည်။

မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့သည် ပြီးခဲ့သည့်ဇန်န၀ါရီက နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့အား သီးခြားစီ သွားရောက် တွေ့ဆုံခဲ့ပြီးနောက် အစိုးရနှင့် တိုင်းရင်းသား လက်နက်ကိုင်အဖွဲ့များအကြား ချုပ်ဆိုသည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) ကို လက်မှတ်ရေးထိုးသွားမည်ဖြစ်ကြောင်း ဇန်န၀ါရီ ၂၃ ရက်တွင် ပူးတွဲကြေညာခဲ့သည်။

ထို့နောက် လာမည့်ဖေဖော်ဝါရီ ၁၃ ရက်တွင် အစိုးရနှင့် မွန်ပြည်သစ်ပါတီ၊ လားဟူဒီမိုကရက်တစ် အစည်းအရုံးတို့အကြား (NCA) လက်မှတ်ရေးထိုးပွဲ အခမ်းအနားကို ပြုလုပ်သွားမည်ဖြစ်ကြောင်း နိုင်ငံတော်အတိုင်ပင်ခံရုံးက ဖေဖော်ဝါရီ ၅ ရက်တွင် ထုတ်ပြန်ခဲ့သည်။

ထိုသို့ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် NCA တွင် လက်မှတ်ရေးထိုးမည်ဖြစ်သည့် အဆိုပါအဖွဲ့နှစ်ဖွဲ့အပေါ် ယခုကဲ့သို့ အကြမ်းဖက်သူများ မဟုတ်ကြောင်းနှင့် မတရားအသင်းမှ ပယ်ဖျက်ကြောင်း ပြည်ထဲရေးဝန်ကြီးဌာနက ထုတ်ပြန်ခဲ့ခြင်းလည်းဖြစ်သည်။

မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့သည် ၂၀၁၅ အထွေထွေရွေးကောက်ပွဲတွင် အနိုင်ရပြီးနောက် နိုင်ငံတော်အာဏာရယူထားသည့် NLD အစိုးရသစ်လက်ထက်၌ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် NCA တွင် ပထမဆုံး လက်မှတ်ရေးထိုးမည့် အဖွဲ့များလည်း ဖြစ်သည်။

လက်ရှိတွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များမှာ ကရင်အမျိုးသားအစည်းအရုံး (KNU)၊ DKBA၊ KNU/KNLA(PC)၊ ရှမ်းပြည်ပြန်လည်ထူထောင်ရေးကောင်စီ (RCSS)၊ ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO)၊ ချင်းအမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ (ALP)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF) တို့ ဖြစ်သည်။

မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့သည် ညီညွတ်သော တိုင်းရင်းသားလူမျိုးများဖက်ဒရယ်ကောင်စီ (UNFC) အဖွဲ့ဝင်များဖြစ်ပြီး (UNFC) အနေဖြင့် အဖွဲ့ဝင်တိုင်းရင်းသား လက်နက်ကိုင်အဖွဲ့များ (NCA) တွင် လက်မှတ် ရေးထိုးနိုင်ရေးအတွက် နိုင်ငံရေးဆိုင်ရာ ညှိနှိုင်းဆွေးနွေးရေး ကိုယ်စားလှယ်အဖွဲ့ (DPN) ကို ဖွဲ့စည်းကာ အဆိုပြုချက်ရှစ်ချက်အား အစိုးရ၏ ငြိမ်းချမ်းရေးကော်မရှင်နှင့် ဆွေးနွေးသည်မှာ တစ်နှစ်ကျော်ကြာပြီဖြစ်ရာ ဆွေးနွေးမှုများပြုလုပ်ရာတွင် တစ်ဆို့မှုများ ဖြစ်ပေါ်နေချိန်၌ မွန်ပြည်သစ်ပါတီနှင့် လားဟူဒီမိုကရက်တစ် အစည်းအရုံးတို့က နှစ်ဖွဲ့တည်းခွဲထွက်၍ NCA ရေးထိုးသွားမည်ဖြစ်သည်။

ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ UNFC တွင် တစ်နိုင်ငံလုံး ပစ်ခတ်တိုက်ခတ်မှု ရပ်စဲရေးသဘောတူစာချုပ် NCA လက်မှတ်မရေးထိုးဘဲ ကျန်ခဲ့သည့် အဖွဲ့နှစ်ဖွဲ့မှာ ကရင်နီအမျိုးသား တိုးတက်ရေးပါတီ (KNPP) နှင့် ရခိုင်ပြည်အမျိုးသားကောင်စီ (ANC) တို့ဖြစ်သည်။

February 11, 2018














Copy Protected by Chetan's WP-Copyprotect.