<

စစ်ကိုင်းတိုင်းအစိုးရအဖွဲ့က နာဂကိုယ်ပိုင်အုပ်ချုပ်ခွင့်ရ ဒေသရှိ စာရာမေရိတောင်အား ကြိုးပြင်ကာကွယ် ပြုလုပ်ရေး ကိစ္စနှင့် ပတ်သက်၍ နာဂအမျိုးသားရေး ကောင်စီက အချက်ကိုးချက်ပါ စာနှစ်စောင် ထုတ်ပြန်ကာ ကန့်ကွက်

စာရာမေရိတောင်ကို တွေ့ရစဉ်

စစ်ကိုင်းတိုင်း အစိုးရအဖွဲ့က နာဂကိုယ်ပိုင်အုပ်ချုပ်ခွင့်ရဒေသရှိ စာရာမေရိတောင်အား ကြိုးပြင်ကာကွယ် ပြုလုပ်ရေး ကိစ္စနှင့် ပတ်သက်၍ နာဂအမျိုးသားရေး ကောင်စီက အချက်ကိုးရက်ပါ စာနှစ်စောင်အား ဖေဖော် ၀ါရီ ၉ ရက် နေ့စွဲဖြင့် ထုတ်ပြန်ကာ ကန့်ကွက်ခဲ့ကြောင်း သိရသည်။

အဆိုပါ ထုတ်ပြန်သည့် စာနှစ်စောင်တွင် နံပါတ် (၅) အချက်တွင်၂၀၁၄ ခုနှစ် နိုဝင်ဘာ ၁၂ ရက်မှ ဒီဇင်ဘာ ၁ ရက်အထိ ပြုလုပ်ခဲ့သော နာဂအမျိုးသား ညီလာခံတွင် ဆွေးနွေးဆုံးဖြတ်ခဲ့သည့် ဒေသဖွံ့ဖြိုးရေးရာ ကဏ္ဍ၊ အမှတ် (၂) မြေယာစီမံခန့်ခွဲမှုများပါ အချက်များနှင့်လည်း လုံးဝသွေဖည်နေသည်ဟု ရေးသားဖော်ပြ ထားကြောင်း သိရသည်။

“ကျွန်တော်တို့ နာဂဒေသမှာ အစိုးရကနေပြီးတော့ ကြိုးပြင်ကာကွယ်တောအဖြစ် လုပ်ချင်တယ်မျိုးပေါ့နော်။ ပြီးတော့ လုပ်တဲ့နေရာမှာလည်း သူတို့ဘက်က လုပ်ထုံးလုပ်နည်းနဲ့ မတူဘူး။ ပြီးတော့ သူတို့က အစိုးရ ချမှတ်ထားတဲ့ ဥပဒေတွေကိုလည်း သူတို့က မလိုက်နာဘူး။ ဒီအတွက် ကျွန်တော်တို့က ကန့်ကွက်တာပါ။ ပြီးတော့ ဒီကိစ္စကို ဒေသခံတွေနဲ့လည်း ဆွေးနွေးတာမျိုး မရှိဘူး။ နောက်ပြီးတော့ ဒီကိစ္စနဲ့ပတ်သက်ပြီး နာဂ တိုင်းရင်းသားတွေအပေါ်မှာ နိုင်ငံရေးအရ မရိုးသားတာလားဆိုတာ အများကြီးပြောစရာ ရှိလာတယ်။ သံသယတွေနဲ့ ဖြစ်လာတယ်” ဟု နာဂအမျိုးသားရေး ကောင်စီဥက္ကဋ္ဌ ဦးအထောင်မကူရီက ပြောကြားသည်။

ပြီးခဲ့သည့် ရက်သတ္တပတ်ခန့်က စစ်ကိုင်းတိုင်းဒေသကြီး သစ်တောရေးရာ ဦးစီးဌာနမှ ညွှန်ကြားရေးမှူး ဦးခင်မောင်ဝင်း ဦးဆောင်သည့် အဖွဲ့တစ်ဖွဲ့သည် နာဂကိုယ်ပိုင်အုပ်ချုပ်ခွင့်ရဒေသရှိ စာရာမေရိတောင်အား လေ့လာရေးခရီးစဉ် သွားရောက်သည့်အခါတွင် နာဂတိုင်းရင်းသားတို့၏ ကန့်ကွက်မှုကြောင့် စာရာမေရိတောင်အား လေ့လာခွင့်မရရှိဘဲ နောက်ကြောင်း ပြန်လှည့်ခဲ့ရသည့် အခြေအနေတစ်ခု ရှိခဲ့ကြောင်း သိရသည်။

“ကျွန်တော်တို့ကဒီလို။ ဒေသခံတွေအနေနဲ့ သဘောတူညီမယ်ဆိုရင် ဒီစာရာမေရိတောင်ကို ကြိုးပြင် ကာကွယ်တောဖွဲ့မှာပါ။ ဒါပဲ။ အခုအချိန်အထိတော့ ညှိနှိုင်းဆဲပဲ။ ကျွန်တော်တို့နဲ့ ဒေသခံတွေကြား ညှိနှိုင်းလို့ရတဲ့အထိ ဆက်လက်ပြီး ညှိနှိုင်းသွားမှာပါ” ဟု စစ်ကိုင်းတိုင်းဒေသကြီး သစ်တောရေးရာ ဦးစီးဌာနမှ ညွှန်ကြားရေးမှူး ဦးခင်မောင်ဝင်းက ပြောကြားသည်။

စစ်ကိုင်းတိုင်းဒေသကြီး နာဂကိုယ်ပိုင်အုပ်ချုပ်ခွင့်ရ ဒေသရှိ စာရာမေရိတောင်၏ ပတ်ဝန်းကျင်သည် ၅၅၇၈၇ ဧကရှိကြောင်း၊ မြန်မာနိုင်ငံသည် ဌာနေတိုင်းရင်းသား အခွင့်ရေးဆိုင်ရာ ကမ္ဘာ့ကုလသမဂ္ဂ ကြေညာစာတမ်းပါ UNDRIP အား လိုက်နာရန် လက်မှတ်ရေးထိုးထားသည့် နိုင်ငံတစ်နိုင်ငံဖြစ်ကြောင်း၊ ထို့ပြင်၂၀၁၅ ခုနှစ် ပြည်ထောင်စုသမ္မတ မြန်မာနိုင်ငံ တိုင်းရင်းသား လူမျိုးများ၏ အခွင့်အရေး ကာကွယ်စောင့်ရှောက်သည့် ဥပဒေပုဒ်မ ၄ (ဆ) နှင့် ပုဒ်မ ၅ တို့အား အစိုးရ အဖွဲ့အနေဖြင့် တိုက်ရိုက်ချိုးဖောက်နေသည်ဟု ထုတ်ပြန်သည့် စာနှစ်စောင်တွင် ရေးသားပါရှိသည်။

 

February 9, 2018














Copy Protected by Chetan's WP-Copyprotect.