မန္တလေးအိမ်ခြံမြေဈေးကွက်တွင် ကွန်ဒိုတိုက်ခန်းသစ်များထွက်ရှိမှုနှုန်းနှင့် ဝယ်ယူမှုနှုန်း တက်ရိပ်ပြနေဆဲဖြစ်သော်လည်း အဆင့်မြင့်ဟိုတယ်အခန်းခများနှင့် ဈေးဝယ်စင်တာဆိုင်ခန်းငှားရမ်းခများ ကျဆင်း

မန္တလေးအိမ်ခြံမြေဈေးကွက်တွင် ကွန်ဒိုတိုက်ခန်းသစ်များထွက်ရှိမှုနှုန်းနှင့် ဝယ်ယူမှုနှုန်း တက်ရိပ်ပြနေဆဲဖြစ်သော်လည်း အဆင့်မြင့်ဟိုတယ်အခန်းခများနှင့် ဈေးဝယ်စင်တာဆိုင်ခန်းငှားရမ်းခများ ကျဆင်း
Published 8 February 2018

မြန်မာနိုင်ငံ၏ ဒုတိယအကြီးဆုံး စီးပွားရေးမြို့တော်ဖြစ်သော မန္တလေးအိမ်ခြံမြေဈေးကွက်တွင် ကွန်ဒိုတိုက်ခန်းသစ်များ ထွက်ရှိမှုနှုန်းနှင့် ဝယ်ယူမှုနှုန်း တက်ရိပ်ပြနေဆဲဖြစ်သော်လည်း အဆင့်မြင့်ဟိုတယ်အခန်းခများနှင့် ဈေးဝယ်စင်တာဆိုင်ခန်းငှားရမ်းခများ ကျဆင်းလာကြောင်း အမေရိကန်အခြေစိုက် အိမ်ခြံမြေအကြံပေးလုပ်ငန်းဖြစ်သော Colliers International (Myanmar) ၏ မန္တလေးအိမ်ခြံမြေဈေးကွက် ဆန်းစစ်မှုအစီရင်ခံစာတွင် သုံးသပ်ထားကြောင်း သိရသည်။

မန္တလေးဈေးကွက်သည် စီးပွားရေးကောင်းမွန်သော မြို့ကြီးတစ်မြို့နှင့် လျော်ညီစွာ အိမ်ခြံမြေဈေးကွက်မှာ အရည်အသွေးမြင့်မားသော နေထိုင်မှုပုံစံကိုဦးတည်ပြီး ရှေ့ဆက်လျက်ရှိသည်။ နေထိုင်မှုပုံစံ ပြောင်းလဲသည်နှင့်အမျှ အဆင့်မြင့်ကွန်ဒိုတိုက်ခန်းများ၊ ဈေးဝယ်စင်တာများ၊ အဆင့်မြင့်ဟိုတယ်များ ထွက်ပေါ်လာပြီး တိုက်ရိုက်လေကြောင်း ခရီးစဉ်များပြားလာခြင်းကလည်း ခရီးသွားဝင်ရောက်မှုနှင့် ဒေသတွင်းစီးပွားရေးကို တိုးတက်စေခဲ့သည်။ အနာဂတ်ကာလတွင် ဟိုတယ်နှင့် ခရီးသွားဈေးကွက် ပိုမိုအားကောင်းလာမည်ဖြစ်သောကြောင့် မန္တလေး၏ ကြွယ်ဝသော ယဉ်ကျေးမှုနှင့် သမိုင်းနောက်ခံကိုအခြေပြုပြီး ခရီးသွားလုပ်ငန်းများလုပ်ကိုင်ခြင်းနှင့် ဟိုတယ်များကလည်း ဟိုတယ်ပြင်ပဝန်ဆောင်မှုများ တိုးမြှင့်ဆောင်ရွက်ခြင်းဖြင့် အိမ်ခြံမြေအဆောက်အအုံဈေးကွက်ကို ဖွံ့ဖြိုးလာစေမည်ဖြစ်သည်။

၂၀၁၇ ခုနှစ်တွင် မန္တလေးဈေးကွက်တွင် အဆင့်မြင့်ကွန်ဒိုတိုက်ခန်းအရေအတွက် ၅၀၀ ကျော်ရှိလာပြီး ယခင်နှစ်ကထက် ၄၆ ရာခိုင်နှုန်းတိုးတက်ခဲ့ကာ ၂၀၁၈ ခုနှစ်တွင် ၉၀၀ ဝန်းကျင်ရှိလာမည်ဖြစ်ရာ တည်ဆောက်မှုများအရ လာမည့်နှစ်နှစ်အတွင်း ကွန်ဒိုတိုက်ခန်း ၅၀၀ ဝန်းကျင်ဈေးကွက်သို့ ထပ်မံဝင်ရောက်မည်ဖြစ်သည်။ ကွန်ဒိုတိုက်ခန်းအများစုသည် မြို့တွင်းဧရိယာတွင်တည်ရှိပြီး အိပ်ခန်းသုံးခန်းပါကွန်ဒိုနှင့် အိပ်ခန်းနှစ်ခန်းပါကွန်ဒိုတို့ အများဆုံးဖြစ်သည်။ ကွန်ဒိုတိုက်ခန်း အသစ်ဝယ်ယူမှုနှုန်းသည် ၂၀၁၇ ခုနှစ်တွင် ရာခိုင်နှုန်း ၆၀ ရှိပြီး ယခင်နှစ်က ၅၅ ရာခိုင်နှုန်းသာရှိခြင်းကြောင့် တိုးတက်မှုနှုန်း ငါးရာခိုင်နှုန်းရှိခဲ့သည်။

အဆင့်မြင့်လက်လီအရောင်းနေရာများဖြစ်သော ဈေးဝယ်စင်တာဧရိယာသည် မန္တလေးမြို့တွင် ၂၀၁၇ ခုနှစ်အတွင်း စတုရန်းမီတာ ၁၂၀၀၀၀ ဝန်းကျင်အထိရှိလာပြီး ၂၀၁၈ ခုနှစ်အတွင်း၌လည်း ယင်းပတ်ဝန်းကျင်သာရှိမည်ဟု ခန့်မှန်းထားသည်။ ဆိုင်ခန်းငှားရမ်းမှုနှုန်းမှာ ၂၀၁၇ ခုနှစ်တွင် ရာခိုင်နှုန်း ၆၀ အထိမြင့်တက်ခဲ့ပြီး ယခင်နှစ်ကထက် ၁၅ ရာခိုင်နှုန်း တိုးတက်ခဲ့သော်လည်း ငှားရမ်းခနှုန်းထားမှာ တစ်စတုရန်းမီတာလျှင် ၂၃ ဒေါ်လာဝန်းကျင်သာရှိခြင်းကြောင့် ယခင်နှစ်ကထက် ရှစ်ရာခိုင်နှုန်း လျော့နည်းခဲ့သည်။

ထို့အတူ မန္တလေးဈေးကွက်၌ ၂၀၁၇ ခုနှစ်တွင် အဆင့်မြင့်ဟိုတယ်အခန်းအရေအတွက် ၁၂၄၀ ဝန်းကျင်ရှိပြီး တည်ဆောက်ဆဲစီမံကိန်းခြောက်ခုကြောင့် ၂၀၁၈ ခုနှစ်အတွင်း အခန်းပေါင်း ၁၈၀၀ ကျော်ရှိလာမည်ဖြစ်သည်။ ပျမ်းမျှဟိုတယ်အခန်းခမှာ အဆင့်မြင့်ဟိုတယ်အခန်းများမှာ ၂၇၉ ဒေါ်လာဖြစ်ပြီး ယခင်နှစ်ထက် တစ်ရာခိုင်နှုန်း၊ အလယ်အလတ်ဟိုတယ်အခန်းများမှာ ၉၃ ဒေါ်လာဖြစ်ပြီး ယခင်နှစ်ထက် ငါးရာခိုင်နှုန်းကျဆင်းခဲ့ကာ ဟိုတယ်များအနေဖြင့် မန္တလေးမြို့၏ ရှေးဟောင်းသမိုင်းအမွေအနှစ်၊ ကြွယ်ဝသောယဉ်ကျေးမှုတို့ကိုအသုံးပြုပြီး လူမှုဘဝအခြေပြု ခရီးသွားဝန်ဆောင်မှုများဖြင့် လုပ်ငန်းများမြှင့်တင်ရန် Colliers International (Myanmar) က အကြံပြုထားကြောင်း သိရသည်။

Most Read

Most Recent